Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

1 Samuel 30;1-31

30  Edikem ke adan̄aemi David ye ikọt esie ẹnyọn̄de ẹdi Ziklag+ ke ọyọhọ usen ita, mbon Amalek+ ẹma ẹbụmede ẹdụk edem usụk ye Ziklag; ndien mmọ ẹn̄wana ye Ziklag ẹnyụn̄ ẹfọp enye ke ikan̄,  ẹnyụn̄ ẹtan̄ iban+ ye kpukpru se idude ke obio, ọtọn̄ọde ke n̄kpri-n̄kan tutu esịm n̄kponn̄kan. Mmọ ikowotke baba owo kiet, edi ẹtan̄ mmọ ẹnyọn̄.  Ke ini David ye ikọt esie ẹnyọn̄de ẹdisịm obio, sese! obio ama ata ikan̄, ẹma ẹnyụn̄ ẹtan̄ iban mmọ ye nditọiren mmọ ye nditọiban mmọ ẹnyọn̄ nte mbuotekọn̄.  Ndien David ye mbon oro ẹdude ye enye ẹmenede uyo mmọ ẹtua eyet,+ tutu odudu idụhe mmọ aba ke idem nditua.  Ẹma ẹnyụn̄ ẹtan̄ iban David mbiba ẹnyọn̄, kpa Ahinoam+ owo Jezreel, ye Abigail+ n̄wan Nabal owo Carmel.  Ndien David enen̄ede ofụhọ,+ koro kpukpru owo ẹdọhọde ẹte ẹtọn̄ọ enye ke itiat;+ koro kpukpru mmọ ẹkenen̄erede ẹyat esịt+ ẹban̄a nditọiren ye nditọiban mmọ. Ntre David ada Jehovah Abasi esie ọsọn̄ọ idem.+  Ntem David ọdọhọ Abiathar+ oku, eyen Ahimelech, ete: “Mbọk, men ephod+ oro di.” Ndien Abiathar emen ephod ọsọk David.  Ndien David obụp Jehovah,+ ete: “Nte mbịne otu mbon n̄wo emi? Nte nyesịm mmọ?” Ntem enye ọbọrọ+ enye ete: “Bịne mmọ, koro afo mûdutreke ndisịm mmọ, mûdunyụn̄ utreke ndifiak mbọ kpukpru se ẹketan̄de ẹnyọn̄ọ.”+  David adaha inikiet inikiet asan̄a ye owo ikie itiokiet+ oro ẹdude ye enye, ndien mmọ ẹkesịm itịghede mmọn̄ Besor, ndien irenowo emi ẹkesụhọde ẹtuak ẹda. 10  Ndien David osụk ebịne+ mmọ, enye ye owo ikie inan̄, edi owo ikie iba emi ẹkekpade mba etieti mîkonyụn̄ ikemeke ndibe itịghede mmọn̄ Besor+ ẹtuak ẹda. 11  Ndien mmọ ẹkụt eren kiet, owo Egypt,+ ke in̄wan̄. Ntre mmọ ẹda enye ẹsọk David, ndien ẹnọ enye uyo ata, ẹnyụn̄ ẹnọ enye mmọn̄ ọn̄wọn̄. 12  Mmọ ẹnyụn̄ ẹnọ enye ubak ebok fig ye ebok edisat grape+ iba. Ndien enye ata, spirit+ esie onyụn̄ afiak edemede; koro enye mîkadiaha n̄kpọ, mîkonyụn̄ in̄wọn̄ke mmọn̄ ke uwemeyo ita ye okoneyo ita. 13  Ndien David obụp enye ete: “Afo edi eyen anie, onyụn̄ oto m̀mọ̀n̄?” ndien enye ọbọrọ ete: “Ami ndi asan̄autom emi otode Egypt, ofụn owo Amalek, edi eteufọk mi ama ọkpọn̄ mi koro n̄kọdọn̄ọde usen ita emi ẹkebede.+ 14  Nnyịn idi mbon emi ikakade ekọn̄ ke edem usụk mme Cherethite+ ye isọn̄ emi enyenede Judah ye isọn̄ edem usụk Caleb;+ nnyịn ikonyụn̄ ifọp Ziklag ke ikan̄.” 15  Ndien David obụp enye ete: “Nte afo ayada nnyịn okowụt otu mbon n̄wo emi? Ndien enye ọbọrọ enye ete: “Tomo+ Abasi nọ mi ete ke afo uduwotke mi, ye nte ke afo uduyakke mi usịn eteufọk mi ke ubọk,+ ndien ami nyada fi n̄kowụt otu mbon n̄wo emi.” 16  Ntem enye ada enye usụn̄ osụhọde,+ ndien, sese! mmọ ẹma ẹtara ẹsuana ke ofụri isọn̄ oro, ke ẹdia ẹnyụn̄ ẹn̄wọn̄ n̄kpọ ẹnyụn̄ ẹdia usọrọ+ ẹban̄a ofụri n̄kpọ mbụme oro mmọ ẹkedade ẹto isọn̄ mbon Philistia ye isọn̄ Judah.