Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

2 Samuel 1;1-27

1  Edikem ke Saul ama akakpa, ke David ama okonyụn̄ ọnyọn̄ ndiwot mbon Amalek,+ David odu ke Ziklag+ usen iba.  Ndien ke ọyọhọ usen ita, sese! eren+ kiet oto udịmekọn̄ Saul edi, esịne ọfọn̄idem emi awahade,+ ntọn̄ onyụn̄ odu enye ke ibuot;+ ndien ke ini enye edide edisịm David, enye ọduọ inikiet inikiet ekịbi iso ke isọn̄.+  Ndien David obụp enye ete: “Afo oto m̀mọ̀n̄ edi?” enye onyụn̄ ọbọrọ ete: “Nto itienna ekọn̄ Israel mbọhọ mfehe ndi.”  Ndien David ọdọhọ enye ete: “N̄kpọ eketie didie? Mbọk, tịn̄ nọ mi.” Ntem enye ọdọhọ ete: “Kpukpru owo ẹmefen̄e ke ekọn̄, ediwak mmọ ẹmeduọn̄ọ ẹkpan̄a,+ Saul+ ye Jonathan+ eyen esie ẹnyụn̄ ẹkpa n̄ko.”  Ntem David obụp akparawa oro etịn̄de n̄kpọ emi ọnọ enye ete: “Afo asan̄a didie ọfiọk ke Saul akpa, ye nte ke Jonathan eyen esie akpa n̄ko?”+  Ndien akparawa emi eketịn̄de n̄kpọ emi ọnọ enye ọbọrọ ete: “N̄kasan̄a ndisịm Obot Gilboa+ ke unana idotenyịn, ndien n̄kụt Saul eberede ke eduat+ esie; ndien, sese! mme awat chariot ye mme awat enan̄-mbakara ke ẹwat ẹdi ndisịm enye.+  Ke ini enye ọwọn̄ọrede enyịn ke edem okụt mi, enye okot mi, ami nnyụn̄ nyere enye nte, ‘Se mi mi!’  Ndien enye obụp mi, ete, ‘Afo edi anie?’ ami nnyụn̄ mbọrọ enye nte, ‘Ami ndi owo Amalek.’+  Ekem enye ọdọhọ ete, ‘Mbọk, san̄a kpere nyụn̄ wot mi, koro isiọn̄ anamde mi, uwem*+ n̄ko ke osụk ododu mi ke idem.’ 10  Ntre mma nsan̄a n̄kpere enye nnyụn̄ n̄wot enye,+ koro mma ndiọn̄ọ ke enye idikemeke ndidu uwem aba ke enye ama ọkọduọ. Ndien mmen anyanya+ oro enye akayarade ke ibuot ye okpoho ubọk oro enye ekesịnede, nte nda nsọk ọbọn̄ mi.” 11  Ntem David awak ọfọn̄idem esie,+ kpukpru mbon oro ẹkedude ye enye ẹnyụn̄ ẹnam kpa ntre. 12  Ndien mmọ ẹseme ẹnyụn̄ ẹtua eyet,+ ẹtre udia+ tutu esịm mbubreyo ẹban̄a Saul ye Jonathan eyen esie, ye ikọt Jehovah ye ufọk Israel,+ koro mmọ ẹkeduọn̄ọde ke iso akan̄kan̄. 13  Ekem David obụp akparawa oro eketịn̄de n̄kpọ emi ọnọ enye ete: “Afo oto m̀mọ̀n̄?” ndien enye ọbọrọ ete: “Ami ndi eyen owo Amalek,+ emi edide esenowo.” 14  Ndien David obụp enye ete: “Nso inam afo mûkufeheke ndịk+ ndinyan ubọk fo n̄wot enye emi Jehovah eyetde aran?”+ 15  Ntre David okot akparawa kiet onyụn̄ ọdọhọ enye ete: “San̄a kpere enye. Wot enye.” Ntre enye owot enye.+ 16  Ekem David ọdọhọ enye ete: “Yak iyịp fo ọkọbọ fi,+ koro afo adade inua fo etie ntiense aban̄a idemfo,+ ete, ‘Ami n̄kowot enye emi Jehovah eyetde aran.’”+ 17  Ndien David ọkwọ ikwọ mfụhọ+ emi aban̄a Saul ye Jonathan eyen esie+ 18  onyụn̄ ọdọhọ ete ẹkpep nditọ Judah+ “Ikwọ Utịgha.”+ Sese! Ẹwet ikwọ emi ẹsịn ke n̄wed Jashar,+ ẹte: 19  “O Israel, ẹmewot uyai fo ke mme edikon̄ ebiet fo.+ Sese nte n̄kpọsọn̄ owo ẹduọn̄ọde! 20  Mbufo ẹkûtịn̄ n̄kpọ emi ke Gath;+ Ẹkûtan̄a n̄kpọ emi ke mme efak Ashkelon,+ Mbak nditọiban Philistia ẹdidara, Mbak nditọiban mbon edụt ẹdinem esịt.+ 21  Mbufo mme obot Gilboa,+ yak mbara m̀mê edịm okûdep ọduọhọ mbufo, yak in̄wan̄ edisana etịbe+ okûnyụn̄ on̄wụm mfri; Koro ke ọtọ emi ke ẹkesabade otuekọn̄ n̄kpọsọn̄ owo, Ẹsabade otuekọn̄ Saul, tutu enye emi ẹyetde aran+ idụhe aba. 22  Utịgha Jonathan iketreke ndiduọk iyịp+ mme asua nnyụn̄ n̄wot mmọ, Ikonyụn̄ itreke nditịgha ikpọn̄ n̄kpọsọn̄ owo nsịbe, Akan̄kan̄ Saul ikonyụn̄ ifiakke ubọk ubọk.+ 23  Saul ye Jonathan,+ mbon emi mme owo ẹkemade ẹkenyụn̄ ẹnemde itie ke eyouwem mmọ, Mmọ ikonyụn̄ idian̄akede ikpọn̄ kiet eken ke n̄kpa.+ Mmọ ẹma ẹsọp usọp ẹkan ntrukpom,+ Ẹnyụn̄ ẹkop odudu ẹkan ekpe.+ 24  Mbufo nditọiban Israel, ẹtua Saul, Emi ekesịnede mbufo ididuot ọfọn̄ emi ẹbanade, Emi akadiande n̄kpọmbana gold ke edisịnen̄kpọ mbufo.+ 25  Sese nte n̄kpọsọn̄ owo ẹduọn̄ọde ke ekọn̄!+ Ẹmewot Jonathan ke mme edikon̄ ebiet fo!+ 26  Mmofụhọ fi, Jonathan eyenete mi, Afo ama enem mi esịt etieti.+ Ima oro afo akamade mi akan ima iban.+ 27  Sese nte n̄kpọsọn̄ owo ẹduọn̄ọde,+ Ye nte n̄kpọekọn̄ ẹnyụn̄ ẹtakde!”

Mme Ikọ Idakisọn̄

M̀mê, “ukpọn̄.”