Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

2 Samuel 18;1-33

18  Ndien David abat mbon oro ẹdude ye enye, onyụn̄ enịm etubom mme tọsịn ye etubom mme ikie+ ọnọ mmọ.  N̄ko, David ayak mbahade kiet ke itie ita+ ke otu mbio emi esịn Joab+ ke ubọk, onyụn̄ ayak mbahade kiet ke itie ita esịn Abishai+ eyen Zeruiah, eyeneka Joab+ ke ubọk, ndien ayak mbahade kiet ke itie ita esịn Ittai+ owo Gath ke ubọk. Ekem edidem ọdọhọ mbon oro ete: “Ami n̄ko nditreke nditiene mbufo n̄wọrọ n̄ka.”  Edi mbio oro ẹbọrọ enye ẹte: “Afo uduwọrọke,+ koro edieke nnyịn ifehede, mmọ idiyomke nnyịn;+ edieke mbahade iba ke otu nnyịn ẹkpan̄ade, mmọ idiyomke nnyịn, koro afo etiede nte owo nnyịn tọsịn duop;+ ndien ke emi, ọyọfọn edieke afo etiede ke obio ọnọ nnyịn un̄wam.”+  Ntre edidem ọdọhọ mmọ ete: “Nyanam se ededi emi ọfọnde mbufo ke enyịn.”+ Ndien edidem ada do ke mben inuaotop,+ kpukpru owo ẹnyụn̄ ẹsan̄a ẹwọrọ ke ikie ke ikie ye ke tọsịn ke tọsịn.+  Ndien edidem owụk Joab ye Abishai ye Ittai, ete: “Mbufo ẹnam n̄kpọ sụn̄sụn̄+ ye akparawa oro Absalom ke ntak mi.” Kpukpru owo ẹnyụn̄ ẹkop ini emi edidem ọnọde kpukpru mme etubom ewụhọ aban̄a Absalom.  Ndien mmọ ẹwọrọ ẹka ikọt ndikan̄wana ye Israel; ndien ekọn̄ emi akada itie ke akai Ephraim.+  Ekem, mme asan̄autom David ẹkan+ mbon Israel,+ ndien n̄kpan̄a okpon etieti ke usen oro, owo tọsịn edịp ẹnyụn̄ ẹkpan̄a.  Ndien ekọn̄ oro atara esịm kpukpru itie ke isọn̄ oro. N̄ko-n̄ko, mbon emi akai adiade ẹwak ẹkan mbon emi akan̄kan̄ adiade ke usen oro.  Ekem Absalom ke unana idotenyịn edisobo ye mme asan̄autom David. Absalom akawat ke mule, ndien mule oro efehe okodụk idak n̄kọk akamba eto, tutu ibuot Absalom afaha ke n̄kọk akamba eto oro, ndien enye edikọn̄ọ ufụm,+ mule oro enye okodorode onyụn̄ efehe ebe. 10  Ndien owo kiet okụt enye onyụn̄ eketịn̄ ọnọ Joab+ ete: “Sese! Mmokụt Absalom ọkọn̄ọde ke akamba eto.” 11  Ntem Joab ọdọhọ owo oro eketịn̄de ọnọ enye ete: “Afo ama okụt enye, ndien ntak mûkowotke enye do? Ndien ami n̄kpọnọ fi mbak silver duop ye n̄kpahaisịn kiet.”+ 12  Edi owo oro ọdọhọ Joab ete: “Ẹkpedodomo mbak silver tọsịn kiet ẹdọn̄ mi ke ekaubọk, n̄kpadaha ubọk mi ntụk eyen edidem; koro ekedi ke utọn̄ nnyịn ke edidem okowụk fi ye Abishai ye Ittai, ete, ‘Mbufo kpukpru ẹkpeme nte ẹnamde n̄kpọ ye akparawa oro Absalom.’+ 13  Mîkpedịghe ntre ami n̄kpakanam idiọk ye ukpọn̄ esie, edi ofụri n̄kpọ emi ikpedịbeke edidem,+ ndien afo ekpeyet ubọk osio.” 14  Ntem Joab ọdọhọ ete: “Yak n̄kûda mi mbiat ini ye afo!” Ntem enye emen eduat ita ada ekekịm+ Absalom ke esịt, ke adan̄aemi uwem osụk odude enye ke idem ke ufọt+ akamba eto oro. 15  Ndien asan̄autom duop emi ẹbiomde n̄kpọekọn̄ Joab ẹsan̄a ẹdisịm ẹnyụn̄ ẹtọ Absalom ẹwot.+ 16  Ekem Joab efri nnụk+ ete ẹtre ndibịne Israel; ntem ke Joab anam mmọ ẹtre ndibịne Israel. 17  Ekem mmọ ẹmen Absalom ẹketop ẹsịn ke akamba ukpe kiet ke akai ẹnyụn̄ ẹkịbi enye ata akamba ebok itiat.+ Ndien ofụri Israel ẹfen̄e ẹnyọn̄ọ ufọk mmọ kiet kiet. 18  Ndien ke adan̄aemi Absalom okodude ke uwem, enye ama owụk adaha+ kiet ọnọ idemesie ke Unaisọn̄ Itịghede Edidem,+ ete: “Ami nnyeneke eyeneren eke ẹdidade ẹti mi.”