Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

2 Corinth 8;1-24

8  Nditọete, nnyịn inam mbufo ẹfiọk ẹban̄a mfọnido Abasi oro owo mîdotke emi ẹkenọde mme esop ke Macedonia,+  nte ke ini akwa idomo oro ekesịmde mmọ ke idak ukụt, akwa idatesịt mmọ ye ọkpọsọn̄ unana mmọ ẹma ẹnam akwa ntatubọk mmọ ọdọdiọn̄ awak.+  Koro ndi ntiense nte ke mmọ ẹma ẹnam adan̄a nte ukeme mmọ edide,+ ih, ẹma ẹkam ẹnam ẹbe ukeme mmọ,  ke adan̄aemi mmọ ẹkade iso ẹben̄e nnyịn ye ọkpọsọn̄ n̄kpeubọk ẹyom ifet ndinọ n̄kpọ ke mfọnido ye ifet ndinyene udeme ke utom oro ẹkenịmde ẹnọ ndisana owo.+  Inyụn̄ idịghe nte nnyịn ikakam idoride enyịn, edi mmọ ẹbem iso ẹyak idemmọ ẹnọ Ọbọn̄+ ekem ẹyak ẹnọ nnyịn ebe ke uduak Abasi.  Emi akanam nnyịn isịn udọn̄ inọ Titus+ ite, sia edide enye ọkọtọn̄ọ emi ke otu mbufo, enye okponyụn̄ okụre utom edibọ enọ mfọnido mbufo.  Edi, kpa nte mbufo ẹnyenede kpukpru n̄kpọ uwak uwak,+ mbuọtidem ye ikọ ye ifiọk+ ye udọn̄ ofụri esịt ye ima emi nnyịn imade mbufo, mbufo n̄ko ẹkpakam ẹtat ubọk ẹnọ enọ mfọnido emi.  Idịghe nte ke nnịm ewụhọ nnọ mbufo,+ edi ntịn̄ emi ke ntak udọn̄ ofụri esịt oro mbon en̄wen ẹnyenede man nnyụn̄ ndomo nse m̀mê ima mbufo edi ata ima.  Koro mbufo ẹmefiọk mfọnido Ọbọn̄ nnyịn Jesus Christ oro owo mîdotke, nte ke okposụkedi enye ekedide enyene-n̄kpọ owo, enye ama akabade edi ubuene ke ntak mbufo,+ man unana esie akpanam mbufo ẹkabade ẹdi mme enyene-n̄kpọ owo.+ 10  Se ami n̄kerede ke n̄kpọ emi edi emi:+ sia n̄kpọ emi edide ke ufọn mbufo,+ koro isua oko mbufo ikọtọn̄ọke ndinanam emi kpọt edi n̄ko ẹma ẹnyịme ndinam;+ 11  edi ke emi, ẹnam enye n̄ko ẹma, man, kpa nte ẹkenyịmede ndinam, ẹkpenam enye n̄ko ẹma oto ke se mbufo ẹnyenede. 12  Koro edieke edinyịme akam odude, enen̄ede enem Abasi esịt ndibọ nte ekemde ye se owo enyenede,+ idịghe se owo mînyeneke. 13  Koro ikọ mi iwọrọke ndinam n̄kpọ emem ye mbon efen,+ edi ọsọn̄ ye mbufo; 14  edi ọwọrọ ndinam n̄kpọ edi ukem ukem, man nyọhọ-nsụhọ mbufo akpan̄wam ke unana mmọ, nyọhọ-nsụhọ mmọ okponyụn̄ an̄wam ke unana mbufo, man ẹkpenam n̄kpọ edi ukem ukem.+ 15  Kpa nte ẹwetde ẹte: “Owo eke enyenede ekese inyeneke awak akaha, owo eke onyụn̄ enyenede esisịt inyeneke ekpri akaha.”+ 16  Edi ekọm enyene Abasi emi ekesịnde ke esịt Titus ukem ima emi nnyenede nnọ mbufo,+ 17  koro enye emenyịme nsịnudọn̄, edi, sia enye enyenede ifịk etieti, enye ke edi ke ọtọ mbufo ke idemesie. 18  Edi nnyịn imosio eyenete emi itoro esie asuanade ke kpukpru esop ke ntak eti mbụk, idọn̄ asan̄a ye enye. 19  Ikụreke ke oro, edi mme esop ẹma ẹmek+ enye n̄ko ẹte edi nsan̄a nnyịn ke utom enọ mfọnido emi, eke nnyịn inamde ndinọ Ọbọn̄ ubọn̄+ ndinyụn̄ n̄wụt unyịmesịt nnyịn.+ 20  Ntem nnyịn ikpekpeme idem mbak owo ekededi edikụt ndudue+ ọnọ nnyịn ke nte ididade etịbe+ ntatubọk emi inam n̄kpọ. 21  Koro nnyịn “imanam eti ndutịm, idịghe ke iso Jehovah kpọt, edi n̄ko ke iso owo.”+ 22  Akan oro, nnyịn imosio eyenete nnyịn idọn̄ asan̄a ye mmọ, emi nnyịn ima ikodụn̄ọde ifiọk ediwak ini ite edi owo emi enyenede ifịk ke ediwak n̄kpọ, edi idahaemi etetịm enyene ifịk ke ntak akwa mbuọtidem oro enye enyenede ke idem mbufo. 23  Edieke eyịghe ekededi odude aban̄a Titus, enye edi nsan̄a mi ye nsan̄autom+ ke ufọn mbufo; mîdịghe edieke ẹnyenede eyịghe ẹban̄a nditọete nnyịn, mmọ ẹdi mme apostle ẹnọ mme esop ẹnyụn̄ ẹdi ubọn̄ Christ. 24  Mmọdo ẹnam esop ẹkụt ima+ emi mbufo ẹmade mmọ ye ntak emi nnyịn ikadade mbufo inam mbụre.+

Mme Ikọ Idakisọn̄