Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

2 Samuel 15;1-37

15  Edikem ke mme n̄kpọ emi ẹma ẹkebe, Absalom etịm chariot ye mme enan̄-mbakara ọnọ idemesie, owo aba ye duop ẹnyụn̄ ẹfehe ẹbe iso ẹnọ enye.+  Ndien Absalom ababak adaha ke enyọn̄+ akada ke mbenusụn̄ emi ẹsan̄ade ẹsịm inuaotop.+ Ndien ke adan̄aemi owo ekededi emi enyenede ikọ adade ọsọk edidem ete ekpe,+ Absalom oyokot owo oro onyụn̄ obụp ete: “Afo oto ewe obio?” ndien owo oro ọyọbọrọ ete: “Asan̄autom fo oto kiet ke otu esien Israel.”  Ndien Absalom ọyọdọhọ enye ete: “Sese, ikọ fo ọfọn onyụn̄ enen; edi edidem inịmke baba owo kiet eke okpokopde ikọ fo.”+  Ndien Absalom ayadian do ete: “Ubaha nte ẹkpemekde mi ebiereikpe ke isọn̄ emi+ man kpukpru owo eke ẹnyenede ikọ ẹkpedi ẹbịne mi! N̄kpekpe ikọ mmọ nte enende.”+  Ndien ke adan̄aemi owo asan̄ade ekpere ndinụhọ nnọ enye, enye ayanyan ubọk omụm+ owo oro onyụn̄ etịm enye inua.  Absalom osụk anam ntem ye kpukpru nditọ Israel eke ẹdide ikpe ke ọtọ edidem; ntem ke Absalom edep esịt nditọ Israel.+  Edikem ke utịt isua aba, Absalom ọdọhọ edidem ete: “Mbọk, yak n̄ka Hebron+ n̄kosio akan̄a oro n̄kakan̄ade nnọ Jehovah.+  Koro ami asan̄autom fo n̄kakan̄ade akan̄a+ ke ini n̄kodude ke Geshur+ ke Syria nte, ‘Edieke Jehovah edidade mi afiak edi Jerusalem, ami n̄ko nyanam n̄kpọ Jehovah.’”+  Ntre edidem ọdọhọ enye ete: “Ka ke emem.”+ Ntem enye adaha aka Hebron. 10  Ekem Absalom ọdọn̄ mbon uyep+ ete ẹsan̄a ke kpukpru esien Israel ẹkedọhọ ẹte: “Ke ndondo oro mbufo ẹkopde uyom nnụk, mbufo ẹdọhọ ẹte, ‘Absalom amakabade edi edidem+ ke Hebron!’”+ 11  Ndien ẹkot owo ikie iba ẹto Jerusalem ẹsan̄a ye Absalom, mmọ ẹdaha ẹtiene inyụn̄ ifiọkke baba n̄kpọ kiet.+ 12  Edikem ke Absalom ama akawa uwa, enye ọdọn̄ ẹkekot Ahithophel+ owo Giloh,+ ọnọitem David,+ ke Giloh obio esie.+ Ndien odu+ oro ẹkedụkde ọdọdiọn̄ ọsọn̄ ubọk, mbon oro ẹdude ye Absalom ẹnyụn̄ ẹdọdiọn̄ ẹwak.+ 13  Ekem mbia edi edisian David ete: “Esịt+ nditọ Israel amakabade etiene Absalom.” 14  Inikiet inikiet, David ọdọhọ kpukpru mme asan̄autom oro ẹdude ye enye ke Jerusalem ete: “Mbufo ẹdaha ke enyọn̄, man nnyịn ifen̄e;+ koro nnyịn mîdikemeke ndibọhọ Absalom! Mbufo ẹnam wap, mbak enye ediwara edisịm nnyịn onyụn̄ anam nnyịn idiọk onyụn̄ osobo obio emi ke iso akan̄kan̄!”+ 15  Ntem mme asan̄autom edidem ẹbọrọ edidem ẹte: “Se nnyịn mme asan̄autom fo mi ndinam kpukpru se ọbọn̄ nnyịn edidem ọdọhọde.”+ 16  Ntre edidem ọwọrọ, ofụri mbonufọk esie ẹnyụn̄ ẹtiene enye,+ edidem onyụn̄ ọkpọn̄ iban duop, kpa ibanesa,+ ete ẹkpeme ufọk. 17  Edidem onyụn̄ asan̄a ye kpukpru mbonufọk esie ọwọrọ; ndien mmọ ẹdituak ẹda ke Beth-merhak. 18  Ndien kpukpru mme asan̄autom edidem ẹsan̄a enye ke n̄kan̄ ẹbe; kpukpru mme Cherethite ye kpukpru mme Pelethite+ ye kpukpru mbon Gath,+ kpa owo ikie itiokiet oro ẹketienede enye ọtọn̄ọde ke Gath,+ ẹsan̄a ẹbe ke iso edidem. 