Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

1 Samuel 4;1-22

4  Ndien uyo Samuel esịm ofụri Israel. Ekem Israel ẹwọrọ ẹka ndin̄wana ekọn̄ ye mbon Philistia; mmọ ẹnyụn̄ ẹnam nna ẹkpere Ebenezer,+ mbon Philistia ẹnyụn̄ ẹnam nna ke Aphek.+  Ndien mbon Philistia ẹtịm udịmekọn̄+ mmọ ẹka ẹken̄wana ye Israel, ekọn̄ onyụn̄ ọsọn̄ ubọk tutu mbon Philistia ẹkan Israel,+ ẹnyụn̄ ẹwot n̄kpọ nte irenowo tọsịn inan̄ ke iso ekọn̄.  Ke adan̄aemi mmọ ẹdụkde ẹdi itienna, mbiowo Israel ẹdọhọ ẹte: “Ntak emi Jehovah akande nnyịn mfịn emi ke iso mbon Philistia?+ Ẹyak nnyịn ika ikemen ekebe ediomi+ Jehovah ke Shiloh, man enye odu ke ufọt nnyịn onyụn̄ anyan̄a nnyịn osio mme asua nnyịn ke ubọk.”  Ntre mmọ ẹdọn̄ mme owo ẹka Shiloh ẹkemen ekebe ediomi Jehovah mme udịm, emi etiede ke mme cherub.+ Ndien nditọ Eli mbiba, kpa Hophni ye Phinehas, ẹdu do ye ekebe ediomi ata Abasi.+  Edikem ke ndondo oro ekebe ediomi Jehovah odụkde itienna, kpukpru nditọ Israel ẹkpọk ukịbe,+ tutu isọn̄ enyek.  Ndien mbon Philistia ẹda ẹkop uyom ukịbe emi, ẹnyụn̄ ẹbụp ẹte: “Ukịbe oro ẹkpọkde+ ke itienna mme Hebrew ọwọrọ nso?” Ke akpatre, mmọ ẹdifiọk ke ẹma ẹmen ekebe ediomi Jehovah ẹdụk itienna.  Ndien ndịk anam mbon Philistia, koro mmọ ẹdọhọde ẹte: “Abasi omodụk itienna!”+ Ntre mmọ ẹdọhọ ẹte: “Mbọm nnyịn, koro utọ n̄kpọ emi akananam itịbeke!  Mbọm nnyịn! Anie edinyan̄a nnyịn osio akwa Abasi emi ke ubọk? Abasi emi akamia Egypt ufen okonyụn̄ owot mmọ ọkwọkudịm ke wilderness.+  Mbufo mbon Philistia ẹnyene uko ẹnyụn̄ ẹnam n̄kpọ nte irenowo, mbak mbufo ẹdinam n̄kpọ ẹnọ mme Hebrew emi kpa nte mmọ ẹnamde ẹnọ mbufo;+ mbufo ẹnam n̄kpọ nte irenowo ẹnyụn̄ ẹn̄wana!” 10  Ndien mbon Philistia ẹn̄wana ekọn̄ ẹnyụn̄ ẹkan Israel,+ mmọ owo kiet kiet ẹfen̄e ẹnyọn̄ọ tent mmọ;+ n̄kpan̄a onyụn̄ okpon etieti,+ tutu ẹwot nditọ Israel tọsịn edịp ye duop emi ẹsan̄ade ke ukot.+ 11  Ndien mbon Philistia ẹmen ekebe ediomi Abasi ẹnyọn̄ọ,+ nditọ Eli mbiba, kpa Hophni ye Phinehas ẹnyụn̄ ẹkpan̄a.+ 12  Ndien owo Benjamin kiet awak+ ọfọn̄idem esie onyụn̄ oto iso ekọn̄ efehe tutu edisịm Shiloh ke usen oro, ntọn̄ onyụn̄ odu enye ke ibuot.+ 13  Ke ini enye esịmde, sese! Eli do etie ke akpakaha ke mbenusụn̄ ke ese usụn̄, koro idem ekenyekde enye aban̄a ekebe ata Abasi.+ Ndien owo emi odụk aka eketịn̄ n̄kpọ emi ke obio, n̄kpoyo onyụn̄ ofụt ke obio. 14  Ndien Eli okop n̄kpoyo emi, ndien obụp ete: “Nso ke uyom editịm emi ọwọrọ?”+ Ndien owo emi awara ete iketịn̄ inọ Eli. 15  (Eli ekedi isua anan̄ ye efịteta, enyịn esie inyụn̄ ikemeke ndikụt usụn̄ aba.)+ 16  Ndien owo emi ọbọrọ Eli ete: “Ami ndi owo emi otode iso ekọn̄ ọnyọn̄ edi, nnyụn̄ nto iso ekọn̄ mfehe ndi mfịn emi.” Ndien enye obụp ete: “Eyen mi, n̄kpọ etie didie do?” 17  Ntre isụn̄utom emi ọbọrọ ete: “Israel ẹmefen̄e ke iso mbon Philistia, mbon Philistia ẹmenyụn̄ ẹkan mmọ idiọk idiọk;+ n̄ko nditọ fo mbiba—Hophni ye Phinehas,+ ẹkpan̄a—mbon Philistia ẹnyụn̄ ẹmen ekebe ata Abasi ẹnyọn̄ọ.”+ 18  Edikem ke ndondo oro enye asiakde ekebe ata Abasi, Eli ebehede edem edem ke akpakaha ke mben inuaotop ọduọ atuak itọn̄ akpa, koro enye ama ọsọn̄ onyụn̄ odobi; ndien enye ama ekpe ikpe Israel ke isua aba. 19  Ndien n̄wan eyen esie, kpa n̄wan Phinehas, asan̄a ye idịbi ekpere ndiman eyen, ndien enye okop ke ẹma ẹmen ekebe ata Abasi ẹnyọn̄ọ ye nte ke ete ebe imọ ye ebe imọ ẹkpan̄a. Ndien enye onụhọ onyụn̄ aman eyen, koro ubiak uman otụkde enye ke mbuari.+ 20  Ke ini enye oyomde ndikpa, iban oro ẹdade ẹkpere enye ẹdọhọ ẹte: “Kûkop ndịk, koro afo amande eyeneren.”+ Edi enye ibọrọke inyụn̄ iyakke emi odụk enye esịt. 21  Edi enye osio eyen oro enyịn̄ Ichabod+ onyụn̄ ọdọhọ ete: “Ubọn̄ amadaha ọkpọn̄ Israel aka ntan̄mfep,”+ enye ọdọhọ emi aban̄a ekebe ata Abasi oro ẹkemende ẹnyọn̄ ye ete ebe esie ye ebe esie emi ẹkekpan̄ade.+ 22  Mmọdo n̄wan emi ọdọhọde ete: “Ubọn̄ amadaha ọkpọn̄ Israel aka ntan̄mfep,+ koro ẹkemende ekebe ata Abasi ẹnyọn̄ọ.”+

Mme Ikọ Idakisọn̄