Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

1 Samuel 10;1-27

10  Ndien Samuel emen aran ke ekpeme+ ọtọhọ Saul ke ibuot onyụn̄ etịm enye inua+ onyụn̄ ọdọhọ ete: “Nte emi idịghe koro Jehovah eyetde fi aran enịm ke adausụn̄+ ọnọ udeme+ esie?  Ke ọnyọn̄de ọkpọn̄ mi mfịn emi, afo oyokụt irenowo iba ẹdade ke mben udi Rachel+ ke obio Benjamin ke Zelzah, ndien mmọ ẹyedọhọ fi ẹte, ‘Ẹkụt mme uman ass+ emi afo akakade ndiyom, edi idahaemi ete fo ikereke aba mme uman ass oro, edikam etịmede esịt aban̄a mbufo, ete: “Nyom ndinam didie ye eyen mi?”’+  Ekem afo oyoto do ebe osụk aka iso iso ekesịm akamba eto Tabor, ndien owo ita emi ẹdọkde ẹka ọtọ ata Abasi ke Bethel+ ẹyesobo ye afo, kiet akama nditọ ebot+ ita, kiet akama ekara uyo+ ita, kiet onyụn̄ obiom akamba aban̄ wine.+  Ndien mmọ ẹyebụp nte n̄kpọ etiede+ ye afo, ẹyenyụn̄ ẹnọ fi uyo iba, afo nyụn̄ bọ mmọ uyo emi ke ubọk.  Ke oro ebede afo eyedisịm obot ata Abasi,+ ke ebiet emi mbonekọn̄+ Philistia ẹdade ẹkpeme. Ndien ke ini afo esịmde obio oro, afo oyosobo ye otu mme prọfet+ emi ẹtode edikon̄ ebiet+ ẹsụhọde ẹdi, ndien mme andikama ndido urụk+ ye ekọmọ+ ye ifiom+ ye harp+ ẹyebem mmọ iso, ke adan̄aemi mmọ ẹtịn̄de ikọ nte mme prọfet.  Ndien spirit+ Jehovah oyodoro fi ke idem, ndien afo eyetiene mmọ etịn̄ ikọ nte prọfet,+ onyụn̄ akabade edi owo efen.  Ndien ke ini afo ọbọde mme idiọn̄ọ+ emi, nam se ededi oro afo ekemede ndida ubọk fo nnam,+ koro ata Abasi odude ye afo.+  Afo eyebem mi iso osụhọde aka Gilgal;+ ndien, sese! ami nyosụhọde ntiene fi man ndifọp edifọp uwa, nnyụn̄ n̄wa uwa ebuana.+ Afo oyodu do ebet mi ke usen itiaba+ tutu ndisịm fi, ndien nyanam fi ọfiọk se edinamde.”  Ndien ke ndondo oro enye ọwọn̄ọrede afara esie ọkpọn̄ Samuel, Abasi okpụhọde enye esịt ọnọ enye esịt efen;+ ndien kpukpru idiọn̄ọ+ emi ẹsu ke usen oro. 10  Ntre mmọ ẹto do ẹbe ẹka obot oro, ndien otu mme prọfet ẹdisobo ye enye; ndien ke ndondo oro, spirit Abasi odoro enye ke idem,+ enye onyụn̄ etịn̄ ikọ nte prọfet+ ke otu mmọ. 11  Edikem ke adan̄aemi kpukpru mbon oro ẹdiọn̄ọde enye ẹkụtde enye, sese! enye editịn̄ ikọ nte prọfet ke otu mme prọfet. Mmọdo mmọ ẹdọhọ ye kiet eken ẹte: “Nso itịbe ntem ye eyen Kish? Nte Saul n̄ko edi kiet ke otu mme prọfet?”+ 12  Ndien owo kiet emi otode do ọbọrọ ete: “Edi anie edi ete mmọ?” Ntak edi oro ẹdade emi ẹtoho ufiet+ ẹte: “Nte Saul n̄ko edi kiet ke otu mme prọfet?” 