Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

2 Samuel 11;1-27

11  Edikem ke isua ama akakabade,+ ke ini ndidem ẹwọn̄ọde ẹka ekọn̄,+ David ọdọn̄ Joab ye mme asan̄autom esie ye ofụri Israel, ete ẹkesobo nditọ Ammon+ ẹnyụn̄ ẹkan Rabbah+ ẹkụk, ke adan̄aemi David odụn̄de ke Jerusalem.  Edikem ke mbubreyo, David adaha ke bed esie asan̄a ke enyọn̄ ufọk+ edidem; ndien enye odoro ke enyọn̄ ufọk oro ada okụt+ n̄wan kiet eyerede mmọn̄, n̄wan emi eye etieti.+  Ndien David ọdọn̄ ẹkebụp ẹban̄a n̄wan emi,+ owo kiet onyụn̄ ọdọhọ ete: “Nte emi idịghe Bath-sheba+ eyen Eliam+ kpa n̄wan Uriah+ owo Hittite?”+  Ekem David ọdọn̄ mme isụn̄utom ẹkeda enye ẹdi.+ Ntre n̄wan emi odụk etiene enye,+ David onyụn̄ enyene ebuana ye enye+ ke ini n̄wan emi anamde idem asana ke ndek+ esie. Ekem n̄wan emi afiak ọnyọn̄ ufọk esie.  Ndien n̄wan emi oyomo. Ntre enye ọdọn̄ ẹkedọhọ David ẹte: “Mmoyomo.”  Ntem David ọdọn̄ ẹkedọhọ Joab ẹte: “Nọ Uriah owo Hittite ẹsọk mi.” Ntre Joab ọnọ Uriah ẹsọk David.  Ke ini Uriah edide ke ọtọ esie, David obụp nte n̄kpọ etiede ye Joab ye nte n̄kpọ etiede ye kpukpru owo, onyụn̄ obụp aban̄a nte ekọn̄ akade iso.  Ekem David ọdọhọ Uriah ete: “Sụhọde ka ufọk fo keyet ukot.”+ Ntem Uriah ọwọrọ ke ufọk edidem, ndien ẹmen ẹnọ mfọnido edidem ẹtiene enye.  Edi Uriah osụhọde ana ye mme asan̄autom ọbọn̄ eken ke inuaotop ufọk edidem, inyụn̄ inyọn̄ke ika ufọk esiemmọ. 10  Ndien ẹketịn̄ ẹnọ David, ẹte: “Uriah ikosụhọkede ika ufọk esiemmọ.” Ntem David ọdọhọ Uriah ete: “Nte idịghe isan̄ ke afo oto edi? Ntak mûsụhọkede uka ufọk fo?” 11  Ndien Uriah ọbọrọ David ete: “Ekebe+ ye Israel ye Judah ẹdu ke mme ataya, ndien ọbọn̄ mi Joab ye mme asan̄autom ọbọn̄+ mi ke ẹnam nna ke an̄wa, ndien nte ndisụhọde n̄ka ufọk mi n̄kadia udia nnyụn̄ n̄n̄wọn̄ n̄kpọ nnyụn̄ nsụhọde nna ye n̄wan mi?+ Ma uwem fo, ma ukpọn̄ fo+ n̄ko, ami ndinamke n̄kpọ emi!” 12  Ndien David ọdọhọ Uriah ete: “Du mi mfịn n̄ko, ndien n̄kpọn̄ nyanam fi ọnyọn̄.” Ntre Uriah odu ke Jerusalem usen oro ye edem usen oro. 13  Ekem David okot enye edidia udia onyụn̄ ọn̄wọn̄ n̄kpọ ke iso esie. Ntre David anam enye akpa mmịn.+ Edi enye ọwọrọ ke mbubreyo okosụhọde ana ke bed ye mme asan̄autom ọbọn̄ esie, inyụn̄ isụhọkede ika ufọk esiemmọ. 14  Edikem ke usenubọk, David ewet leta+ esịn Uriah ke ubọk ete ada ọsọk Joab. 15  Ntre enye ewet ke leta oro ete:+ “Mbufo ẹsịn Uriah ke iso, ke ebiet emi ekọn̄ enen̄erede ọsọn̄,+ ndien mbufo ẹsịk ẹfiak edem ẹkpọn̄ enye man ẹwot enye.”+ 16  Edikem ke adan̄aemi Joab ekpemede obio, enye esịn Uriah ke ebiet emi enye ọfiọkde ke mbon uko ẹdu.+ 17  Ndien ke ini mbio obio oro ẹwọrọde ẹdi ẹdin̄wana ye Joab, ndusụk mme asan̄autom David ẹkpan̄a ndien Uriah owo Hittite akpa n̄ko.+ 18  Ndien Joab ọdọn̄ ẹketịn̄ ofụri ofụri nte ekọn̄ etiede ẹnọ David. 19  Ndien enye owụk isụn̄utom oro, ete: “Ke ndondo oro okụrede nditịn̄ ofụri ofụri nte ekọn̄ etiede nnọ edidem, 20  ama ekem edieke edidem ayatde esịt onyụn̄ ọdọhọde fi ete, ‘Ntak emi mbufo ẹkesan̄ade ẹkpere obio oro ntre ẹken̄wana? Nte mbufo ikọfiọkke ite mmọ ẹyedoro ke ibibene ẹtịgha mbufo? 21  Anie okowot Abimelech+ eyen Jerubbesheth?+ Nte idịghe n̄wan okodoro ke ibibene ayak itiat ukọkn̄kpọ ọtọ+ enye owot ke Thebez?+ Ntak emi mbufo ẹkesan̄ade ẹkpere ibibene ntre?’ afo ọyọdọhọ enye ete, ‘Asan̄autom fo Uriah owo Hittite amakpa n̄ko.’”+ 22  Ntre, isụn̄utom oro aka eketịn̄ kpukpru se Joab ọkọdọn̄de enye ọnọ David. 23  Ndien isụn̄utom oro ọdọhọ David ete: “Iren oro ẹma ẹkop odudu ẹkan nnyịn tutu mmọ ẹwọrọ ẹdin̄wana ye nnyịn ke an̄wa; edi nnyịn ima ifịk mmọ tutu ikesịm nto-ndụk inuaotop obio. 24  Ndien mbon utịgha ẹdoro ke ibibene+ ẹtịgha mme asan̄autom fo, ẹnyụn̄ ẹwot ndusụk mme asan̄autom edidem; ndien asan̄autom fo Uriah owo Hittite akpa n̄ko.”+ 25  Ndien David ọdọhọ isụn̄utom oro ete: “Ntem ke afo edidọhọ Joab, ete, ‘Kûyak n̄kpọ emi ọdiọk fi ke enyịn, koro akan̄kan̄ adiade+ owo kiet ke ekọn̄ kpa nte adiade enye eken. Sọn̄ ubọk n̄wana ye obio oro nyụn̄ wụri enye.’+ Afo nyụn̄ sọn̄ọ enye idem.” 26  Ndien n̄wan Uriah okop ke ebe esie akpa, enye onyụn̄ atua+ andinyene enye.+ 27  Ke ini ntuan̄a+ ama ekebe, David ọsọsọp ọdọn̄ ẹkeda enye ẹdi ufọk esie, enye onyụn̄ akabade edi n̄wan esie.+ Ekem enye aman eyeneren ọnọ enye, edi se David anamde ọdiọk+ Jehovah ke enyịn.+

Mme Ikọ Idakisọn̄