19  Ekem edidem ọdọhọ Ittai+ owo Gath ete: “Ntak emi afo ekpetienede nnyịn? Fiak edem+ kodụn̄ ye edidem; koro afo edide owo esenidụt, okonyụn̄ oto edem mbufo edi ntan̄mfep mi. 20  N̄kpọn̄ ke afo ekedi, nte ọfọn ndinam fi etiene nnyịn mfịn oyo,+ aka ebiet ekededi eke ami n̄kade? Fiak kada nditọete fo nyọn̄, ndien Jehovah akpakam owụt fi ima-mfọnido+ onyụn̄ ọnọ fi ibetedem!”+ 21  Edi Ittai ọbọrọ edidem ete: “Ma uwem Jehovah, ma uwem ọbọn̄ mi edidem,+ ebiet ekededi emi ọbọn̄ mi edidem edidude, edide n̄kpa m̀mê uwem, kpa do ke asan̄autom fo edinyụn̄ odu!”+ 22  Ndien David ọdọhọ Ittai+ ete: “San̄a be.” Ntre Ittai owo Gath asan̄a ebe, ndien kpukpru ikọt esie ye kpukpru nditọwọn̄ oro ẹdude ye enye ẹnyụn̄ ẹsan̄a ẹbe. 23  Ndien kpukpru mbio obio oro ẹtua ọkpọsọn̄ eyet,+ kpukpru owo ẹnyụn̄ ẹsan̄a ẹbe, edidem ada ke itịghede mmọn̄ Kidron,+ kpukpru owo ẹnyụn̄ ẹsan̄a ke usụn̄ ẹbe ẹdụk wilderness. 24  Ndien Zadok+ odu do n̄ko ye enye ye kpukpru nditọ Levi+ emi ẹbiomde+ ekebe+ ediomi ata Abasi; mmọ ẹnyụn̄ ẹdiọk ekebe ata Abasi ke isọn̄ ẹkpere Abiathar+ tutu kpukpru owo ẹto obio ẹsan̄a ẹbe. 25  Ndien edidem ọdọhọ Zadok ete: “Men ekebe+ ata Abasi fiak nyọn̄ obio.+ Edieke ndikụtde mfọn ke iso Jehovah, enye oyonyụn̄ ada mi afiak edi man ndikụt ekebe oro ye ebietidụn̄ esie.+ 26  Edi edieke enye edidọhọde ete, ‘Nnemke esịt ye afo,’ se mi mi, yak enye anam mi nte ọfọnde enye ke enyịn.”+ 27  Ndien edidem ọdọhọ Zadok oku ete: “Nte afo udịghe okụt-n̄kukụt?+ Fiak nyọn̄ obio ke emem, san̄a ye Ahimaaz eyen fo ye Jonathan+ eyen Abiathar, kpa nditọ mbufo mbiba. 28  Sese, ami nyosụk ndu ke wilderness n̄kpere ebiet ube mmọn̄ tutu mbufo ẹnọ etop ẹsọk mi.”+ 29  Ntem Zadok ye Abiathar ẹmen ekebe ata Abasi ẹfiak ẹnyọn̄ Jerusalem, ẹnyụn̄ ẹkedụn̄ do. 30  Edi David ọdọk usụn̄ Obot Olive,+ asan̄a atua nte ọdọkde aka onyụn̄ ofụhọ n̄kpọ ke ibuot;+ enye inyụn̄ isịneke n̄kpọ ke ukot, ndien kpukpru mbon emi ẹsan̄ade ye enye ẹfụhọ n̄kpọ ke ibuot, ẹsan̄a ẹtua nte mmọ ẹdọkde ẹka.+ 31  Ekem ẹditọt David, ẹte: “Ahithophel esịne ke otu mbon oro ẹdụkde odu+ ye Absalom.”+ Ntem David ọdọhọ ete:+ “O Jehovah,+ mbọk, nam item Ahithophel akabade ndisịme!”+ 32  Edikem ke adan̄aemi David ọdọkde esịm etịn̄e obot oro mme owo ẹsinụhọde ẹnọ Abasi, sese, Hushai+ owo Archite+ ke edi ndisobo ye enye, esịne n̄waha ọfọn̄, ntọn̄ onyụn̄ odu enye ke ibuot.+ 33  Ndien David ọdọhọ enye ete: “Edieke afo asan̄ade ye ami ebe, afo edidi mbiomo ọnọ mi.+ 34  Edi edieke afo afiakde ọnyọn̄ obio ọkọdọhọ Absalom ete, ‘O edidem, ami ndi asan̄autom fo. Ami n̄kesidi asan̄autom ete fo ini oro, edi idahaemi ndi asan̄autom fo,’+ ndien afo ayabiat+ item Ahithophel ọnọ mi. 35  Nte Zadok ye Abiathar mme oku idụhe do ye afo?+ Ndien ama ekem men kpukpru se afo edikopde ke ufọk edidem tịn̄ nọ Zadok ye Abiathar, kpa mme oku.+ 36  Sese! Nditọiren mmọ mbiba, Ahimaaz+ eyen Zadok ye Jonathan+ eyen Abiathar mmọdo ye mmọ; mbufo ẹtịn̄ kpukpru se mbufo ẹkopde ẹnọ mmọ man ẹda ẹditịn̄ ẹnọ mi.” 37  Ntre Hushai ufan+ David odụk edi obio. Ndien Absalom+ odụk edi Jerusalem.

Mme Ikọ Idakisọn̄