13  Edikem ke enye ama okokụre nditịn̄ ikọ nte prọfet, enye ebe edisịm edikon̄ ebiet. 14  Ekem eyeneka ete Saul eren ọdọhọ enye ye asan̄autom esie ete: “Mbufo ẹkeka m̀mọ̀n̄?” Ndien enye ọbọrọ ete: “Nnyịn ikaka ndiyom mme uman ass,+ ima isan̄a iyom, edi ikwe. Ntem nnyịn ika ibịne Samuel.” 15  Ntre eyeneka ete Saul obụp ete: “Mbọk, ẹsian mi, Nso ke Samuel eketịn̄ ọnọ mbufo?” 16  Ndien Saul ọbọrọ eyeneka ete esie ete: “Enye ama etịm asian nnyịn ete ke ẹma ẹkụt mme uman ass oro.” Edi amaedi ikọ aban̄ade itie edidem oro Samuel ọkọdọhọde, enye itịn̄ke emi inọ enye.+ 17  Ndien Samuel okot kpukpru owo obon ọtọkiet ke iso Jehovah ke Mizpah+ 18  onyụn̄ ọdọhọ nditọ Israel ete: “Ntem ke Jehovah Abasi Israel ọdọhọ,+ ‘Ami n̄kanam Israel oto ke Egypt+ ọwọrọ, nnyụn̄ nnyan̄a mbufo nsio ke ubọk Egypt ye ke ubọk kpukpru obio ubọn̄ emi ẹkefịkde mbufo.+ 19  Edi mfịn emi, mbufo ẹmesịn Abasi+ mbufo emi akanyan̄ade mbufo osio ke kpukpru ukụt ye nnanenyịn emi ẹkesịmde mbufo, ẹnyụn̄ ẹdọhọ ẹte: “Ihih, afo kam nọ edidem akara nnyịn.” Ndien, ke emi, mbufo ẹwọrọ ẹda ke iso Jehovah ke esien ke esien,+ ye ke tọsịn ke tọsịn.’” 20  Ekem Samuel anam kpukpru esien Israel ẹsan̄a ẹkpere,+ ndien ẹsio+ esien Benjamin. 21  Ndien enye anam esien Benjamin asan̄a ekpere, ke ubon ke ubon, ndien ẹsio+ ubon Matar. Ekem ẹsio+ Saul eyen Kish. Ndien mmọ ẹsan̄a ẹyom enye edi owo ikwe. 22  Ndien mmọ ẹtọn̄ọ ntak ẹbụp+ Jehovah, ẹte: “Nte owo emi edi mi kan̄a?” Ntem Jehovah ọbọrọ ete: “Sese enye edịbede+ mi ke otu mbiomo.” 23  Ntre mmọ ẹfehe ẹka ẹkesio enye do ẹdi. Ke ini enye ọwọrọde ada ke ufọt mmọ, enye ọniọn̄ akan kpukpru owo eken, ndien baba owo kiet iniọn̄ke ibe enye afara.+ 24  Ndien Samuel ọdọhọ kpukpru owo ete: “Nte mbufo ẹmekụt owo emi Jehovah emekde,+ nte ke idụhe owo eke ebietde enye ke otu kpukpru owo?” Ndien kpukpru owo ẹfiori, ẹnyụn̄ ẹdọhọ ẹte: “Yak itọn̄ uwem ọsọn̄ edidem!”+ 25  Ntem Samuel etịn̄ ọnọ mmọ se edidem ediyomde+ onyụn̄ ewet emi esịn ke n̄wed ekenịm ke iso Jehovah. Ekem Samuel ọdọhọ kpukpru owo ẹnyọn̄ọ ufọk mmọ kiet kiet. 26  Ndien Saul ọnyọn̄ ufọk esie ke Gibeah,+ mbon uko emi Abasi okotụkde mmọ esịt ẹnyụn̄ ẹsan̄a ye enye.+ 27  Edi mbukpo owo+ ẹdọhọ ẹte: “Enye emi edisan̄a didie anyan̄a nnyịn?”+ Ndien mmọ ẹsịn enye ke ndek,+ inyụn̄ idaha enọ isọk enye.+ Edi enye isioroke uyo.+

Mme Ikọ Idakisọn̄