Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

2 Ndidem 23;1-37

23  Ndien edidem ọdọn̄ mmọ ẹkekot kpukpru mbiowo Judah ye Jerusalem ẹdisop idem ke ọtọ imọ.+  Ekem edidem ọdọk aka ufọk Jehovah, ndien kpukpru mbon Judah ye kpukpru mme andidụn̄ Jerusalem ẹnyụn̄ ẹsan̄a ye enye, ọkọrọ ye mme oku+ ye mme prọfet ye kpukpru mbio obio, ọtọn̄ọde ke ekpri tutu esịm akamba;+ ndien enye okot+ kpukpru ikọ n̄wed+ ediomi+ oro ẹkekụtde ke ufọk Jehovah+ ọnọ mmọ.  Ndien edidem ada ekpere adaha+ onyụn̄ anam ediomi+ ke iso Jehovah, nditiene+ Jehovah nnyụn̄ nnịm mme ibet+ esie ye ikọ ntiense+ esie ye mme ewụhọ+ esie ke ofụri esịt+ ye ke ofụri ukpọn̄+ ke ndinam mme ikọ ediomi oro ẹwetde ke n̄wed emi.+ Ntem kpukpru owo ẹnyịme ediomi emi.+  Ndien edidem ọnọ uyo ete Hilkiah+ akwa oku ye mme nsan̄a oku ye mme ekpeme-usụn̄+ ẹsion̄o n̄kpoduoho oro ẹkenamde ẹnọ Baal+ ye eto utuakibuot+ ye ofụri udịm enyọn̄+ ẹfep ke temple Jehovah. Ndien enye ọfọp mmọ ke edem Jerusalem ke in̄wan̄ Kidron,+ onyụn̄ ada ntọn̄ mmọ edi Bethel.+  Ndien enye ebịn mme oku isen abasi efep, emi ndidem Judah ẹkenịmde ẹte ẹfọp incense ke mme edikon̄ ebiet ke mme obio Judah ye ke n̄kann̄kụk Jerusalem, ọkọrọ ye mbon oro ẹnamde nsụn̄ikan̄ uwa ọwọrọ ọdọk ọnọ Baal,+ ye utịn ye ọfiọn̄ ye otu ntantaọfiọn̄ ke ikpaenyọn̄ ye ofụri udịm enyọn̄.+  N̄ko-n̄ko, enye osio eto utuakibuot+ ke ufọk Jehovah edi itịghede mmọn̄ Kidron ke edem Jerusalem, edifọp enye+ ke itịghede mmọn̄ Kidron oro onyụn̄ ọkọk enye tutu akabade ntọn̄ ndien emen ntọn̄ esie ọkọduọk ke udi+ nditọ obio.  N̄ko-n̄ko, enye owụri mme ufọk iren akpara temple+ oro ẹkedude ke ufọk Jehovah, emi iban ẹkesidọkde tent ẹnọ eto utuakibuot.  Ekem enye ada kpukpru mme oku ke obio Judah edi, man anam mme edikon̄ ebiet ẹkûdot ndida ntuak ibuot, kpa mme edikon̄ ebiet emi mme oku ẹkesinamde nsụn̄ikan̄ uwa ọwọrọ ọdọk, ọtọn̄ọde ke Geba+ tutu esịm Beer-sheba;+ enye onyụn̄ owụri mme edikon̄ ebiet inuaotop emi ẹkedude ke nto-ndụk inuaotop Joshua etubom obio oro, emi okodude ke n̄kan̄ ufien ke adan̄aemi owo otode inuaotop obio odụk.  N̄kukụre edi nte ke mme oku+ edikon̄ ebiet ikọdọkke ika itieuwa Jehovah emi odude ke Jerusalem, edi mmọ ẹma ẹta uyo emi leaven mîdụhe+ ke otu nditọete mmọ. 10  Ndien enye anam Topheth,+ emi odude ke itịghede nditọ Hinnom,+ okûdot ndida ntuak ibuot, man baba owo kiet okûfọp eyen esie eren m̀mê eyen esie an̄wan ke ikan̄*+ ọnọ Molech.+ 11  N̄ko-n̄ko, enye anam mme enan̄-mbakara oro ndidem Judah ẹkeyakde ẹnọ utịn ẹkûto ubet udia+ Nathan-melech, kpa adaidaha okụre emi okodude ke ọkọm etehe, ẹbe ẹdụk ufọk Jehovah; ndien enye ọfọp mme chariot utịn+ oro ke ikan̄. 