Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

Mme N̄ke 13;1-25

13  Eyen emi ọbọde ntụnọ ete eyenyene ọniọn̄,+ edi asak-nsahi ikopke nsuannọ.+  Owo ayadia eti n̄kpọ eke otode mbun̄wụm inua esie,+ edi se idọn̄de ukpọn̄ mbon abian̄a edi afai.+  Owo eke ekpemede inua esie enịm ukpọn̄ esie uwem.+ Owo eke an̄wan̄arede inua esie—enye oyokụt nsobo.+  Itọn̄ ọdọn̄ owo ifu, ukpọn̄ esie inyeneke n̄kpọ ndomokiet.+ Edi ukpọn̄ mbon nsịnifịk eyesehe.+  Edinen owo asasua ikọ nsu,+ edi mme idiọkowo ẹnam n̄kpọ o-bụt ẹnyụn̄ ẹda esuene ẹsọk idemmọ.+  Edinen ido ekpeme owo eke mînamke ibak ke usụn̄ esie,+ edi idiọkido onụk anamidiọk ọduọk.+  Enyene owo eke anamde nte imenyene n̄kpọ edi inyeneke n̄kpọ ndomokiet;+ enyene owo eke anamde nte idi ubuene edi enyene ediwak ọsọn̄urua n̄kpọ.  Inyene owo edi ufak ukpọn̄ esie,+ edi ubuene ikopke nsuannọ.+  Un̄wana ndinen owo ayanam mmọ ẹdara;+ edi ẹyenịme utuenikan̄ mme idiọkowo.+ 10  Owo iseri esịn utọk,+ edi mbon oro ẹkọkde ibuot ẹnyene ọniọn̄.+ 11  Ọsọn̄urua inyene emi ẹkọde ke abian̄a ayakabade esisịt,+ edi inyene owo emi ọkọde n̄kpọ ke ubọk ọyọtọt.+ 12  Idotenyịn emi ebịghide ndidi anam esịt ọdọn̄ọ,+ edi owo ndinyene se enye oyomde edi eto uwem.+ 13  Owo eke esede ikọ ke ndek,+ ẹyewamade enye ubiọn̄ akama-isọn ẹbọ; edi owo emi abakde ewụhọ ọyọbọ utịp.+ 14  Ibet owo ọniọn̄ edi idịm uwem,+ anam owo ọwọn̄ọde ọkpọn̄ afia n̄kpa.+ 15  Ata ikike anam owo okụt mfọn,+ edi usụn̄ mbon abian̄a idọnọke.+ 16  Kpukpru owo eke ẹnyenede mbufiọk ẹyenam n̄kpọ ke ifiọk,+ edi ndisịme owo ayarade ebiọ.+ 17  Idiọk asan̄autom ọyọduọ odụk idiọk,+ edi isụn̄utom emi anamde akpanikọ ọkọk unan.+ 18  Unana ye esuene ẹsịm owo eke ofụmide ntụnọ,+ edi ẹkpono owo eke ọbọde nsuannọ.+ 19  Owo okop inemesịt ke ini enyenede se idọn̄de ukpọn̄ esie;+ edi mme ndisịme ẹse ediwọn̄ọde n̄kpọn̄ idiọk ke mbubiam.+ 20  Owo eke asan̄ade ye mbon ọniọn̄ eyenyene ọniọn̄,+ edi ọyọdiọk ye owo eke odụkde nsan̄a ye mme ndisịme.+ 21  Afanikọn̄ ebịne mme anamidiọk,+ edi ẹyenọ ndinen owo nti utịp.+ 22  Eti owo ọyọkpọn̄ udeme enịm ọnọ nditọ nditọ, ẹyenyụn̄ ẹnịm inyene anamidiọk ẹnọ edinen owo.+ 23  In̄wan̄ emi ubuene ofụn̄de on̄wụm ọkpọmiọk udia,+ edi odu owo eke ẹkpọride ẹfep koro edinen ikpe mîdụhe.+ 24  Owo eke osụkde eto asasua eyen esie,+ edi owo emi amade eyen esie otụnọ enye.+ 25  Edinen owo adia tutu ukpọn̄ esie oyụhọ,+ edi idịbi mme idiọkowo ayana ukpọk.+

Mme Ikọ Idakisọn̄