Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

2 Ndidem 25;1-30

25  Edikem ke ọyọhọ isua usụkkiet+ emi enye akarade nte edidem, ke ọyọhọ ọfiọn̄ duop, ke ọyọhọ usen duop+ ke ọfiọn̄ oro, Nebuchadnezzar+ edidem Babylon edi,+ enye ye ofụri udịmekọn̄ esie ẹdi ekọn̄ ye Jerusalem ẹnyụn̄ ẹdinam nna ẹkan enye ẹkụk ẹnyụn̄ ẹbọp ibibene ẹkanade enye.+  Ndien ẹkan obio oro ẹkụk tutu esịm ọyọhọ isua duopekiet emi Edidem Zedekiah akarade.  Ke ọyọhọ usen usụkkiet+ ke ọyọhọ ọfiọn̄ inan̄, akan̄+ ọsọn̄ ubọk etieti ke obio, udia+ inyụn̄ idụhe inọ mbio obio.  Ekem ẹsiak+ ibibene obio oro, kpukpru mbonekọn̄ ẹnyụn̄ ẹfen̄e ke okoneyo ẹsan̄a usụn̄ inuaotop emi odude ke ufọt ibibene iba oro ẹkperede in̄wan̄esa edidem,+ ke adan̄aemi mbon Chaldea+ ẹkande obio ẹkụk; ndien edidem efehe+ odụk usụn̄ Arabah.+  Ndien udịmekọn̄ mbon Chaldea+ ẹbịne edidem, ẹnyụn̄ ẹkesịm enye+ ke unaisọn̄ desat Jericho;+ ndien ofụri udịmekọn̄ esie ẹsuana ẹkpọn̄ enye.  Ekem mmọ ẹmụm edidem,+ ẹnyụn̄ ẹmen enye ẹdọk ẹsọk edidem Babylon ke Riblah,+ man ẹkebiere ikpe ẹnọ enye.  Ndien mmọ ẹwot nditọiren Zedekiah ke iso esie,+ enye onyụn̄ etịbi Zedekiah enyịn,+ ekem ọkọbi enye ukot ke ebuka okpoho+ onyụn̄ ada enye edi Babylon.+  Ndien ke ọyọhọ ọfiọn̄ ition, ke ọyọhọ usen itiaba ke ọfiọn̄ oro, oro edi, ke ọyọhọ isua efịtenan̄+ emi Edidem Nebuchadnezzar, edidem Babylon akarade, Nebuzaradan+ etubom mbon ukpeme, kpa asan̄autom edidem Babylon, edi Jerusalem.+  Ndien enye ọfọp ufọk Jehovah+ ye ufọk edidem+ ye kpukpru ufọk ke Jerusalem;+ enye onyụn̄ ọfọp ufọk kpukpru ikpọ owo ke ikan̄.+ 10  Ndien ofụri udịmekọn̄ mbon Chaldea emi ẹdude ye etubom mbon ukpeme ẹwụri+ ibibene Jerusalem ẹkanade ẹkụk. 11  Ndien Nebuzaradan etubom mbon ukpeme atan̄ mbon eken+ emi ẹkekpọn̄de ke obio ye mbon emi ẹkewọn̄ọde ẹtiene edidem Babylon ye otu owo eken, aka ntan̄mfep.+ 12  Ndien etubom mbon ukpeme ayak ndusụk mme usụhọde owo+ ke isọn̄ oro ẹsụhọ nte mme ọdiọn̄ vine ye mbon emi ẹnyịkde ẹnam ọkpọsọn̄ utom.+ 13  Ndien mbon Chaldea ẹbom mme adaha+ okpoho oro ẹdude ke ufọk Jehovah ye mme ukpatn̄kpọ+ ye n̄kpọ udọn̄ mmọn̄ okpoho*+ n̄ken̄e n̄ken̄e, ẹnyụn̄ ẹtan̄ mme okpoho emi ẹnyọn̄ọ Babylon.+ 14  Mmọ ẹnyụn̄ ẹtan̄ mme eso ye mme udọk usio ntọn̄ ye mme n̄kpọ unịme ikan̄ ye mme cup ye kpukpru n̄kpoduoho+ okpoho emi ẹkesidade ẹnam n̄kpọ, ẹnyọn̄ọ. 15  Ndien etubom mbon ukpeme atan̄ mme n̄kpọ ufọp incense ye mme usan emi ẹkedade ata gold+ ẹnam ye mbon oro ẹkenyụn̄ ẹdade ata silver+ ẹnam. 16  Amaedi adaha mbiba oro, ye n̄kpọ udọn̄ mmọn̄ kiet ye mme ukpatn̄kpọ oro Solomon akanamde ọnọ ufọk Jehovah, usụn̄ ikodụhe ndidiọn̄ọ udomo okpoho kpukpru n̄kpoduoho emi.