Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

1 Samuel 27;1-12

27  Edi David ọdọhọ ke esịt esie ete: “Saul iditreke ndiwot mi usen kiet. Idụhe se ikpọfọnde nte ami ndifehe+ n̄ka idụt mbon Philistia;+ ndien Saul ọyọduọk idotenyịn ndikụt mi, idinyụn̄ iyomke mi aba ke ofụri isọn̄ Israel,+ ndien ami nyọbọhọ enye.”  Ntre David adaha, enye ye irenowo ikie itiokiet+ oro ẹdude ye enye, ẹka ke ọtọ Achish+ eyen Maoch, kpa edidem Gath.  Ndien David odụn̄ ye Achish ke Gath, enye ye irenowo esie, owo kiet kiet ye mbonufọk esie,+ David ye iban esie iba, Ahinoam+ owo Jezreel, ye Abigail+ n̄wan Nabal, owo Carmel.  Ekem ẹditọt Saul ẹte ke David ama efehe aka Gath, edi Saul ikaha ikoyom enye aba.+  Ekem David ọdọhọ Achish ete: “Ke emi, edieke edide ami mmokụt mfọn ke iso fo, yak ẹnọ mi itie kiet ke otu mme obio-in̄wan̄, man ndụn̄ do; koro ntak emi asan̄autom fo okpodụn̄de ye afo ke obio edidem?”  Ntem Achish ọnọ enye Ziklag+ ke usen oro. Ntak edi oro Ziklag enyenede ndidem Judah tutu esịm mfịn emi.  Ndien ofụri ini oro David odụn̄de ke obio-in̄wan̄ mbon Philistia edi isua kiet ye ọfiọn̄ inan̄.+  Ndien David ọdọk ye ikọt esie man mmọ ẹken̄wana ekọn̄ ye mbon Geshur+ ye Girzite ye mbon Amalek;+ koro mmọ ẹkedụn̄de ke isọn̄ oro ọkọtọn̄ọde ke Telam+ atara esịm Shur+ onyụn̄ osụhọde ekesịm isọn̄ Egypt.  Ndien David osobo isọn̄ oro, inyụn̄ inịmke baba eren m̀mê n̄wan kiet uwem;+ ndien enye atan̄ mme erọn̄ ye enan̄ ye ass ye camel ye ọfọn̄ mmọ, ekem enye ọnyọn̄ etiene Achish. 10  Edikem Achish obụp enye ete: “M̀mọ̀n̄ ke mbufo ẹkeka ẹken̄wana ekọn̄ mfịn?” Ndien David ọbọrọ ete:+ “Nnyịn ikaka ekọn̄ ke edem usụk Judah+ ye ke edem usụk mbon Jerahmeel+ ye ke edem usụk mbon Kenite.”+ 11  Amaedi eren ye n̄wan, David ikenịmke baba owo mmọ kiet uwem ndida nnyọn̄ ndi Gath, koro enye ọdọhọde ete: “Mbak mmọ ẹdidọhọ nnyịn ẹte, ‘Ntem ke David akanam.’”+ (Ntem ke enye akanam ke ofụri ini emi enye okodụn̄de ke obio-in̄wan̄ mbon Philistia.) 12  Ntem Achish enịm David ke akpanikọ,+ onyụn̄ ọdọhọ ke esịt esie ete: “Ke akpanikọ, enye amakabade edi n̄kpọ itekesịt ke otu ikọt esie Israel;+ ndien enye eyedi asan̄autom mi ke nsinsi.”

Mme Ikọ Idakisọn̄