Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

2 Corinth 1;1-24

1  Ami Paul, emi ndide apostle+ Christ Jesus ke uduak Abasi, ye Timothy+ eyenete nnyịn inọ n̄wed emi ẹsọk esop Abasi oro odude ke Corinth, ọkọrọ ye kpukpru ndisana owo+ emi ẹdude ke ofụri Achaia:+  Mfọnido oro owo mîdotke ye emem emi ẹtode Abasi kpa Ete nnyịn ye Ọbọn̄ Jesus Christ ẹkpekam ẹdu ye mbufo.+  Itoro enyene Abasi ye Ete+ Ọbọn̄ nnyịn Jesus Christ, kpa Ete mbọm+ ye Abasi kpukpru ndọn̄esịt,+  emi ọdọn̄de nnyịn esịt ke kpukpru ukụt nnyịn,+ man nnyịn ikpekeme ndida ndọn̄esịt oro Abasi ọnọde nnyịn ndọn̄+ mbon oro ẹdude ke ukụt ekededi esịt.+  Koro kpa nte ndutụhọ kaban̄a Christ awakde ọnọ nnyịn,+ ntre ke ndọn̄esịt oro nnyịn inyenede n̄ko awak ebe ke Christ.+  Edide nnyịn idu ke ukụt, emi edi man mbufo ẹnyene ndọn̄esịt ye edinyan̄a;+ onyụn̄ edide ẹnọ nnyịn ndọn̄esịt, emi edi man mbufo ẹnyene ndọn̄esịt oro anamde mbufo ẹyọ ukem ndutụhọ oro nnyịn ikụtde.+  Ndien ke ntre idotenyịn oro inyenede iban̄a mbufo iyokke, koro nnyịn ifiọkde ite, kpa nte mbufo ẹdide mme andibuana ke ndutụhọ oro, ke ukem usụn̄ oro ke mbufo n̄ko ẹditiene ẹbuana ke ndọn̄esịt oro.+  Koro nnyịn iyomke mbufo ẹnana ifiọk, nditọete, ẹban̄a ukụt oro ekesịmde nnyịn ke Asia,*+ nte ke nnyịn ikodu ke ata ọkpọsọn̄ mfịghe emi ekebede ukeme nnyịn, tutu nnyịn idorike enyịn ite iyodu uwem.+  Ke akpanikọ, eketie nnyịn ke idem nte ima ibọ ubiomikpe n̄kpa. Emi ekedi man nnyịn ikûbuọt idem+ ke idem nnyịn, edi ibuọt ke Abasi emi anamde mme akpan̄kpa ẹset.+ 10  Enye ama anyan̄a nnyịn osio ke utọ akwa n̄kpọ nte n̄kpa, oyonyụn̄ anyan̄a nnyịn;+ ndien nnyịn idori enyịn ke enye ite ke enye ayaka iso anyan̄a nnyịn.+ 11  Mbufo n̄ko ẹmekeme ndin̄wam ebe ke mbufo ndinam n̄kpeubọk mban̄a nnyịn,+ man ediwak owo ẹkpenọ ekọm+ ke ibuot nnyịn ẹban̄a se ẹkenọde nnyịn ke mfọn oto ke akam ediwak owo.+ 12  Koro se nnyịn idade ibụre mbụre, emi ubieresịt nnyịn etiede ntiense aban̄a edi emi,+ ete nnyịn idaha ọniọn̄ owo+ edi ida edisana idaha ye esịt akpanikọ eke otode Abasi, ye mfọnido Abasi oro owo mîdotke, idu uwem ke ererimbot, akpan akpan ke otu mbufo. 13  Koro nnyịn iwetke n̄kpọ efen inọ mbufo ibọhọke mme n̄kpọ oro mbufo ẹtịmde ẹfiọk ẹnyụn̄ ẹdiọn̄ọde n̄ko; emi ami nnyụn̄ ndoride enyịn nte mbufo ẹyeka iso ẹdiọn̄ọ tutu esịm utịt,+ 14  kpa nte mbufo n̄ko ẹdiọn̄ọde, ke ndusụk udomo, ẹte ke nnyịn idi ntak mbụre mbufo,+ kpa nte mbufo n̄ko ẹdidide ẹnọ nnyịn ke usen Ọbọn̄ nnyịn Jesus.+ 15  Ntre, ke ntak mbuọtidem emi, mma nduak ndidi ke ọtọ mbufo,+ man mbufo ẹkpefiak+ ẹnyene ifet ndikop idatesịt, 16  ndien ke mma n̄kawaha ke ọtọ mbufo n̄kpebe n̄ka Macedonia,+ nnyụn̄ mfiak nto Macedonia ndi ke ọtọ mbufo+ man mbufo ẹkpeda mi ẹkeyak+ ke usụn̄ Judea. 17  Mmọdo, ke ini n̄kaduakde ndinam ntem, nte mma nnam mbubru ndomokiet?+ Mîdịghe ndi nduak se ededi oro nduakde nte ekemde ye obụkidem,+ man “Ih” mi ọkpọwọrọ “Ih,” “Ihih” mi okponyụn̄ ọwọrọ “Ihih”?+ 18  Edi ẹkeme ndiberi edem ke Abasi nte ke ikọ oro nnyịn iketịn̄de inọ mbufo idịghe Ih ndien ekem edi Ihih. 19  Koro Eyen Abasi,+ Christ Jesus, emi nnyịn, oro edi, ami ye Silvanus ye Timothy,+ ikọkwọrọde ke otu mbufo, ikedịghe Ih ndien ekem akabade edi Ihih, edi Ih amakabade edi Ih ke se iban̄ade enye.+ 20  Koro inamke n̄kpọ m̀mê mme un̄wọn̄ọ+ Abasi ẹwak adan̄a didie, mmọ ẹmekabade ẹdi Ih ebe ke enye.+ Mmọdo oto ke enye n̄ko ke nnyịn ibọrọ “Amen”+ inọ Abasi ubọn̄. 21  Edi enye emi ọnọde nsọn̄ọ ete ke mbufo ye nnyịn inyene Christ ye enye emi ekeyetde nnyịn aran+ edi Abasi. 22  Enye n̄ko emefịk nnyịn idiọn̄ọ+ esie omonyụn̄ ọnọ nnyịn idiọn̄ọ+ n̄kpọ eke edidide, oro edi, spirit,+ ke esịt nnyịn. 23  Mmọdo mmokot Abasi nte edi ntiense+ aban̄a ukpọn̄ mi nte ke ekedi ke ufọn mbufo+ ke n̄ketre ndidi Corinth. 24  Idịghe nte ke nnyịn idi mme andikara+ mbuọtidem mbufo, edi nnyịn idi nsan̄autom+ ndinam mbufo ẹnyene idatesịt, koro mbuọtidem+ mbufo anam mbufo ẹsọn̄ọ ẹda.+

Mme Ikọ Idakisọn̄

Asia enye emi edi mbahade obio ukara ke Obio Ukara Rome.