+ 17  Adaha kiet kiet okokon̄ cubit efịteta,+ ndien ẹkeda okpoho ẹnam ibuot+ oro ẹkewụkde ke enyọn̄ adaha emi; ndien ibuot oro okokon̄ cubit ita; ndien ẹkeda okpoho ẹnam iyịre iyịre ndudiọn̄ ye pomegranate+ oro ẹkenamde ẹkanade ibuot oro; ndien ọyọhọ adaha iba ama onyụn̄ enyene mme ukem n̄kpọ emi ke enyọn̄ iyịre iyịre ndudiọn̄. 18  Ekem etubom mbon ukpeme ada Seraiah+ ọbọn̄ oku ye Zephaniah+ udiana oku ye owo ita emi ẹdide mme ekpeme-usụn̄;+ 19  enye onyụn̄ ada adaidaha okụre kiet ke obio, emi edide etubom mbonekọn̄, ye irenowo ition ke otu mbon emi ẹsikụtde iso edidem, emi ẹkedude ke obio; ye ewetn̄wed etubom udịmekọn̄, emi esitịmde mbio obio idem ọnọ ekọn̄, ye owo ata ke otu mbio obio oro, emi ẹkekụtde ke esịt obio;+ 20  ndien Nebuzaradan+ etubom mbon ukpeme atan̄ mmọ+ onyụn̄ ada mmọ ọsọk edidem Babylon ke Riblah.+ 21  Ndien edidem Babylon ọtọ mmọ ọduọk ke isọn̄ onyụn̄ owot+ mmọ ke Riblah ke isọn̄ Hamath.+ Ntem ke Judah ọkpọn̄ isọn̄ esie aka ntan̄mfep.+ 22  Amaedi mbon emi+ ẹkekpọn̄de ke Judah, kpa mbon emi Nebuchadnezzar edidem Babylon ọkọkpọn̄de, enye emek Gedaliah+ eyen Ahikam+ eyen Shaphan+ ete edi etubom mmọ. 23  Ke ini kpukpru mme etubom udịmekọn̄,+ mmọ ye ikọt mmọ, ẹkopde ke edidem Babylon ama emek Gedaliah enịm ke etubom, mmọ ẹsọsọp ẹdi ẹbịne Gedaliah ke Mizpah,+ oro edi, Ishmael eyen Nethaniah ye Johanan eyen Kareah ye Seraiah eyen Tanhumeth kpa owo Netophah ye Jaazaniah owo Maacath, mmọ ye ikọt mmọ. 24  Ndien Gedaliah ọn̄wọn̄ọ+ ọnọ mmọ ye ikọt mmọ ete: “Mbufo ẹkûkop ndịk ndidi mme asan̄autom mbon Chaldea. Ẹdụn̄ ke isọn̄ emi ẹnyụn̄ ẹnam n̄kpọ ẹnọ edidem Babylon, ndien ọyọfọn ye mbufo.”+ 25  Edikem ke ọyọhọ ọfiọn̄ itiaba,+ Ishmael+ eyen Nethaniah eyen Elishama emi otode ubon edidem, edi, owo duop ẹnyụn̄ ẹsan̄a ye enye, ndien mmọ ẹkịm Gedaliah+ ẹwot, ẹnyụn̄ ẹwot mme Jew ye mbon Chaldea emi ẹdude ye enye ke Mizpah.+ 26  Ekem kpukpru owo, n̄kpri ye ikpọ, ye mme etubom udịmekọn̄ ẹdaha ẹdi Egypt;+ koro ndịk mbon Chaldea anamde mmọ.+ 27  Edikem ke ọyọhọ isua edịp ye efịteba tọn̄ọ nte ẹkemen Jehoiachin+ edidem Judah ẹka ntan̄mfep, ke ọyọhọ ọfiọn̄ duopeba, ke ọyọhọ usen edịp ye itiaba ke ọfiọn̄ oro, Evil-merodach+ edidem Babylon, ke isua emi enye akabarede edi edidem, emenede ibuot+ Jehoiachin edidem Judah ke enyọn̄ onyụn̄ osio enye ke ufọk n̄kọbi-ntem; 28  enye onyụn̄ etịn̄ nti ikọ ye enye, ndien ekem anam ebekpo esie okon̄ akan mme ebekpo ndidem oro ẹkedude ye enye ke Babylon.+ 29  Ndien enye osion̄o enye ọfọn̄ ufọk-n̄kpọkọbi;+ enye onyụn̄ adia udia+ kpukpru ini ke iso esie ke ofụri eyouwem esie. 30  Amaedi udeme udia esie,+ edidem ekesinọ enye udeme udia esie kpukpru ini, kpa se ikemde ke usen ke usen, ke ofụri eyouwem esie.

Mme Ikọ Idakisọn̄

At. Ed., “inyan̄ okpoho.”