Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

1 Samuel 6;1-21

6  Ndien ekebe+ Jehovah odu ke isọn̄ mbon Philistia ke ọfiọn̄ itiaba.  Ndien mbon Philistia ẹkot mme oku ye mbiaidiọn̄,+ ẹnyụn̄ ẹbụp mmọ ẹte: “Nso ke nnyịn idinam ye ekebe Jehovah emi? Mbufo ẹnam nnyịn ifiọk se ikpanamde man enye afiak ke ebiet emi enye okotode edi.”  Ntre mmọ ẹbọrọ ẹte: “Edieke mbufo ẹyomde ndinọ ekebe Abasi Israel afiak ọnyọn̄, ẹkûnọ enye ọnyọn̄ ke mbufo mîwaha uwa, koro mbufo ẹnyene ndiwa uwa ubiomikpe+ nnọ enye. Adan̄aoro ke udọn̄ọ edikụre mbufo, ndien mbufo ẹyefiọk ntak emi ubọk esie mîkọwọn̄ọkede ikpọn̄ mbufo.”  Ntem mmọ ẹbụp ẹte: “Nso idi uwa ubiomikpe emi nnyịn ikpawade inọ enye?” Mmọ ẹnyụn̄ ẹbọrọ ẹte: “Mbufo ẹdinọ mbiet itu ition emi ẹnamde ke gold ye mbiet eku ition emi ẹnamde ke gold, nte ekemde ye ibat mbọn̄+ Philistia emi ẹdianade kiet, koro ukem ufen ekesịm kpukpru mbufo ye mbọn̄ mbufo emi.  Mbufo ẹnyụn̄ ẹnam mbiet itu mbufo ye mbiet eku+ oro ẹsobode isọn̄ mbufo, ẹnyụn̄ ẹnọ Abasi Israel ubọn̄.+ Eyedi enye oyosio ubọk esie ọkpọn̄ mbufo ye abasi mbufo ye isọn̄ mbufo.+  N̄ko, ntak emi mbufo ẹkpenamde esịt mbufo ọsọn̄ ukem nte Egypt ye Pharaoh ẹkenamde esịt mmọ ọsọn̄?+ Nte ikedịghe ke ndondo oro enye akanamde n̄kpọ ke ọkpọsọn̄ ubọk ye mmọ,+ ke mmọ ẹkeyak Israel ẹnyọn̄ọ, ndien mmọ ẹnyọn̄ọ?+  Ndien, ke emi, mbufo ẹnam obufa ukpatn̄kpọ,+ ẹnyụn̄ ẹda uman enan̄ iba eke ẹnọde nditọ eba, emi akanam owo mîkọn̄ọke mmọ ọkpọnọ,+ ẹnyụn̄ ẹtebe uman enan̄ oro ke ukpatn̄kpọ oro, mbufo ẹnyụn̄ ẹnam nditọ mmọ ẹnyọn̄ ufọk, ẹkûyak ẹtiene mmọ.  Mbufo ẹnyụn̄ ẹmen ekebe Jehovah ẹdori ke ukpatn̄kpọ oro, ẹnyụn̄ ẹtan̄ mme mbiet n̄kpọ oro ẹnamde ke gold+ oro mbufo ẹdinọde nte uwa ubiomikpe+ ẹdọn̄ ke ekebe oro ọdiọhọde ekpere enye. Ndien mbufo ẹnọ enye ọnyọn̄, ndien enye ọyọnyọn̄.  Mbufo ẹnyụn̄ ẹse: edieke enye edidọkde aka usụn̄ obio esie, ke Beth-shemesh,+ mbufo ẹfiọk ke edi enye akanam nnyịn utọ akwa nnama emi; edieke enye mîdọkke ika, nnyịn iyọfiọk ke idịghe ubọk esie okotụk nnyịn; edi ke mme n̄kpọ emi ẹkenyụn̄ ẹtetịbe.”