+ Ntre enye ada enyịn̄ esie okot adaha oro,+ ẹnyụn̄ ẹkot enye Adaha Absalom tutu esịm mfịn emi. 19  Ndien Ahimaaz+ eyen Zadok ọdọhọ ete: “Mbọk yak mfehe nda mbụk emi nsọk edidem, koro Jehovah emekpe ikpe esie onyụn̄ osio enye ke ubọk mme asua esie.”+ 20  Edi Joab ọdọhọ enye ete: “Idịghe afo edida mbụk aka mfịn emi, edi edida aka usen efen; afo ududaha mbụk emi uka mfịn emi koro edi eyen edidem akpa.”+ 21  Ekem Joab ọdọhọ owo Cush+ oro ete: “Ka ketịn̄ nọ edidem se okụtde.” Ntem owo Cush onụhọ ọnọ Joab onyụn̄ emen itọk. 22  Ndien Ahimaaz eyen Zadok ọtọn̄ọ ntak ọdọhọ Joab ete: “Yak se iyomde nditịbe etịbe, edi mbọk yak mi mfehe ntiene owo Cush emi.” Edi Joab obụp enye ete: “Eyen mi, nso inam afo oyomde ndifehe ntiene enye ke ini afo mûnyeneke mbụk ndomokiet?” 23  Edi enye osụk ọdọhọ ete: “Yak se iyomde nditịbe etịbe, yak mi mfehe ntiene.” Ntre Joab ọdọhọ enye ete: “Fehe tiene!” Ndien Ahimaaz emen itọk odụk usụn̄ n̄kan̄ Ikpehe+ Jordan onyụn̄ efehe ekebe owo Cush oro. 24  Ndien David etie ke ufọt inuaotop mbiba.+ Owo ukpeme+ onyụn̄ ọdọk okodoro ke ọkọm inuaotop ke ibibene. Ekem, enye emenede enyịn ada okụt ndien sese! eren kiet ke efehe ikpọn̄ edi. 25  Ntre owo ukpeme oro ofiori etịn̄ ọnọ edidem, ndien edidem ọbọrọ ete: “Edieke enye efehede ikpọn̄, enye asan̄a ye mbụk.” Ntre enye efehe edi tutu etetịm ekpere. 26  Ekem owo ukpeme oro ada okụt owo efen efehede. Ntre owo ukpeme oro ofiori ọdọhọ ekpeme-inuaotop ete: “Sese owo efen ke efehe ikpọn̄ edi!” ndien edidem ọdọhọ ete: “Owo emi n̄ko asan̄a ye mbụk.” 27  Ndien owo ukpeme oro ọdọhọ ete: “Se n̄kụtde edi ke ukot itọk eke akpa owo oro ebiet ukot itọk+ Ahimaaz,+ eyen Zadok,” ndien edidem ọbọrọ ete: “Enye edi eti owo,+ ndien asan̄a ye eti mbụk.”+ 28  Ekem Ahimaaz ofiori ọdọhọ edidem ete: “N̄kpọ ọfọn!” Ndien enye onụhọ ọnọ edidem onyụn̄ ekịbi iso ke isọn̄. Enye onyụn̄ ọdọhọ ete: “Itoro+ enyene Jehovah Abasi fo, emi anamde fi akan+ mbon emi ẹkemenerede ubọk mmọ ẹyom nditụk ọbọn̄ mi edidem!” 29  Edi edidem obụp ete: “Ndi n̄kpọ ọfọn ye akparawa oro Absalom?” Ndien Ahimaaz ọbọrọ ete: “Mma n̄kụt akwa ndutịme odude ke ini emi Joab ọkọdọn̄de asan̄autom edidem ye asan̄autom fo utom, edi n̄kọdiọn̄ọke se ndutịme emi adade aban̄a.”+ 30  Ntre edidem ọdọhọ ete: “Wọn̄ọde da n̄kan̄ emi.” Ndien enye ọwọn̄ọde ada. 31  Ndien sese! owo Cush+ oro odụk edidọhọ ete: “Yak ọbọn̄ mi edidem okop mbụk emi, koro Jehovah emekpe ikpe fo mfịn emi onyụn̄ osio fi ke ubọk kpukpru mbon oro ẹkedahade ẹda ndin̄wana ye afo.”+ 32  Edi edidem obụp owo Cush oro ete: “Ndi n̄kpọ ọfọn ye akparawa oro Absalom?” Ndien owo Cush oro ọbọrọ ete: “Se itịbede inọ akparawa emi akpakam etịbe ọnọ mme asua ọbọn̄ mi edidem ye kpukpru mbon oro ẹdahade ẹda ẹkere idiọk ẹban̄a fi.”+ 33  Ndien esịt etịmede edidem, enye onyụn̄ ọdọk aka ubet enyọn̄+ ufọk inuaotop akatua eyet; ndien ntem ke enye ọkọdọhọ nte enye asan̄ade: “Eyen mi Absalom, eyen mi, eyen mi+ Absalom! Akpakam edi ami n̄kakpa utu ke afo, O Absalom eyen mi, eyen mi!”+

Mme Ikọ Idakisọn̄