Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

2 Samuel 2;1-32

2  Ndien edikem David obụp Jehovah+ ete: “Nte ndọk n̄ka kiet ke otu mme obio Judah?” Ntem Jehovah ọbọrọ enye ete: “Dọk ka.” Ndien David obụp ete: “Ndọk n̄ka m̀mọ̀n̄?” Ekem enye ọbọrọ ete: “Dọk ka Hebron.”+  Ntem David ọdọk aka do, enye ye iban esie mbiba, Ahinoam+ owo Jezreel ye Abigail+ n̄wan Nabal owo Carmel.  Ndien David ada irenowo+ oro ẹdude ye enye ọdọk, owo kiet kiet ye mbonufọk esie; ndien mmọ ẹka ẹkedụn̄ ke mme obio Hebron.  Ekem mbon Judah+ ẹdi ẹdiyet David aran+ ẹnịm ke edidem ufọk Judah.+ Ndien ẹditịn̄ ẹnọ David ẹte: “Mbon Jabesh-gilead ẹkemen Saul ẹkebụk.”  Ntem David ọdọn̄ mme isụn̄utom ẹkedọhọ mbon Jabesh-gilead+ ẹte: “Jehovah akpakam ọdiọn̄ mbufo,+ koro mbufo ẹkewụtde Saul, ọbọn̄ mbufo utọ ima-mfọnido+ emi, ke ndimen enye mbụk.+  Ndien Jehovah akpakam owụt mbufo ima-mfọnido+ onyụn̄ ọnọ mbufo ibetedem, ami n̄ko nyonyụn̄ mfọn ido ye mbufo ke ntak emi mbufo ẹnamde n̄kpọ emi.+  Ndien mbufo ẹsọn̄ ubọk, ẹnyụn̄ ẹnyene uko,+ koro Saul ọbọn̄ mbufo amakpa, ndien edi ami ke ufọk Judah ẹkam ẹyet aran ẹnịm ke edidem+ mmọ.”  Ndien Abner+ eyen Ner, kpa etubom udịmekọn̄ Saul, ada Ish-bosheth+ eyen Saul, ebe aka Mahanaim,+  man akanam enye edi edidem mbon Gilead+ ye mbon Ashurite ye mbon Jezreel+ ye mbon Ephraim+ ye mbon Benjamin+ ye ofụri Israel. 10  Ish-bosheth eyen Saul ekedi isua aba ke ini enye edide edidem Israel, enye onyụn̄ akara nte edidem ke isua iba. Edi ufọk Judah+ kpọt ẹketiene David. 11  Ndien ibat isua emi David edide edidem ufọk Judah ke Hebron edi isua itiaba ye ọfiọn̄ itiokiet.+ 12  Ekem Abner eyen Ner ye ikọt Ish-bosheth eyen Saul ẹwọrọ ke Mahanaim+ ẹka Gibeon.+ 13  Ndien Joab+ eyen Zeruiah+ ye ikọt David ẹwọrọ ẹkesop idem ọtọkiet ke n̄kpọdiọhọ mmọn̄ Gibeon; ndien mmọ ẹtie do, mmọ emi ẹtie ke edem n̄kpọdiọhọ mmọn̄ emi ndien mbon eken ẹtie ke edem n̄kpọdiọhọ mmọn̄ eken. 14  Ekem Abner ọdọhọ Joab ete: “Mbọk, yak n̄kparawa emi ẹdaha ke enyọn̄, ẹn̄wana en̄wan ke iso nnyịn.” Ntem, Joab ọdọhọ ete: “Yak mmọ ẹnam ntre.” 15  Ntre mmọ ẹdaha ke enyọn̄ ẹsan̄a ẹbe ke ibat ke ibat, Benjamin ye Ish-bosheth,+ eyen Saul ẹnyene owo duopeba, ikọt David ẹnyụn̄ ẹdi owo duopeba. 16  Ndien mmọ ẹmụm kiet eken ke ibuot, ẹnyụn̄ ẹda akan̄kan̄ ẹkịm kiet eken ke n̄kan̄, ndien mmọ ẹduọn̄ọ ọtọkiet ke isọn̄. Ndien ẹsio ebiet oro enyịn̄ Helkath-hazzurim, emi odude ke Gibeon.