Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

2 Ndidem 20;1-21

20  Ke mme usen oro, Hezekiah ọdọn̄ọ tutu ekpere ndikpa.+ Ndien prọfet Isaiah+ eyen Amoz edi ebịne enye edidọhọ enye ete: “Ntem ke Jehovah ọdọhọ ete, ‘Teme mbonufọk fo se mmọ ẹdinamde,+ koro afo ọmọn̄ akpa udunyụn̄ udụhe uwem.’”+  Ntem enye ọwọn̄ọde iso ese ibibene+ onyụn̄ ọbọn̄ akam ọnọ Jehovah,+ ete:  “O Jehovah, mmekpe fi ubọk, mbọk ti+ nte nsan̄ade+ ke iso fo ke akpanikọ+ ye ke ofụri esịt,+ nte nnyụn̄ nnamde se ifọnde fi ke enyịn.”+ Ndien Hezekiah atua eyet etieti.+  Edikem ke Isaiah mîka-isịmke kan̄a ufọt okụre, uyo Jehovah esịm enye,+ ete:  Fiak kọdọhọ Hezekiah andida ikọt mi usụn̄+ ete, ‘Ntem ke Jehovah Abasi+ David ete ete fo ọdọhọ ete: “Mmokop+ akam fo.+ Mmokụt mmọn̄eyet fo.+ Sese ami mmọn̄ nnam udọn̄ọ okụre fi.+ Ke ọyọhọ usen ita afo ọyọdọk aka ufọk Jehovah.+  Ndien ami nyadian isua efịt ke isua uwem fo, nyonyụn̄ nnyan̄a fi ye obio emi nsio ke ubọk edidem Assyria, nnyụn̄ n̄kpeme+ obio emi ke ntak mi ye ke ntak David asan̄autom mi.”’”+  Ndien Isaiah ọdọhọ ete: “Mbufo ẹda ebok+ nsat fig.” Ntre mmọ ẹda ebok nsat fig ẹdian ke mbufụt+ oro, ndien idem ọtọn̄ọ ndisọn̄ enye.+  Ndien Hezekiah obụp Isaiah ete: “Nso idi idiọn̄ọ+ ndiwụt ke Jehovah ayanam udọn̄ọ emi okụre mi ye nte ke ami nyọdọk n̄ka ufọk Jehovah ke ọyọhọ usen ita?”  Ntem Isaiah ọdọhọ ete: “Emi edi idiọn̄ọ+ oro Jehovah ọnọde fi, nte ke imọ Jehovah iyanam ikọ emi itịn̄de: Ndi oyom mbukpọn̄ aka iso ikpat duop ke udịghiukot m̀mê oyom enye afiak edem ikpat duop?” 10  Ntem Hezekiah ọbọrọ ete: “Edi mmemmem n̄kpọ mbukpọn̄ ndika iso ikpat duop, edi idịghe mmemmem n̄kpọ mbukpọn̄ ndifiak edem ikpat duop.”+ 11  Ntem prọfet Isaiah eseme okot Jehovah; ndien enye anam mbukpọn̄ emi ama okosụhọde ke udịghiukot Ahaz, afiak edem ikpat duop.+ 12  Ke ini oro Berodach-baladan+ eyen Baladan edidem Babylon+ ọnọ mme leta+ ye enọ ẹda ẹsọk Hezekiah; koro enye okokopde ke Hezekiah ọdọdọn̄ọ. 13  Ndien Hezekiah akpan̄ utọn̄ ọnọ mmọ onyụn̄ owụt mmọ ofụri ufọk ubon n̄kpọuto esie,+ ye silver ye gold+ ye aran balsam+ ye eti aran ye n̄kpọekọn̄ esie ye kpukpru se idude ke ufọk ubon n̄kpọuto esie. Ndien idụhe baba n̄kpọ kiet eke Hezekiah mîkowụtke mmọ ke ufọk esie ye ke ofụri obio ukara esie.+ 14  Ekem prọfet Isaiah edi ke ọtọ Edidem Hezekiah edibụp enye ete:+ “Nso ke mbon oro ẹkedọhọ, mmọ ẹkenyụn̄ ẹto m̀mọ̀n̄ ẹdi ẹbịne fi?”+ Ntre Hezekiah ọbọrọ ete: “Mmọ ẹketo anyan idụt, kpa Babylon, ẹdi.” 15  Ndien enye obụp ete: “Mmọ ẹkekụt nso ke ufọk fo?” Ntem Hezekiah ọbọrọ ete: “Mmọ ẹma ẹkụt kpukpru se idude ke ufọk mi. Idụhe baba n̄kpọ kiet eke mmen̄kowụtke mmọ ke ufọk ubon n̄kpọuto mi.”+ 16  Ndien Isaiah ọdọhọ Hezekiah ete: “Kop se Jehovah etịn̄de mi,+ 17  ‘“Sese! Mme usen ke ẹdi eke ẹditan̄de kpukpru se idude ke ufọk fo+ ye se mme ete ete fo ẹkekọde ẹbon tutu esịm mfịn emi, ẹka Babylon.+ Owo idisụhọke baba n̄kpọ kiet,”+ ntem ke Jehovah ọdọhọ. 18  “Ndien ẹyetan̄+ ndusụk ke otu nditọ fo emi ẹditode fi ke idem ẹwọrọ, emi afo edinyụn̄ obonde, ndien mmọ ẹyekabade ẹdi mme adaidaha+ ke ufọk ubọn̄ edidem Babylon.”’”+ 19  Ntem Hezekiah ọdọhọ Isaiah ete: “Ikọ Jehovah emi afo etịn̄de ọfọn.”+ Enye onyụn̄ ọdọhọ ete: “Nte idịghe ntre, ama akam edi emem ye akpanikọ+ ẹyedu ke eyo mi?”+ 20  Amaedi mme n̄kpọ efen emi ẹban̄ade Hezekiah ye ofụri odudu esie ye nte enye akanamde n̄kpọdiọhọ mmọn̄+ ye afan̄ mmọn̄+ emi adade mmọn̄ odụk obio, nte owo iwetke mmọ isịn ke n̄wed+ n̄kpọntịbe eyo ndidem Judah? 21  Ekem Hezekiah osụhọde ana ye mme ete ete esie;+ ndien Manasseh+ eyen esie akara ke itie esie.

Mme Ikọ Idakisọn̄