Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

2 Ndidem 24;1-20

24  Ke eyo esie Nebuchadnezzar+ edidem Babylon ọdọk edi, ndien Jehoiakim akabade edi asan̄autom esie+ ke isua ita. Ekem enye ọsọn̄ ibuot ye enye.  Ndien Jehovah ọdọn̄ otu mbon n̄wo Chaldea+ ye otu mbon n̄wo Syria ye otu mbon n̄wo Moab+ ye otu mbon n̄wo nditọ Ammon ete ẹken̄wana ye enye, enye ọdọn̄ mmọ ete ẹken̄wana ye Judah ẹnyụn̄ ẹsobo enye, nte ekemde ye se Jehovah eketịn̄de+ ebe ke mme asan̄autom esie mme prọfet.  Emi eketịbe ọnọ Judah ke uyo Jehovah emi ọkọdọhọde ke iyemen enye ifep+ ke iso imọ ke ntak mme idiọkn̄kpọ Manasseh,+ man ekem ye kpukpru se enye akanamde;  ndien n̄ko ke ntak iyịp mmọ eke mîduehe+ emi enye ọkọduọkde, tutu enye ọyọhọ Jerusalem ye iyịp mbon oro mîduehe, Jehovah inyụn̄ inyịmeke ndifen nnọ enye.+  Amaedi mme n̄kpọ efen emi ẹban̄ade Jehoiakim+ ye kpukpru se enye akanamde, nte owo iwetke mmọ isịn ke n̄wed+ n̄kpọntịbe eyo ndidem Judah?  Ekem Jehoiakim osụhọde ana ye mme ete ete esie,+ ndien Jehoiachin eyen esie akara ke itie esie.  Ndien edidem Egypt ikọtọn̄ọke aba ntak+ ito isọn̄ esie idi,+ koro edidem Babylon akatan̄de kpukpru se inyenede edidem Egypt+ ọtọn̄ọde ke itịghede mmọn̄+ Egypt tutu esịm Akpa Euphrates.+  Jehoiachin+ ekedi isua efịteta ke ini enye ọtọn̄ọde ndikara, enye onyụn̄ akara ọfiọn̄ ita ke Jerusalem.+ Ndien eka esie ekekere Nehushta eyen Elnathan emi okotode Jerusalem.  Ndien enye aka iso anam se idiọkde ke enyịn Jehovah, nte ekemde ye kpukpru se ete esie akanamde.+ 10  Ke ini oro, ikọt Nebuchadnezzar edidem Babylon ẹdọk ẹdi Jerusalem ẹdikan obio ẹkụk.+ 11  Ndien Nebuchadnezzar edidem Babylon ọdọk edin̄wana ye obio emi, ke adan̄aemi ikọt esie ẹkande enye ẹkụk.+ 12  Ekem Jehoiachin edidem Judah ọwọrọ etiene edidem Babylon,+ enye ye eka esie+ ye ikọt esie ye mbọn̄ esie ye mme adaidaha okụre esie; ndien edidem Babylon ada enye ọnyọn̄ ke ọyọhọ isua itiaita+ emi enye edide edidem. 13  Ekem enye osion̄o kpukpru n̄kpọuto ke ufọk Jehovah ye n̄kpọuto ufọk edidem,+ ye kpukpru n̄kpoduoho gold+ emi Solomon edidem Israel akanamde ke temple Jehovah, okpok mbai mbai, kpa nte Jehovah eketịn̄de. 14  Enye onyụn̄ atan̄ ofụri Jerusalem ye kpukpru mbọn̄+ ye kpukpru n̄kpọsọn̄+ owo—owo tọsịn duop aka ntan̄mfep+—ọkọrọ ye kpukpru mme anamutom usọ+ ye mme andibọp ibibene ukpeme. Owo baba kiet ikosụhọke ke mîbọhọke mme usụhọde owo+ ke obio. 15  Ntre ke enye ada Jehoiachin+ aka ntan̄mfep ke Babylon;+ enye onyụn̄ ada eka edidem+ ye iban edidem ye mme adaidaha okụre+ edidem ye ikpọ owo obio oro oto Jerusalem aka ntan̄mfep ke Babylon. 16  Amaedi kpukpru iren uko, owo tọsịn itiaba, ye mme anamutom usọ ye mme andibọp ibibene ukpeme, owo tọsịn kiet, kpukpru n̄kpọsọn̄ owo ke ekọn̄, edidem Babylon atan̄ mmọ aka ntan̄mfep ke Babylon.+ 17  Ekem, edidem Babylon+ anam Mattaniah eyeneka ete esie+ edi edidem ke itie esie. Enye onyụn̄ okpụhọ enye enyịn̄ okot Zedekiah.+ 18  Zedekiah+ ekedi isua edịp ye kiet ke ini enye ọtọn̄ọde ndikara, enye onyụn̄ akara isua duopekiet ke Jerusalem. Ndien eka esie ekekere Hamutal+ eyen Jeremiah emi okotode Libnah. 19  Ndien enye aka iso anam se idiọkde ke enyịn Jehovah, nte ekemde ye kpukpru se Jehoiakim akanamde.+ 20  Eketịbe ntem ke Jerusalem ye ke Judah koro Jehovah akayatde esịt+ tutu enye emen mmọ efep ke iso esie.+ Ekem Zedekiah ọsọn̄ ibuot ye edidem Babylon.+

Mme Ikọ Idakisọn̄