12  Ndien edidem owụri mme itieuwa emi ẹkedude ke ubet enyọn̄ ufọk+ Ahaz oro ndidem Judah ẹkebọpde, ye mme itieuwa+ oro Manasseh akanamde ke okụre mbiba ke ufọk Jehovah, ekem enye anuak mmọ do onyụn̄ emen ntọn̄ mmọ ọkọduọk ke itịghede mmọn̄ Kidron. 13  Edidem onyụn̄ anam mme edikon̄ ebiet oro ẹkedude ke iso+ Jerusalem, ke n̄kan̄ nnasia Obot Nsobo, oro Solomon+ edidem Israel ọkọbọpde ọnọ Ashtoreth+ kpa mbubiam n̄kpọ mbon Sidon ye Chemosh+ kpa mbubiam n̄kpọ Moab ye Milcom+ kpa mbubiam n̄kpọ nditọ Ammon, ẹkûdot ndida ntuak ibuot. 14  Ndien enye obom+ mme adaha utuakibuot n̄ken̄e n̄ken̄e onyụn̄ okpok mme eto utuakibuot ọduọn̄ọ ndien atan̄ ọkpọ owo ọdọn̄ ke itie mmọ ọyọhọ. 15  Ndien enye owụri itieuwa emi okodude ke Bethel,+ kpa edikon̄ ebiet emi Jeroboam+ eyen Nebat emi ekesịnde Israel ẹnam idiọkn̄kpọ+ akanamde, enye onyụn̄ owụri itieuwa ye edikon̄ ebiet oro. Ekem enye ọfọp edikon̄ ebiet oro; ndien enye ọkọk enye tutu akabade ntọn̄ onyụn̄ ọfọp eto utuakibuot oro. 16  Ke ini Josiah ọwọn̄ọrede enyịn, enye ada okụt mme itie ubụkowo ke obot. Ntre enye ọdọn̄ ẹketan̄ mme ọkpọ ke mme itie ubụkowo oro ẹdi, enye onyụn̄ ọfọp+ mmọ ke itieuwa, man anam enye okûdot ndida ntuak ibuot, nte ekemde ye ikọ Jehovah+ emi owo ata Abasi oro eketịn̄de,+ kpa owo oro eketịn̄de mme n̄kpọ emi. 17  Ekem enye obụp ete: “Ewe itiat udi ke nda n̄kụt oko?” Ntem mbio obio ẹbọrọ enye ẹte: “Edi udi+ emi ẹkebụkde owo ata Abasi oro okotode Judah+ edi, okonyụn̄ etịn̄de mme n̄kpọ emi afo anamde mi ye itieuwa Bethel.”+ 18  Ndien enye ọdọhọ ete: “Yak enye ọduọk odudu.+ Yak owo baba kiet okûtịmede ọkpọ esie.” Ntem ke mmọ ẹkpọn̄ mme ọkpọ esie ye mme ọkpọ prọfet+ emi okotode Samaria edi. 19  Ndien Josiah owụri mme ufọk+ edikon̄ ebiet emi ẹkedude ke mme obio+ Samaria emi ndidem+ Israel ẹkebọpde man ayat Abasi esịt,+ enye onyụn̄ anam ye mmọ kpukpru se enye akanamde ke Bethel.+ 20  Ntem enye awa kpukpru mme oku+ edikon̄ ebiet emi ẹkedude do ke mme itieuwa oro onyụn̄ ọfọp mme ọkpọ owo ke mme itieuwa oro.+ Ekem enye afiak ọnyọn̄ Jerusalem. 21  Ndien edidem owụk kpukpru owo, ete: “Mbufo ẹnịm passover+ ẹnọ Jehovah Abasi mbufo nte ekemde ye se ẹwetde ke n̄wed ediomi emi.”+ 22  Koro akananam owo ikenịmke utọ passover emi toto ke eyo mme ebiereikpe emi ẹkekpede ikpe Israel,+ m̀mê ke ofụri eyo ndidem Israel ye ndidem Judah.+ 23  Edi ke ọyọhọ isua efịteta emi Edidem Josiah akarade ẹma ẹnịm passover emi ẹnọ Jehovah ke Jerusalem.+ 24  Ndien Josiah ọsọhi n̄ko mme obụp ekpo+ ye mme etịn̄ ini iso+ ye teraphim+ ye mbubiam mbiet+ ye kpukpru mbubiam+ n̄kpọ oro ẹkedude ke isọn̄ Judah ye ke Jerusalem efep, man enye akpanam ekekem ye ikọ ibet+ oro ẹkewetde ke n̄wed+ oro Hilkiah oku okokụtde ke ufọk Jehovah.