+ 10  Ndien mbon oro ẹnam ntre. Ntre mmọ ẹmụm uman enan̄ iba eke ẹnọde nditọ eba ẹtebe ke ukpatn̄kpọ, ẹnyụn̄ ẹkụk nditọ mmọ ẹdọn̄ ke ufọk. 11  Ndien mmọ ẹmen ekebe Jehovah ẹdori ke ukpatn̄kpọ+ oro, ẹnyụn̄ ẹdori ekebe emi esịnede eku oro ẹnamde ke gold ye mme mbiet itu mmọ. 12  Ndien mme enan̄ oro ẹsan̄a nnennen ẹdụk usụn̄ Beth-shemesh.+ Ẹsan̄a ke ọkpọusụn̄, ẹsan̄a ẹmai, inyụn̄ iwahake nnasia m̀mê ufien. Ndien mbọn̄+ Philistia emi ẹdianade kiet ẹsan̄a ẹtiene mmọ ke edem tutu ẹkesịm adan̄a Beth-shemesh. 13  Ndien mbon Beth-shemesh ke ẹkekpen̄e wheat+ ke unaisọn̄ itịghede. Ke ini mmọ ẹmenerede enyịn ẹkụt Ekebe oro, mmọ ẹdara etieti. 14  Ndien ukpatn̄kpọ oro awat odụk in̄wan̄ Joshua owo Beth-shemesh akatuak ada do, ke ebiet emi akwa itiat odude. Ndien mmọ ẹsiak eto ukpatn̄kpọ oro, ẹnyụn̄ ẹda mme enan̄+ oro ẹwa nte edifọp uwa ẹnọ Jehovah.+ 15  Ndien nditọ Levi+ ẹdorode ekebe Jehovah oro ye ekebe oro okodorode ye enye, emi mme mbiet oro ẹnamde ke gold ẹkedọn̄ọde, ẹkedori ke enyọn̄ akwa itiat oro. Ndien mbon Beth-shemesh+ n̄ko ẹfọp edifọp uwa, ẹnyụn̄ ẹwa mme uwa ke usen oro ẹnọ Jehovah. 16  Mbọn̄ Philistia ition emi ẹdianade kiet+ ẹkụt n̄kpọ emi ẹnyụn̄ ẹfiak ẹnyọn̄ọ Ekron kpa ke usen oro. 17  Ndien mmọ emi ẹdi mme itu oro ẹnamde ke gold emi mbon Philistia ẹkenọde Jehovah nte uwa ubiomikpe:+ eke Ashdod+ kiet, eke Gaza+ kiet, eke Ashkelon+ kiet, eke Gath+ kiet, eke Ekron+ kiet. 18  Mme eku oro ẹnamde ke gold ẹkedi ke ibat kpukpru obio oro mbọn̄ Philistia emi ẹdianade kiet ẹkarade, ọtọn̄ọde ke obio ibibene tutu esịm obio-in̄wan̄ emi mînyeneke ibibene. Ndien akwa itiat oro ẹkedoride ekebe Jehovah edi ntiense tutu esịm mfịn emi ke in̄wan̄ Joshua owo Beth-shemesh. 19  Ndien Jehovah owot mbon Beth-shemesh,+ koro mmọ ẹkewụkde enyịn ẹse ekebe Jehovah. Ntre enye owot owo ata ye duop ke otu mmọ—owo tọsịn aba ye duop—ndien mmọ ẹfụhọ ke ntak emi Jehovah owotde ediwak mmọ.+ 20  Ndien mbon Beth-shemesh ẹdọhọ ẹte: “Anie edikeme ndida ke iso Jehovah kpa edisana Abasi emi,+ enye edinyụn̄ ọkpọn̄ nnyịn ebịne mmanie?”+ 21  Ke akpatre mmọ ẹdọn̄ mme isụn̄utom ẹkedọhọ mme andidụn̄ Kiriath-jearim,+ ẹte: “Mbon Philistia ẹmen ekebe Jehovah ẹfiak ẹdi. Mbufo ẹsụhọde ẹdi ẹdimen enye ẹdọk ke ọtọ mbufo.”+

Mme Ikọ Idakisọn̄