+ 17  Ndien en̄wan ọsọn̄ ubọk etieti ke usen oro, ẹnyụn̄ ẹkan Abner+ ye mbon Israel ke iso ikọt David. 18  Ndien nditọiren Zeruiah+ mbita, kpa Joab+ ye Abishai+ ye Asahel,+ ẹma ẹdu do; ndien Asahel ọsọp itọk nte akan̄+ ke ikọt. 19  Ndien Asahel ebịne Abner, iwọn̄ọkede idụk nnasia m̀mê ufien edi osụk ebịne Abner. 20  Ekem Abner ọwọn̄ọde enyịn ke edem, obụp ete: “Asahel, ndi afo edi oro?” enye onyụn̄ ọbọrọ ete: “Ami ke edi.” 21  Ndien Abner ọdọhọ enye ete: “Wọn̄ọde ka nnasia m̀mê ufien fo nyụn̄ mụm akparawa kiet, ndien sion̄o+ enye se enye esịnede da.” Edi, Asahel inyịmeke nditre ndibịne Abner. 22  Ntre Abner ọtọn̄ọ ntak ọdọhọ Asahel ete: “Sion̄o idem kpọn̄ ndibịne mi. Ntak akpanamde n̄wot fi?+ Ndikeme didie ndimenede iso nse Joab eyenuka?” 23  Edi enye isụk inyịmeke ndision̄o idem n̄kpọn̄; ndien Abner ada etak eduat ekịm enye idịbi+ tutu eduat oro ọwọrọ enye ke edem; ndien enye ọduọ akpa ana do. Ekem kpukpru mmọ eke ẹsịmde ọtọ emi Asahel ọkọduọde akpa ana, ẹtuak ẹda.+ 24  Ndien Joab ye Abishai ẹdaha ẹbịne Abner. Ke utịn ekperede ndisop, mmọ ẹdisịm obot Ammah, emi asakde iso ese Giah ke usụn̄ emi akade wilderness Gibeon.+ 25  Ndien nditọ Benjamin ẹsop idem ọtọkiet ẹda Abner ke edem, mmọ ẹnyụn̄ ẹkabade ẹdi otu kiet, ẹda ke enyọn̄ obot kiet. 26  Ntem Abner ofiori okot Joab onyụn̄ obụp ete: “Nte akan̄kan̄ editak ke ndidadia?+ Nte afo ufiọkke ke emi edida ọkpọsọn̄ ubiak edi ke akpatre?+ Edibịghi didie mbemiso afo ọdọhọde n̄kparawa fo ẹtre ndibịne nditọete mmọ?”+ 27  Ndien Joab ọbọrọ ete: “Ma uwem ata Abasi,+ edieke mûkposioroke uyo,+ usenubọk ke n̄kparawa ẹkpefiak edem ẹtre ndibịne nditọete mmọ.” 28  Ntre Joab efri nnụk,+ ndien kpukpru owo ẹtuak ẹda, ẹtre ndibịne Israel, inyụn̄ ifiakke aba in̄wana ekọn̄. 29  Edi Abner ye ikọt esie ẹsan̄a ke Arabah+ ofụri okoneyo oro ẹbe, ndien ẹbe Jordan+ ẹnyụn̄ ẹsan̄a ẹbe ofụri ebeden̄ oro tutu ẹdisịm Mahanaim.+ 30  Ndien Joab etre ndibịne Abner onyụn̄ anam kpukpru owo ẹsop idem ọtọkiet. Edi owo efịtenan̄ idụhe ke otu ikọt David, Asahel inyụn̄ idụhe. 31  Ndien ikọt David ẹma ẹwot ikọt Benjamin ye ikọt Abner—mbon emi ẹkekpan̄ade ẹkedi owo ikie ita ye ata.+ 32  Ndien mmọ ẹmen Asahel+ ẹkebụk ke ebiet emi ẹkebụkde ete esie,+ ke Bethlehem.+ Ndien Joab ye ikọt esie ẹsan̄a ofụri okoneyo oro tutu ẹdisịm Hebron+ ke usiere.

Mme Ikọ Idakisọn̄