+ 25  Ndien edidem ndomokiet emi ebietde enye ikebemke enye iso idu, emi akafiakde etiene+ Jehovah ke ofụri esịt esie ye ke ofụri ukpọn̄+ esie ye ke ofụri odudu esie, nte ekemde ye kpukpru ibet Moses; baba kiet eke ebietde enye ikonyụn̄ idahake ida itiene enye edem. 26  Edi, Jehovah ikọwọn̄ọkede ikan̄-ikan̄ iyatesịt esie ifep, emi enye akayatde ye Judah+ kaban̄a kpukpru n̄kpọ iyatesịt emi Manasseh ekesịnde mmọ ẹnam ndiyat enye esịt.+ 27  Edi Jehovah ọdọhọ ete: “Ami nyemen Judah+ n̄ko mfep ke iso mi,+ kpa nte n̄kemende Israel mfep;+ ndien nyesịn obio emi ami n̄kemekde, kpa Jerusalem, ye ufọk emi n̄kọdọhọde nte, ‘Enyịn̄ mi ayaka iso odu do.’”+ 28  Amaedi mme n̄kpọ efen emi ẹban̄ade Josiah ye kpukpru se enye akanamde, nte owo iwetke mmọ isịn ke n̄wed+ n̄kpọntịbe eyo ndidem Judah? 29  Ndien ke eyo esie Pharaoh Nechoh+ edidem Egypt ọdọk ebịne edidem Assyria ke mben Akpa Euphrates,+ Edidem Josiah onyụn̄ ọwọrọ okosobo ye enye;+ edi Pharaoh owot+ enye ke Megiddo+ ke ndondo oro enye okụtde enye. 30  Ntre mme asan̄autom esie ẹmen okpo esie ke chariot ke Megiddo ẹdi Jerusalem+ ẹdibụk enye ke udi esie. Ekem mbio obio ẹda Jehoahaz+ eyen Josiah ẹkeyet aran ẹnyụn̄ ẹnịm enye ke edidem ke itie ete esie. 31  Jehoahaz+ ekedi isua edịp ye ita ke ini enye ọtọn̄ọde ndikara, enye onyụn̄ akara ọfiọn̄ ita ke Jerusalem. Ndien eka esie ekekere Hamutal+ eyen Jeremiah emi okotode Libnah. 32  Ndien enye anam se idiọkde ke enyịn Jehovah, nte ekemde ye kpukpru se mme ete ete esie ẹkenamde.+ 33  Ndien Pharaoh Nechoh+ esịn enye ke n̄kpọkọbi+ ke Riblah+ ke isọn̄ Hamath, mbak enye edikara ke Jerusalem, onyụn̄ anam isọn̄ oro ekpe isop+ talent silver+ ikie ye talent gold+ kiet. 34  N̄ko-n̄ko, Pharaoh Nechoh enịm Eliakim+ eyen Josiah ke edidem ke itie Josiah ete esie onyụn̄ okpụhọ enye enyịn̄ okot Jehoiakim; ndien enye emen Jehoahaz ọnyọn̄ Egypt, ekem enye akpa do.+ 35  Ndien Jehoiakim ọnọ Pharaoh silver+ ye gold oro. N̄kukụre edi nte ke enye ama anam isọn̄ oro ekpe isop,+ man ọnọ silver oro Pharaoh okowụkde. Nte ekemde ye tax+ ibuot owo kiet kiet enye ọbọ silver ye gold oto mbon isọn̄ oro, man ada ọnọ Pharaoh Nechoh. 36  Jehoiakim+ ekedi isua edịp ye ition ke ini enye ọtọn̄ọde ndikara, enye onyụn̄ akara isua duopekiet ke Jerusalem.+ Ndien eka esie ekekere Zebidah eyen Pedaiah emi okotode Rumah. 37  Ndien enye aka iso anam se idiọkde+ ke enyịn Jehovah, nte ekemde ye kpukpru se mme ete ete esie ẹkenamde.+

Mme Ikọ Idakisọn̄

At. Ed., “okûnam eyen esie eren m̀mê eyen esie an̄wan ebe ke ikan̄.”