Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

2 Ndidem 8;1-29

8  Ndien Elisha ọdọhọ n̄wan oro enye akanamde eyen esie eset ke n̄kpa,+ ete: “Daha ke enyọn̄, afo ye mbonufọk fo, ka kodụn̄ nte esenowo ke ebiet ekededi eke afo edikemede ndidụn̄;+ koro Jehovah owụkde ete akan̄+ odu, ndien enye oyodu isua itiaba+ ke isọn̄.”  Ntre n̄wan oro adaha ke enyọn̄ ke uyo owo ata Abasi oro, enye ye mbonufọk+ esie, aka+ okodụn̄ nte esenowo ke isọn̄ Philistia+ ke isua itiaba.  Edikem ke utịt isua itiaba, n̄wan oro oto Philistia ọnyọn̄ edi, ndien aka ekeseme ọnọ edidem+ oyom ufọk esie ye in̄wan̄ esie.  Ndien edidem eneme nneme ye Gehazi+ asan̄autom owo ata Abasi onyụn̄ ọdọhọ ete: “Mbọk, bụk ise kpukpru ikpọ n̄kpọ oro Elisha anamde nọ mi.”+  Edikem nte enye obụkde ọnọ edidem aban̄a nte enye akanamde owo eset,+ sese, n̄wan oro enye akanamde eyen esie eset mi ke eseme ọnọ edidem oyom ufọk esie ye in̄wan̄+ esie. Ke ndondo oro Gehazi ọdọhọ ete: “Ọbọn̄ mi+ edidem, n̄wan oro edi emi, eyen esie oro Elisha akanamde eset onyụn̄ edi emi.”  Ndien edidem obụp n̄wan oro, enye onyụn̄ obụk mbụk oro ọnọ edidem.+ Ntem edidem ọnọ enye adaidaha okụre+ kiet, onyụn̄ ọdọhọ ete: “Fiak yak kpukpru se inyenede enye ye kpukpru mbun̄wụm in̄wan̄ esie nọ enye ọtọn̄ọde ke usen oro enye ọkọkpọn̄de idụt emi tutu esịm emi.”+  Ndien Elisha adaha aka Damascus;+ Ben-hadad+ edidem Syria onyụn̄ ọduọ udọn̄ọ. Ekem ẹdisian enye ẹte: “Owo ata Abasi+ oro edi edisịm mi.”  Ndien edidem ọdọhọ Hazael+ ete: “Da enọ+ kama ke ubọk ka kosobo ye owo ata Abasi oro, nyụn̄ bụp+ enye uyo Jehovah, ete, ‘Nte udọn̄ọ emi oyokụre mi?’”  Ntre Hazael adaha aka ndisobo ye enye onyụn̄ ada enọ akama ke ubọk, kpa kpukpru orụk nti n̄kpọ Damascus emi camel aba ẹbiomde, ndien edi edida enye ke iso onyụn̄ ọdọhọ ete: “Eyen fo+ Ben-hadad, kpa edidem Syria ọdọn̄ mi utom ọnọ fi, ete, ‘Nte udọn̄ọ emi oyokụre mi?’” 10  Ndien Elisha ọbọrọ enye ete: “Ka, kọdọhọ enye ete, ‘Udọn̄ọ fo iditreke ndikụre,’ edi Jehovah omowụt mi+ ete ke enye iditreke ndikpa.”+ 11  Ndien enye owụk enyịn ese enye tutu bụt anam enye. Owo ata Abasi oro onyụn̄ osio eyet atua.+ 12  Mmọdo Hazael obụp ete: “Ntak emi ọbọn̄ mi atuade?” Ndien enye ọbọrọ ete: “Koro mmetịm mfiọk idiọk+ emi afo edinamde nditọ Israel. Afo eyekịm ikan̄ ke mme ebiet ukpeme onyụn̄ owot ata nti irenowo mmọ ke akan̄kan̄, okpok nditọwọn̄ mmọ n̄ken̄e n̄ken̄e,+ onyụn̄ ekịm iban idịbi mmọ idịbi asiak.”+ 13  Ndien Hazael ọdọhọ ete: “Asan̄autom fo, emi edide ebua,+ edikeme didie ndinam utọ akwa n̄kpọ emi?” Edi Elisha ọdọhọ enye ete: “Jehovah omowụt mi ke afo edidi edidem Syria.”