Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

1 Ndidem 18;1-46

18  Edikem ke ediwak usen ẹma ẹkebe+ uyo Jehovah esịm Elijah ke ọyọhọ isua ita, ete: “Ka kowụt Ahab idem, koro mmebiere ndinam edịm edep ke iso isọn̄.”+  Ntre Elijah aka ndiwụt Ahab idem, ke adan̄aemi akan̄ osụk ọsọn̄de+ ubọk ke Samaria.  Ekem Ahab okot Obadiah emi esede aban̄a mbonufọk+ esie. (Obadiah ekedi owo emi abakde+ Jehovah etieti.  Edikem ke ini Jezebel+ owotde mme prọfet+ Jehovah, Obadiah ada prọfet ikie onyụn̄ edịp mmọ owo aba ye duop, aba ye duop, ke abaitiat, ndien esida uyo ye mmọn̄ ọsọk mmọ.)+  Ndien Ahab ọdọhọ Obadiah ete: “San̄a kanade obio, ka kpukpru idịm mmọn̄ ye mme itịghede mmọn̄. Ekeme ndidi nnyịn iyokụt awawa mbiet+ man ikpada inịm mme enan̄-mbakara ye mme mule uwem man mme unam emi ẹkûkpan̄a+ aba.”  Ntre mmọ ẹbahade mme isọn̄ emi mmọ ẹdisan̄ade ẹka ke otu idemmọ. Ahab odụk n̄kan̄ kiet, Obadiah onyụn̄ odụk n̄kan̄ eken.+  Nte Obadiah osụk akade ke usụn̄, sese, Elijah ọbiọn̄ọde enye ke iso.+ Ke ndondo oro enye ọdiọn̄ọ enye onyụn̄ ọduọ ke isọn̄ ekịbi iso+ onyụn̄ ọdọhọ ete: “Ọbọn̄+ mi Elijah, afo edi emi?”  Ndien enye ọbọrọ enye ete: “Ami ke edi. Ka kọdọhọ ọbọn̄+ fo ete, ‘Elijah mmọmi.’”  Edi enye obụp enye ete: “Nso idiọkn̄kpọ+ ke nnam emi esịnde fi oyom ndida owo fo nsịn Ahab ke ubọk man owot mi? 10  Ma uwem+ Jehovah Abasi fo, idụhe idụt m̀mê obio ubọn̄ emi ọbọn̄ mi mîdọn̄ke ẹka ẹkeyom fi. Ndien ke ini mmọ ẹdọhọde, ‘Enye idụhe mi,’ enye anam obio ubọn̄ ye idụt oro ẹn̄wọn̄ọ ke mmimọ ikwe fi.+ 11  Ndien, ke emi, afo ete, ‘Ka kọdọhọ ọbọn̄ fo ete: “Elijah mmọmi.”’ 12  Ndien ama ekem, ke ndahade n̄kpọn̄ fi, spirit+ Jehovah eyemen fi aka ebiet eke ami mmemfiọkke; ndien mma n̄ketịn̄ nnọ Ahab, enye mînyụn̄ ikwe fi, enye iditreke ndiwot+ mi, koro asan̄autom fo abakde Jehovah toto ke uyen+ esie. 13  Nte owo iketịn̄ke inọ ọbọn̄ mi se n̄kanamde ke ini Jezebel okowotde mme prọfet Jehovah, nte n̄kedịpde ndusụk prọfet Jehovah kpa irenowo ikie, aba ye duop, aba ye duop ke mme abaitiat,+ nte n̄konyụn̄ ndade uyo ye mmọn̄ nsọk mmọ?+ 14  Ndien, ke emi, afo ọdọhọ ete, ‘Ka, kọdọhọ ọbọn̄ fo ete: “Elijah mmọmi.”’ Ndien enye iditreke ndiwot mi.”+ 15  Edi Elijah ọdọhọ enye ete: “Ma uwem+ Jehovah mme udịm+ emi ndade ke iso esie, ami mmọn̄ mmen idem n̄kowụt enye mfịn emi.” 16  Ndien Obadiah aka okosobo ye Ahab onyụn̄ asian enye; ntre Ahab adaha aka ndisobo ye Elijah. 17  Edikem ke ndondo oro Ahab okụtde Elijah, Ahab obụp enye inikiet inikiet ete: “Ndi afo edi emi, afo emi adade afanikọn̄ ọsọk Israel?”