Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

1 Samuel 28;1-25

28  Edikem ke mme usen oro mbon Philistia ẹbon mbonekọn̄ mmọ ndikan̄wana ekọn̄ ye Israel.+ Ntre Achish ọdọhọ David ete: “Afo emetịm ọfiọk ete ke afo edisan̄a ye ami aka ekọn̄, afo ye ikọt fo.”+  Ndien David ọdọhọ Achish ete: “Ntak edi oro afo ọfiọkde se asan̄autom fo enyenede ndinam.” Ndien Achish ọbọrọ David ete: “Emi edi ntak oro ndimekde fi edi andikpeme mi kpukpru ini.”+  Ndien ke Samuel ama akakpa, ofụri Israel ẹma ẹtua enye, ẹnyụn̄ ẹbụk enye ke Ramah obio esie.+ Saul ama onyụn̄ ebịn mme obụp ekpo ye mme etịn̄ ini iso efep ke obio.+  Edikem mbon Philistia ẹsop idem ọtọkiet ẹnyụn̄ ẹnam nna ke Shunem.+ Ntre Saul anam ofụri Israel ẹsop idem ọtọkiet, ndien mmọ ẹnam nna ke Gilboa.+  Edi ke ini Saul okụtde mbonekọn̄ Philistia ndịk anam enye, esịt onyụn̄ ọtọn̄ọ ndinyek enye etieti.+  Ndien Saul obụp uyo Jehovah,+ Jehovah inyụn̄ ibọrọke+ enye edide ke ndap,+ m̀mê ke Urim,+ m̀mê ke mme prọfet.+  Ekem Saul ọdọhọ mme asan̄autom esie ete: “Mbufo ẹyom n̄wan emi edide obụp ekpo ẹnọ mi,+ ndien nyaka n̄kobụp enye.” Ndien mme asan̄autom esie ẹdọhọ enye ẹte: “Sese! N̄wan kiet emi edide obụp ekpo mmọdo ke En-dor.”+  Ntre Saul okpụhọ idem+ onyụn̄ emen ọfọn̄ efen esịne onyụn̄ asan̄a ye irenowo iba aka; ndien mmọ ẹdi ke ọtọ n̄wan emi ke okoneyo.+ Ndien Saul ọdọhọ ete: “Mbọk, bre idiọn̄+ nọ mi nyụn̄ nam owo eke ndisiakde nnọ fi ọwọrọ edi.”  Edi n̄wan oro ọdọhọ enye ete: “Afo emetịm ọfiọk se Saul akanamde, nte enye ekesịbede mme obụp ekpo ye mme etịn̄ ini iso efep ke obio.+ Ndien, ntak emi afo ọkọkde afia ọnọ ukpọn̄ mi man ẹwot mi?”+ 10  Ke ndondo oro Saul ada enyịn̄ Jehovah ọn̄wọn̄ọ ọnọ enye, ete: “Ma uwem Jehovah,+ ikpe idibiomke fi ke n̄kpọ emi!” 11  Ndien n̄wan emi obụp enye ete: “Anie ke oyom nnam ọwọrọ edi?” Ntem enye ọbọrọ ete: “Nam Samuel ọwọrọ edi.”+ 12  Ke ini n̄wan emi okụtde “Samuel,”*+ enye ofiori ke ọkpọsọn̄ uyo onyụn̄ obụp Saul ete: “Ntak emi afo akabian̄ade mi, ke ini edide afo edi Saul?” 13  Ndien edidem ọbọrọ enye ete: “Kûfehe ndịk, afo okụt nso?” Ndien n̄wan emi ọdọhọ Saul ete: “N̄kụt abasi+ nte ọwọrọde ke isọn̄ edi.” 14  Inikiet inikiet enye obụp n̄wan oro ete: “Enye etie didie?” ndien n̄wan emi ọbọrọ ete: “Akani eren ọwọrọ edi, enye onyụn̄ esịne anana-ubọk kod+ ke idem.” Ntem Saul ọdiọn̄ọ ke edi “Samuel,”+ ndien enye ọduọ ekịbi iso ke isọn̄. 15  Ndien “Samuel” obụp Saul ete: “Ntak emi afo afịnade mi ke ndinam mi n̄wọrọ ndi?”+ Ntem Saul ọbọrọ ete: “Ami ndu ke akwa nnanenyịn,+ koro mbon Philistia ẹn̄wanade ye ami, ndien Abasi ọmọkpọn̄+ mi inyụn̄ ibọrọke mi ikọ aba, edide ke mme prọfet m̀mê ke ndap;+ ntak edi oro n̄kotde fi man anam mi mfiọk se n̄kpanamde.”+ 16  Mmọdo “Samuel” ọdọhọ ete: “Nso inam ndien afo obụpde mi, ke ini Jehovah ama ọkọkpọn̄ fi+ onyụn̄ akabade edi asua fo?+ 17  Jehovah oyonyụn̄ anam ọnọ idemesie kpa nte enye akadade mi etịn̄, ndien Jehovah ayawabade fi obio ubọn̄ ke ubọk+ ọbọ onyụn̄ ayak ọnọ owo fo David.+ 18  Sia afo mûkokopke uyo Jehovah,+ mûkonyụn̄ udaha ikan̄-ikan̄ iyatesịt esie utiene Amalek,+ ntak edi oro Jehovah mîditreke ndinam fi n̄kpọ emi mfịn emi. 19  Ndien Jehovah ayayak fi ye Israel esịn mbon Philistia ke ubọk,+ ndien n̄kpọn̄ afo+ ye nditọiren+ fo ẹdidu ye ami. Jehovah oyonyụn̄ ayak mbonekọn̄ Israel esịn mbon Philistia ke ubọk.”+ 20  Ndien ke ndondo oro Saul ọduọ anyanade ana ke isọn̄, ndịk onyụn̄ anam enye etieti aban̄a ikọ “Samuel.” N̄ko, odudu inyụn̄ idụhe enye aba ke idem, koro enye mîkadiaha udia ke ofụri uwemeyo ye ofụri okoneyo oro. 21  Ndien n̄wan oro asan̄a ebịne Saul onyụn̄ okụt ke n̄kpọ emi afịna enye etieti. Ntre enye ọdọhọ enye ete: “Sese! ofụn an̄wan fo ama anam nte afo ọkọdọhọde, ndien mma nsịn ukpọn̄ mi ke itiendịk+ nnyụn̄ nnam se ọkọdọhọde mi. 22  Ndien, ke emi, mbọk kop uyo ofụn an̄wan fo; ndien yak nnịm fi ekpri uyo ke iso, man afo adia onyụn̄ okop odudu, koro afo ọmọn̄ edinyọn̄.” 23  Edi enye esịn onyụn̄ ọdọhọ ete: “Ami ndidiaha.” Ndien mme asan̄autom esie ye n̄wan emi ẹsụk ẹyịre enye. Ke akpatre enye okop uyo mmọ onyụn̄ adaha ke isọn̄ etie ke n̄kpana. 24  Ndien n̄wan emi ama enyene eyen enan̄+ emi enyenede isek ke ufọk. Ntre enye awara aka okowot enye,+ ada ndomuyo ye ndomuyo emi ẹbuakde, asan̄ uyo eke leaven mîdụhe. 25  Ndien enye emen mmọ edinọ Saul ye mme asan̄autom esie, mmọ ẹnyụn̄ ẹta. Ekem mmọ ẹdaha ẹnyọn̄ọ okoneyo oro.+

Mme Ikọ Idakisọn̄

Ẹwet mbụk emi nte obụp ekpo oro okokụtde, emi demon akabian̄ade enye anam nte idi Samuel.