+ 14  Ekem enye adaha ọkpọn̄ Elisha ọnyọn̄ etiene ọbọn̄ esie, ọbọn̄ esie onyụn̄ obụp enye ete: “Elisha ọdọhọ fi didie?” Enye ọbọrọ ete: “Enye ọdọhọ mi ete, ‘Udọn̄ọ fo iditreke ndikụre.’”+ 15  Edikem ke ndan̄nsiere enye ada ọfọn̄ enyịni ke mmọn̄ onyụn̄ atat ofụk enye ke iso,+ ntre enye akpa.+ Ndien Hazael+ ọtọn̄ọ ndikara ke itie esie. 16  Ndien ke ọyọhọ isua ition emi Jehoram+ eyen Ahab edidem Israel akarade, ke adan̄aemi Jehoshaphat edide edidem ke Judah, Jehoram+ eyen Jehoshaphat edidem Judah, akabade edi edidem. 17  Enye ekedi isua edịp ye duopeba ke ini enye akakabarede edi edidem, enye onyụn̄ akara isua itiaita ke Jerusalem.+ 18  Ndien enye asan̄a ke usụn̄ ndidem Israel,+ kpa nte mbonufọk Ahab ẹkesan̄ade;+ koro eyen Ahab ekedide n̄wan esie,+ enye onyụn̄ aka iso anam se idiọkde ke enyịn Jehovah. 19  Edi Jehovah ikoyomke ndisobo Judah+ ke ntak David asan̄autom esie,+ kpa nte enye ọkọn̄wọn̄ọde ndinọ enye ye nditọ esie utuenikan̄+ kpukpru ini. 20  Ke eyo esie ke Edom+ ẹkesọn̄ ibuot ẹwọn̄ọ ke idak ukara Judah, ndien ekem ẹnịm edidem+ ẹte akara mmimọ. 21  Ndien Jehoram ebe aka Zair, n̄ko kpukpru chariot ẹsan̄a ye enye. Ndien enye adaha ada ke okoneyo owot mbon Edom oro ẹkekande enye ẹkụk ye mme etubom mme chariot; ndien mmọ ẹfen̄e ẹnyọn̄ọ mme tent mmọ. 22  Edi Edom ẹsọn̄ ibuot ẹwọn̄ọ ke idak ukara Judah tutu esịm mfịn emi. Adan̄aoro ke Libnah+ ọkọtọn̄ọ ndisọn̄ ibuot. 23  Ndien amaedi mme n̄kpọ efen emi ẹban̄ade Jehoram ye kpukpru se enye akanamde, nte owo iwetke mmọ isịn ke n̄wed+ n̄kpọntịbe eyo ndidem Judah? 24  Ekem Jehoram osụhọde ana ye mme ete ete esie+ ẹnyụn̄ ẹbụk enye ye mme ete ete esie ke Obio David.+ Ndien Ahaziah+ eyen esie ọtọn̄ọ ndikara ke itie esie. 25  Ke ọyọhọ isua duopeba emi Jehoram eyen Ahab edidem Israel akarade, Ahaziah eyen Jehoram kpa edidem Judah akabade edi edidem.+ 26  Ahaziah ekedi isua edịp ye iba ke ini enye ọtọn̄ọde ndikara, enye onyụn̄ akara isua kiet ke Jerusalem.+ Ndien eka esie ekekere Athaliah,+ okonyụn̄ edi eyeyen Omri+ edidem Israel. 27  Ndien enye asan̄a ke usụn̄ mbonufọk Ahab+ onyụn̄ anam se idiọkde ke enyịn Jehovah,+ kpa nte mbonufọk Ahab, koro enye ekedide ukot ke ufọk Ahab.+ 28  Ndien enye asan̄a ye Jehoram eyen Ahab aka ekọn̄ ye Hazael+ edidem Syria ke Ramoth-gilead,+ mbon Syria ẹnyụn̄ ẹnọ Jehoram unan.+ 29  Ntre edidem Jehoram+ afiak ọnyọn̄ Jezreel+ man ẹkekọk unan oro mbon Syria ẹkenọde enye ke Ramah ke ini enye akan̄wanade ye Hazael edidem Syria. Ndien Ahaziah+ eyen Jehoram edidem Judah osụhọde aka ndise Jehoram eyen Ahab ke Jezreel koro enye ọkọdọn̄ọde.

Mme Ikọ Idakisọn̄