Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

2 Chronicle 10;1-19

10  Ekem Rehoboam+ aka Shechem,+ koro edi ke Shechem ke kpukpru nditọ Israel ẹkedi ndinam enye edidem.  Edikem ke ndondo oro Jeroboam+ eyen Nebat okopde n̄kpọ emi ke adan̄aemi enye osụk odude ke Egypt,+ (koro enye ekefehede ke ntak Edidem Solomon,) Jeroboam ọsọsọp oto Egypt ọnyọn̄ edi.+  Ntre mmọ ẹdọn̄ ẹkekot enye ẹdi, ndien Jeroboam ye ofụri Israel ẹdi ẹdidọhọ Rehoboam ẹte:+  “Ete fo ama anam ọkpọnọ nnyịn odobi;+ ndien ke emi nam ọkpọsọn̄ utom oro ete fo ọkọnọde nnyịn ye ndodobi ọkpọnọ+ oro enye ọkọkọn̄ọde nnyịn ẹfere, ndien nnyịn iyanam n̄kpọ inọ fi.”+  Ntem enye ọdọhọ mmọ ete: “Mbufo ẹyak usen ita ẹbe, ekem ẹfiak ẹdi ẹbịne mi.” Ntre mmọ ẹnyọn̄ọ.  Ndien Edidem Rehoboam oyom item+ oto mbiowo oro ẹkesinọde Solomon ete esie item ke adan̄aemi enye okodude ke uwem, onyụn̄ obụp ete: “Mbufo ẹteme ẹte mbọrọ mbio emi nso?”+  Ndien mmọ ẹdọhọ enye ẹte: “Edieke afo edifọnde ye mbio emi edinyụn̄ anamde se inemde mmọ esịt onyụn̄ etịn̄de nti ikọ ọnọ mmọ,+ mmọ n̄ko ẹyedi mme asan̄autom fo kpukpru ini.”+  Edi, enye ọkpọn̄ item+ oro mbiowo ẹkenọde enye, okoyom item oto n̄kparawa oro ẹkekọride ye enye,+ emi ẹkenyụn̄ ẹnamde n̄kpọ ẹnọ enye.+  Ndien enye ọdọhọ mmọ ete: “Nso item+ ke mbufo ẹnyene ndinọ man nnyịn ikpada ibọrọ mbio emi ẹdọhọde mi ẹte, ‘Nam ọkpọnọ oro ete fo ọkọkọn̄ọde nnyịn efere’?”+ 10  Ndien n̄kparawa oro ẹkekọride ye enye ẹdọhọ enye ẹte: “Ntem ke afo edidọhọ mbio emi ẹkedọhọde fi ẹte, ‘Ete fo ama anam ọkpọnọ nnyịn odobi, edi afo nam enye efere nnyịn ke idem’; dọhọ mmọ ntem ete,+ ‘Ekpri nnuenubọk mi oyodobi akan ifụhi ete mi.+ 11  Ndien ete mi ọkọkọn̄ọ mbufo ndodobi ọkpọnọ; edi ami nyanam ọkpọnọ mbufo etetịm odobi.+ Ete mi akakama ikpa amia mbufo, edi ami ndikama ikpa n̄kukịm mmia mbufo.’”+ 12  Ndien Jeroboam ye kpukpru owo ẹdi ke ọtọ Rehoboam ke ọyọhọ usen ita, kpa nte edidem ọkọdọhọde ete: “Ẹfiak ẹdi ẹbịne mi ke ọyọhọ usen ita.”+ 13  Ndien edidem ọbọrọ mmọ ikọ uyat uyat.+ Ntem ke Edidem Rehoboam ọkọkpọn̄ item+ mbiowo,+ 14  ndien enye ọbọrọ mmọ nte n̄kparawa ẹketemede+ enye, ete: “Ami nyanam ọkpọnọ mbufo etetịm odobi, nnyụn̄ n̄kọrọ efen ke esịt. Ete mi akakama ikpa amia mbufo, edi ami ndikama ikpa n̄kukịm mmia mbufo.”+ 15  Ndien edidem ikopke uyo mbon emi; koro edi ata Abasi akanam n̄kpọ emi etịbe+ man Jehovah akpanam ikọ+ esie emi enye akadade Ahijah+ owo Shiloh+ etịn̄ ọnọ Jeroboam eyen Nebat,+ osu. 16  Ndien sia edidem mîmaha ndikop uyo ofụri Israel, mmọ ẹbọrọ edidem ẹte: “Nso udeme ke nnyịn inyene ke David?+ Nnyịn inyụn̄ inyeneke udeme ndomokiet ke eyen Jesse.+ O Israel! Mbufo kiet kiet ẹfiak ẹtiene mme abasi+ mbufo. O David,+ se ban̄a ufọk fo.” Ntem ofụri Israel ẹnyọn̄ọ ẹka mme tent mmọ. 17  Ndien Rehoboam aka iso akara nditọ Israel emi ẹdụn̄de ke mme obio Judah.+ 18  Ekem Edidem Rehoboam osio Hadoram,+ emi esede aban̄a mbon oro ẹnyịkde ẹnam ọkpọsọn̄ utom ọdọn̄, edi nditọ Israel ẹtọn̄ọ enye ke itiat ẹwot.+ Ndien Edidem Rehoboam an̄wana adaha ọdọk chariot esie efehe ọnyọn̄ Jerusalem.+ 19  Ndien nditọ Israel ẹka iso ẹsọn̄ ibuot+ ye ufọk David tutu esịm mfịn emi.

Mme Ikọ Idakisọn̄