Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

1 Samuel 8;1-22

8  Edikem ke ndondo oro Samuel ama ọkọsọn̄, enye emek+ nditọ esie iren nte mme ebiereikpe ke Israel.  Ndien akpan esie ekekere Joel,+ udọ esie onyụn̄ ekere Abijah;+ mmọ ẹkekpe ikpe ke Beer-sheba.  Ndien nditọ esie ikasan̄ake ke usụn̄ esie,+ edi ẹyom idiọk udori,+ ẹbọ ubọkedem,+ ẹnyụn̄ ẹkwan̄a ikpe.+  Ekem kpukpru mbiowo Israel+ ẹsop idem ọtọkiet ẹdi ẹbịne Samuel ke Ramah  ẹnyụn̄ ẹdidọhọ enye ẹte: “Sese! Afo ọmọsọn̄, edi nditọ fo isan̄ake ke usụn̄ fo. Ke emi, mek edidem+ nọ nnyịn man enye ekpe ikpe nnyịn kpa nte kpukpru mme idụt eken.”  Edi n̄kpọ emi inemke Samuel ke utọn̄ ke ini mmọ ẹdọhọde ẹte: “Nọ nnyịn edidem man ekpe ikpe nnyịn,” ndien Samuel ọbọn̄ akam ọnọ Jehovah.+  Ekem Jehovah ọdọhọ Samuel ete:+ “Kop kpukpru se mmọ ẹdọhọde fi;+ koro mîdịghe afo ke mmọ ẹsịn, edi ami ke mmọ ẹsịn nte edidem+ mmọ.  Kpukpru se mmọ ẹkenamde ye ami toto ke usen oro n̄kadade mmọ ke Egypt+ n̄wọrọ tutu esịm mfịn emi mmọ ẹkpọn̄de mi+ ẹkenam n̄kpọ mme abasi efen,+ kpa ntre n̄ko ke mmọ ẹnam ye afo.  Afo nyụn̄ kop uyo mmọ. Edi, sọn̄ọ dụri mmọ utọn̄, nyụn̄ sian mmọ se edidem oro edikarade mmọ ediyomde.”+ 10  Ntre Samuel emen kpukpru ikọ Jehovah etịn̄ ọnọ mbon oro ẹkedọhọde enye ọnọ mmimọ edidem. 11  Enye onyụn̄ ọdọhọ mmọ ete: “Emi edi se edidem oro edikarade mbufo ediyomde:+ enye ọyọbọ mbufo nditọiren mbufo ada,+ enịm mmọ nte mme awat chariot+ ye mme awat enan̄-mbakara+ esie, ndien ndusụk mmọ ẹyefehe ke iso chariot esie;+ 12  enye oyonyụn̄ enịm etubom mme tọsịn+ ọnọ idemesie ye etubom mme aba ye duop,+ ndien ndusụk owo ẹyefụn̄+ isọn̄ ẹnọ enye ẹnyụn̄ ẹkpen̄e ukpen̄e+ ẹnọ enye, ẹyenyụn̄ ẹbot mme n̄kpọekọn̄+ esie ye mme n̄kpọ chariot esie.+ 13  Ndien enye ayada nditọiban mbufo nte mme abuak edifuọn̄ aran ye mme etemudia ye mme asan̄uyo.+ 14  Enye oyonyụn̄ ọbọ mbufo ata nti in̄wan̄ mbufo ye in̄wan̄ vine+ mbufo ye in̄wan̄ olive+ mbufo onyụn̄ ada mmọ ọnọ mme asan̄autom esie. 15  Enye oyonyụn̄ ọbọ ubak kiet ke itie duop+ ke otu in̄wan̄ mfri mbufo ye in̄wan̄ vine mbufo onyụn̄ emen mmọ ọnọ mme adaidaha okụre+ esie ye mme asan̄autom esie. 16  Ndien enye ayada ifịn iren mbufo ye ifịn iban mbufo ye otu nti ufene mbufo ye mme ass mbufo, anam utom esie.+ 17  Enye ọyọbọ ubak kiet ke itie duop ke otu ufene+ mbufo, ndien mbufo ẹyekabade ẹsan̄a utom ẹnọ enye. 18  Ndien mbufo ẹyeseme ke usen oro ke ntak edidem+ oro mbufo ẹmekde ẹnọ idem mbufo, edi Jehovah idibọrọke mbufo ke usen oro.”+ 19  Edi mmọ imaha ndikop uyo Samuel+ ẹnyụn̄ ẹdọhọ ẹte: “Ihih, nnyịn isụk iyom edidem akara nnyịn. 20  Nnyịn n̄ko iyakabade itie nte kpukpru mme idụt,+ ndien edidem nnyịn eyekpe ikpe nnyịn, oyonyụn̄ ebem nnyịn iso ọwọrọ akan̄wana ekọn̄.” 21  Ndien Samuel akpan̄ utọn̄ okop kpukpru se mmọ ẹtịn̄de; ndien enye emen eketịn̄ ọnọ Jehovah.+ 22  Ndien Jehovah ọdọhọ Samuel ete: “Kop uyo mmọ, nyụn̄ nam edidem akara mmọ.”+ Ntem Samuel ọdọhọ iren Israel ete: “Mbufo kiet kiet ẹnyọn̄ọ obio mbufo.”

Mme Ikọ Idakisọn̄