Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

1 Samuel 13;1-23

13  Saul ekedi isua [?]* ke emana ke ini enye ọtọn̄ọde ndikara,+ enye onyụn̄ akara Israel ke isua iba.  Ndien Saul emek owo tọsịn ita osio ke Israel ọnọ idemesie; ndien owo tọsịn iba ẹdi ẹdidu ye Saul ke Michmash+ ye ke obot obot ikpehe Bethel, owo tọsịn kiet ẹnyụn̄ ẹdu ye Jonathan+ ke Gibeah+ eke esien Benjamin, edi enye ọnọ mbon eken ẹnyọn̄ọ tent mmọ kiet kiet.  Ekem Jonathan owot mbonekọn̄+ Philistia+ emi ẹdade ẹkpeme ke Geba;+ ndien mbon Philistia ẹdikop n̄kpọ emi. Edi Saul anam ẹfri nnụk+ ke ofụri isọn̄ oro, ẹte: “Yak mme Hebrew ẹkop!”  Ndien ofụri Israel ẹkop ẹdọhọde ẹte: “Saul omowot mbonekọn̄ Philistia emi ẹdade ẹkpeme, ndien, ke emi, Israel amakabade edi n̄kpọ itekesịt+ ọnọ mbon Philistia.” Ntre mmọ ẹkot kpukpru owo ẹbon ọtọkiet ẹte ẹtiene Saul ẹka Gilgal.+  Ndien mbon Philistia ẹsop idem ọtọkiet ndin̄wana ye Israel, ẹsan̄a ye tọsịn chariot+ ekọn̄ edịp ye duop ye mme awat enan̄-mbakara tọsịn itiokiet ye mme owo emi ẹwakde nte ntan mbeninyan̄;+ ndien mmọ ẹdọk ẹkenam nna ke Michmash ke n̄kan̄ edem usiahautịn Beth-aven.+  Ndien mbon Israel ẹkụt ke mmimọ idu ke nnanenyịn,+ koro ẹkefịkde mmọ; ndien mmọ ẹkedịbe ke mme abaitiat+ ye ke mme obube ye ke ikpọ itiat ye ke n̄kpọsọn̄ ebiet ye ke mme obube mmọn̄.  Mme Hebrew ẹnyụn̄ ẹbe Jordan+ ẹka isọn̄ Gad+ ye Gilead. Edi Saul osụk odu ke Gilgal, ndien kpukpru owo ẹnyek idem ke adan̄aemi ẹtienede enye.+  Ndien enye ebet ke usen itiaba tutu esịm ini emi Samuel ekenịmde;+ edi Samuel idịghe idisịm Gilgal, ndien mme owo ẹsuana ẹkpọn̄ enye.  Ekem Saul ọdọhọ ete: “Mbufo ẹda edifọp uwa ye uwa ebuana ẹsọk mi.” Ntem enye ọfọp edifọp uwa.+ 10  Ndien ke ndondo oro enye okụrede ndifọp edifọp uwa, Samuel ọbiọn̄ọde. Ntre Saul ọwọrọ aka ndisobo ye enye nnyụn̄ ndiọn̄ enye.+ 11  Ndien Samuel obụp enye ete: “Nso ke afo akanam?”+ Ntem Saul ọbọrọ ete: “N̄kokụt nte mme owo ẹsuanade ẹkpọn̄ mi,+ ye nte afo mûkonyụn̄ udịghe ke ini emi ekenịmde,+ ye nte mbon Philistia ẹkenyụn̄ ẹsopde idem ọtọkiet ke Michmash,+ 12  ntre ami ndọhọ nte,+ ‘Ke emi, mbon Philistia ẹmọn̄ ẹsụhọde ẹdin̄wana ye ami ke Gilgal, edi ami n̄kpehe kan̄a Jehovah ubọk.’ Ntak edi oro ami n̄kọsọn̄de esịt+ mfọp edifọp uwa.” 13  Ntem Samuel ọdọhọ Saul ete: “Afo amanam ndisịme.+ Afo unịmke ewụhọ+ emi Jehovah Abasi fo okowụkde fi,+ koro edieke afo ekpenịmde, Jehovah akpanam ubọn̄ fo ọsọn̄ọ ada ke Israel ke nsinsi. 14  Ndien, ke emi, ubọn̄ fo idibịghike.+ Jehovah oyoyom owo emi ekemde esịt ye enye ọnọ idemesie;+ ndien Jehovah eyenịm enye ete ada ikọt imọ usụn̄,+ koro afo mûkenịmke ewụhọ oro Jehovah okowụkde fi.”+ 15  Ekem Samuel adaha ke Gilgal ọnyọn̄ aka Gibeah esien Benjamin, ndien Saul abat owo, mmọ oro ẹsụk ẹdude ye enye ẹsịm owo ikie itiokiet.+ 16  Ndien Saul ye Jonathan eyen esie ye mbon emi ẹdude ye enye ẹdụn̄ ke Geba+ eke esien Benjamin. Edi mbon Philistia ẹnam nna ke Michmash.+ 17  Ndien mbon mbụme ẹbụmede ẹwọrọ ke itienna mbon Philistia ke udịm ita.+ Udịm kiet ẹwọn̄ọde ẹdụk usụn̄ Ophrah,+ emi akade isọn̄ Shual, 18  udịm enye eken ẹwọn̄ọde ẹdụk usụn̄ Beth-horon,+ ndien ọyọhọ udịm ita ẹwọn̄ọde ẹdụk usụn̄ emi akade adan̄a oro asakde iso ese itịghede Zeboim, ke n̄kan̄ wilderness. 19  Ndien odomutịm ndomokiet ikodụhe ke ofụri isọn̄ Israel, koro mbon Philistia ẹkedọhọde ẹte: “Mbak mme Hebrew ẹdinam akan̄kan̄ m̀mê eduat.”+ 20  Ndien kpukpru nditọ Israel ẹsụhọde ẹka ke ọtọ mbon Philistia man ẹkeban n̄kpọ ufụn̄isọn̄ mmọ, ye utịbi-isọn̄ mmọ, ye ekụri mmọ, ye ofụt ukpen̄e mmọ.+ 21  Ndien ekọmurua emi ẹkpede man ẹban n̄kpọ ufụn̄isọn̄, ye utịbi-isọn̄, ye udọk emi enyenede edet ita, ye ekụri, ye n̄kpọ uwụk ukịm-enan̄,+ ekedi pim* kiet. 22  Ndien edikem ke usen ekọn̄ owo ikwe baba akan̄kan̄+ kiet m̀mê eduat ke ubọk owo ekededi emi odude ye Saul ye Jonathan; edi ẹkụt kiet ke ubọk Saul+ ye Jonathan eyen esie. 23  Ndien mbonekọn̄ ukpeme mbon Philistia+ ẹbụmede ẹdụk ebiet ube ebeden̄ ke Michmash.+

Mme Ikọ Idakisọn̄

Ibat isua idụhe ke akpasarade uwetn̄kpọ usem Hebrew.
“Pim” ke usem Hebrew edi n̄kpọ emi ẹdade ẹdomo nte n̄kpọ odobide.