+ 17  Ndien David owot mmọ ọtọn̄ọde ke n̄kịmn̄wan̄a usenubọk tutu esịm mbubreyo, onyụn̄ osobo mmọ; ndien baba owo kiet ibọhọke+ ke mîbọhọke irenowo ikie inan̄ oro ẹkewatde ke camel ẹfen̄e. 18  Ndien David afiak ọbọ kpukpru se mbon Amalek ẹketan̄de,+ onyụn̄ anyan̄a iban esie mbiba. 19  Ndien baba n̄kpọ mmọ kiet itakke, ọtọn̄ọde ke n̄kpri-n̄kan tutu esịm n̄kponn̄kan, ọtọn̄ọde ke nditọiren ye nditọiban tutu esịm mme n̄kpọ mbụme, idem tutu esịm kpukpru n̄kpọ emi mmọ ẹkedade ẹnọ idemmọ.+ David afiak ada kpukpru mmọ. 20  Ntre David atan̄ kpukpru erọn̄ ye enan̄ onyụn̄ anam mmọ ẹsan̄a ke iso mme ufene eken. Ndien mmọ ẹdọhọ ẹte: “Mme n̄kpọ mbụme David ẹdi emi.”+ 21  Ekem David asan̄a edisịm owo ikie iba+ oro ẹkekpade mba etieti mîkonyụn̄ ikemeke ndisan̄a ye David n̄ka, emi ẹkenyụn̄ ẹbede ẹkpọn̄ ke mben itịghede mmọn̄ Besor; ndien mmọ ẹwọrọ ẹdisobo ye David ye mbon oro ẹdude ye enye. Ke ini David asan̄ade edisịm mmọ, enye obụp nte n̄kpọ etiede ye mmọ. 22  Edi kpukpru mme idiọk ye mbukpo owo+ oro ẹkesan̄ade ye David ẹbọrọ ẹnyụn̄ ẹdọhọ ẹte: “Sia mmọ mîkasan̄ake ye nnyịn ika, nnyịn idinọhọ mmọ baba n̄kpọ mbụme kiet oro nnyịn idade inyọn̄ idi, ke mîbọhọke ndikpọn̄ iban ye nditọ mmọ nnọ mmọ, man ẹda ẹnyọn̄.” 23  Edi David ọdọhọ ete: “Nditọete mi, mbufo ẹkûnam ntem ye se Jehovah ọnọde nnyịn,+ ke emi enye ama ekekpeme nnyịn+ onyụn̄ ayak otu mbon n̄wo oro esịn nnyịn ke ubọk.+ 24  Anie edinyụn̄ akpan̄ utọn̄ ọnọ mbufo ke utọ ikọ emi? Koro nte udeme mbon emi ẹkekade ekọn̄ edide kpa ntre ke udeme mbon emi ẹketiede ẹkpeme mbiomo+ edidi. Kpukpru owo ẹyetiene ẹnyene udeme.”+ 25  Ndien toto ke usen oro, enye enịm emi nte ewụhọ ye ubiereikpe+ ọnọ Israel tutu esịm mfịn emi. 26  Ke ini David edide edisịm Ziklag, enye ọnọ ndusụk n̄kpọ mbụme ẹsọk mbiowo Judah, kpa mme ufan esie,+ ete: “Se enọ+ edidiọn̄ mbufo mi, emi otode mme n̄kpọ mbụme mme asua Jehovah.” 27  Ndien ọnọ ẹsọk mbon oro ẹdude ke Bethel,+ ye mbon oro ẹdude ke edem usụk Ramoth,+ ye mbon oro ẹdude ke Jattir,+ 28  ye mbon oro ẹdude ke Aroer, ye mbon oro ẹdude ke Siphmoth, ye mbon oro ẹdude ke Eshtemoa,+ 29  ye mbon oro ẹdude ke Racal, ye mbon oro ẹdude ke obio nditọ Jerahmeel,+ ye mbon oro ẹdude ke obio Kenite,+ 30  ye mbon oro ẹdude ke Hormah,+ ye mbon oro ẹdude ke Borashan,+ ye mbon oro ẹdude ke Athach, 31  ye mbon oro ẹdude ke Hebron,+ ye ke kpukpru ebiet oro David ye ikọt esie ẹkesan̄ade.

Mme Ikọ Idakisọn̄