Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

1 Samuel 5;1-12

5  Ntem mbon Philistia ẹmen ekebe+ ata Abasi ke Ebenezer ẹnyọn̄ Ashdod.+  Mbon Philistia ẹnyụn̄ ẹmen ekebe ata Abasi ẹdụk ufọk Dagon ẹkediọk ẹkpere Dagon.+  Ekem mbon Ashdod ẹbak ẹdemede ke ndan̄nsiere, ndien, sese! Dagon ama ọduọ ekịbi iso ke isọn̄ ke iso ekebe Jehovah.+ Ntre mmọ ẹmenede Dagon ẹfiak ẹnịm ke itie esie.+  Ke ini mmọ ẹbakde ẹdemede ke usenubọk, sese! Dagon ama ọduọ ekịbi iso ke isọn̄ ke iso ekebe Jehovah, ẹma ẹnyụn̄ ẹsịbe Dagon ibuot ye ubọk mbiba ẹfep, ẹkebon ke asan̄udọk.+ Enye edisụhọ ikpehe oro ebietde iyak.  Ntak edi oro mme oku Dagon ye kpukpru mbon oro ẹdụkde ufọk Dagon mîdorike ikpat ke asan̄udọk Dagon ke Ashdod tutu esịm mfịn emi.  Ndien ubọk Jehovah+ odoro mbon Ashdod ke idem, enye anam idem enyek Ashdod ye n̄kann̄kụk esie, onyụn̄ ọtọ mmọ udọn̄ọ itu.+  Ndien mbon Ashdod ẹkụt emi, ẹnyụn̄ ẹdọhọ ẹte: “Ẹkûyak ekebe Abasi Israel odu ye nnyịn, koro ubọk esie odorode nnyịn ke idem onyụn̄ odorode Dagon kpa abasi nnyịn.”+  Mmọdo mmọ ẹnam kpukpru mbọn̄ Philistia emi ẹdianade kiet ẹsop idem, ẹnyụn̄ ẹbụp ẹte: “Nso ke nnyịn idinam ye ekebe Abasi Israel emi?” Ke akpatre, mmọ ẹbiere ẹte: “Yak ekebe Abasi asan̄a akanade Gath.”+ Ntre mmọ ẹmen ekebe Abasi Israel ẹsan̄a ẹkanade do.  Edikem ke mmọ ẹma ẹkemen ekebe emi ẹkanade ẹsịm do, ubọk Jehovah+ odoro obio emi ke idem onyụn̄ esịn mmọ ẹdu ke akwa ndutịme, ndien enye ọtọ mbio obio emi udọn̄ọ itu,+ ọtọn̄ọde ke eyenọwọn̄ tutu esịm akwaowo. 10  Ntem mmọ ẹnọ ekebe ata Abasi emi aka Ekron.+ Edikem ke ndondo oro ekebe ata Abasi odụkde Ekron, mbon Ekron ẹseme ẹte: “Mmọ ẹmenyụn̄ ẹmen ekebe Abasi Israel ẹkanade ẹbịne nnyịn, man ediwot nnyịn ye ikọt nnyịn!”+ 11  Ntem mmọ ẹnam kpukpru mbọn̄ Philistia emi ẹdianade kiet ẹsop idem, ẹnyụn̄ ẹdọhọ mmọ ẹte: “Mbufo ẹnam ekebe Abasi Israel emi afiak ke ebiet emi enye okotode edi mbak enye ediwot nnyịn ye ikọt nnyịn.” Koro enye emesịn ndutịme emi adade n̄kpan̄a edi ke obio;+ ubọk ata Abasi onyụn̄ odoro mbio obio oro ke idem,+ 12  ẹnyụn̄ ẹtọ mbon oro mîkpaha, udọn̄ọ itu.+ Ndien eseme+ emi obio oro esemede oyom un̄wam ọdọk ke enyọn̄.

Mme Ikọ Idakisọn̄