+ 18  Ntem enye ọbọrọ ete: “Idịghe ami nda afanikọn̄+ nsọk Israel, edi afo ye ufọk usọ ẹda ẹsọk,+ koro mbufo ẹkpọn̄de mme ewụhọ Jehovah+ ẹtiene Baal.+ 19  Mmọdo dọn̄ ẹkebon ofụri Israel ọtọkiet ẹnọ mi ke Obot Carmel+ ọkọrọ ye mme prọfet Baal+ ikie inan̄ ye aba ye duop ye mme prọfet eto utuakibuot+ ikie inan̄, emi ẹdiade n̄kpọ ke okpokoro Jezebel.”+ 20  Ntre Ahab ọdọn̄ ẹka ke otu kpukpru nditọ Israel ẹkekot mme prọfet+ ẹbon ọtọkiet ke Obot Carmel. 21  Ekem Elijah asan̄a ekpere kpukpru owo onyụn̄ obụp ete: “Adan̄a didie ke mbufo ẹdisọk ukot edem iba?+ Edieke Jehovah edide ata Abasi, mbufo ẹtiene enye;+ onyụn̄ edieke edide Baal, ẹtiene enye.” Edi mmọ ibọrọke enye baba ikọ kiet. 22  Ndien Elijah ọdọhọ ete: “Ami kpọt nsụhọ nte prọfet Jehovah,+ ami ikpọn̄, ke adan̄aemi mme prọfet Baal ẹdide owo ikie inan̄ ye aba ye duop. 23  Yak mmọ ẹnọ nnyịn abak nyara enan̄ iba, mbufo ẹmek abak ayara enan̄ kiet ẹnyụn̄ ẹbak enye ẹdori ke ifia, edi ẹkûsịn ikan̄. Ami nyonyụn̄ ndiọn̄ abak ayara enan̄ enye eken ndori ke ifia, edi ndisịnke ikan̄. 24  Ndien mbufo ẹkot enyịn̄ abasi mbufo,+ ami nyonyụn̄ n̄kot enyịn̄ Jehovah; ndien Abasi emi edidade ikan̄+ ọbọrọ edi ata Abasi.”+ Ntem kpukpru owo ẹbọrọ ẹte: “Oro ọfọn.” 25  Ekem Elijah ọdọhọ mme prọfet Baal ete: “Mbufo ẹmek abak ayara enan̄ kiet ẹnyụn̄ ẹbem iso ẹdiọn̄ enye, koro mbufo ẹwakde ẹkan; ndien ẹkot enyịn̄ abasi mbufo, edi ẹkûsịn ikan̄.” 26  Ntre mmọ ẹda abak ayara enan̄ oro enye ọkọnọde mmọ. Ndien mmọ ẹdiọn̄ enye, ẹnyụn̄ ẹfiori ẹkot enyịn̄ Baal ọtọn̄ọde ke usenubọk tutu esịm ufọt uwemeyo, ẹte: “O Baal, yere nnyịn!” Edi owo ikopke baba uyo kiet,+ baba owo kiet inyụn̄ iyereke.+ Ndien mmọ ẹfrọ ẹkanade itieuwa oro mmọ ẹkenamde. 27  Edikem ke esịmde ufọt uwemeyo, Elijah asak mmọ nsahi+ onyụn̄ ọdọhọ ete: “Mbufo ẹfiori ẹkot ke ọkpọsọn̄ uyo, koro enye edide abasi;+ koro eyedi enyene se enye ekerede, ekeme ndidi ikọt ọdọn̄ enye+ ndien enye aka ufọk ekwe.+ Mîdịghe ekeme ndidi enye edede ndien enye enyene ndidemede!”+ 28  Ndien mmọ ẹfiori ẹkot enye ke ọkpọsọn̄ uyo ẹnyụn̄ ẹda ikwa ye eduat ẹkpi+ ẹnyụn̄ ẹkịm idemmọ nte ido mmọ edide, tutu iyịp ọwọrọ. 29  Edikem ke ebede ufọt uwemeyo, mmọ ẹnyụn̄ ẹka iso ndinam n̄kpọ nte mme prọfet+ tutu esịm ini emi ẹwade uwa n̄kpasịp, owo ikopke baba uyo kiet, owo baba kiet iyereke, inyụn̄ idụhe owo eke akpan̄de utọn̄ ọnọ mmọ.+ 30  Ekem Elijah ọdọhọ kpukpru owo ete: “Mbufo ẹsan̄a ẹkpere mi.” Ntre kpukpru owo ẹsan̄a ẹkpere enye. Ndien enye ọdiọn̄ itieuwa Jehovah oro okowụrede.+ 31  Ntem Elijah ada itiat duopeba, nte ekemde ye ibat esien nditọ Jacob, emi uyo Jehovah ekesịmde+ ete: “Afo edikabade ekere Israel.”+ 32  Ndien enye ada mme itiat emi ọbọp itieuwa+ ke enyịn̄ Jehovah+ onyụn̄ ọdọk ukpe emi ekperede nditara n̄kem se ẹdade ẹtọ udomo seah n̄kpasịp iba, akanade itieuwa oro. 33  Ekem enye etịm ifia+ onyụn̄ ọdiọn̄ abak ayara enan̄ oro odori ke mme ifia oro. Ndien enye ọdọhọ ete: “Mbufo ẹkoi mmọn̄ ẹyọhọ ikpọ aban̄ inan̄ ẹmen ẹdiduọk ke edifọp uwa ye ke mme ifia emi.” 34  Enye onyụn̄ ọdọhọ ete: “Ẹtọn̄ọ ntak ẹnam.” Ntre mmọ ẹtọn̄ọ ntak ẹnam. Edi enye ete: “Ẹnam ọyọhọ utịm ikata.” Ntre mmọ ẹnam ọyọhọ utịm ikata. 35  Ndien mmọn̄ ọfiọrọ akanade ofụri itieuwa oro, enye onyụn̄ ọdọn̄ mmọn̄ ọyọhọ ukpe oro. 36  Edikem ke ini+ uwa n̄kpasịp, prọfet Elijah asan̄a ekpere onyụn̄ ọdọhọ ete: “O Jehovah, Abasi Abraham+ ye Isaac+ ye Israel,+ nam ẹfiọk mfịn emi nte ke afo edi Abasi ke Israel+ ye nte ke ami ndi asan̄autom fo ye nte ke uyo+ fo ke ami nda nnam kpukpru n̄kpọ emi. 37  Yere mi, O Jehovah, yere mi, man mbon emi ẹfiọk ẹte ke afo, Jehovah,+ edi ata Abasi, ke afo omonyụn̄ ọwọn̄ọde mmọ esịt.”+ 38  Ndien ikan̄+ Jehovah osụhọde edita edifọp+ uwa oro ye mme ifia ye mme itiat ye ntan, onyụn̄ anam mmọn̄ emi okodude ke ukpe oro asat.+ 39  Ke ini kpukpru owo ẹkụtde n̄kpọ emi, mmọ ẹduọn̄ọ inikiet inikiet ẹkịbi iso+ ẹnyụn̄ ẹdọhọ ẹte: “Jehovah edi ata Abasi! Jehovah edi ata Abasi!” 40  Ndien Elijah ọdọhọ mmọ ete: “Mbufo ẹmụm mme prọfet Baal! Ẹkûyak baba owo mmọ kiet ọbọhọ!” Ndien mmọ ẹmụm mmọ ke ebe oro, Elijah onyụn̄ ada mmọ osụhọde aka itịghede mmọn̄ Kishon+ okowot mmọ do.+ 41  Ekem Elijah ọdọhọ Ahab ete: “Dọk ka, kadia udia nyụn̄ n̄wọn̄ n̄kpọ;+ koro edịm+ ke oyomo ke enyọn̄.” 42  Ndien Ahab ọdọk aka ndidia n̄kpọ nnyụn̄ n̄n̄wọn̄ n̄kpọ. Edi Elijah ọdọk aka enyọn̄ Obot Carmel okosụhọde etie ke isọn̄+ onụk ibuot esịn n̄kpatian̄ ukot+ esie. 43  Ndien enye ọdọhọ isụn̄utom esie ete: “Mbọk dọk ka. Kese edem inyan̄.” Ntre enye ọdọk aka ekese onyụn̄ edidọhọ ete: “N̄kpọ ndomokiet idụhe.” Ndien enye ọdọhọ, “Fiak ka,” utịm ikatiaba.+ 44  Edikem ke ọyọhọ utịm ikatiaba enye edidọhọ ete: “Sese! Ekpri obubịt enyọn̄ emi ebietde ekaubọk ke oto inyan̄ ọdọk.”+ Ndien enye ọdọhọ ete: “Dọk ka, kọdọhọ Ahab, ete, ‘Tịm chariot fo!+ Sụhọde nyọn̄ mbak ọkpọsọn̄ edịm edikụk fi esịn!’” 45  Edikem obubịt enyọn̄ ye ofụm+ ẹnam ikpaenyọn̄ ekịm, ọkpọsọn̄ edịm onyụn̄ edep.+ Ekem Ahab awat ọnyọn̄ ekesịm Jezreel.+ 46  Ndien ubọk Jehovah odu ye Elijah,+ enye onyụn̄ ọbọbọ mbọbọ ke isịn+ efehe ebem Ahab iso ekesịm Jezreel.+

Mme Ikọ Idakisọn̄