Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

1 Ndidem 16;1-34

16  Ndien uyo Jehovah esịm Jehu+ eyen Hanani+ aban̄a Baasha, ete:  “Koro ami n̄kemenerede fi nsio ke ntọn̄+ man nnam fi edi adausụn̄ ọnọ ikọt mi Israel,+ edi afo amakabade asan̄a ke usụn̄ Jeroboam+ onyụn̄ esịn ikọt mi Israel ẹnam idiọkn̄kpọ ẹdue mi,+  sese, ami mmọn̄ n̄kpọri Baasha ye ufọk esie mfep ofụri ofụri, nyonyụn̄ nnam ufọk esie ebiet ufọk Jeroboam eyen Nebat.+  Mme ebua ẹyeta owo ufọk Baasha ekededi eke akpade ke obio; mme inuen enyọn̄ ẹyenyụn̄ ẹta owo esie ekededi eke akpade ke ikọt.”+  Amaedi mme n̄kpọ en̄wen emi ẹban̄ade Baasha ye se enye akanamde ye odudu esie, nte owo iwetke mmọ isịn ke n̄wed+ n̄kpọntịbe eyo ndidem Israel?  Ekem Baasha osụhọde ana ye mme ete ete esie ẹnyụn̄ ẹbụk enye ke Tirzah;+ ndien Elah eyen esie ọtọn̄ọ ndikara ke itie esie.  Ndien, n̄ko, Jehovah ọdọn̄ Prọfet Jehu eyen Hanani utom ọnọ Baasha ye ufọk esie+ ke ntak kpukpru idiọkn̄kpọ emi enye akanamde ke enyịn Jehovah ke ndida utom ubọk esie+ nyat enye esịt,+ man ufọk esie akabade etie nte ufọk Jeroboam, koro enye okonyụn̄ owotde enye.*+  Ke ọyọhọ isua edịp ye itiokiet emi Asa edidem Judah akarade, Elah eyen Baasha akabade edi edidem ke Israel ke Tirzah ke isua iba.  Ndien Zimri+ asan̄autom esie kpa etubom ubak mme chariot odụk odu aban̄a enye, ke adan̄aemi enye odude ke Tirzah ọn̄wọn̄ mmịn+ akpa ke ufọk Arza, emi esede aban̄a mbonufọk+ Tirzah. 10  Ndien Zimri odụk ediwot+ enye ke ọyọhọ isua edịp ye itiaba emi Asa edidem Judah akarade, ndien enye ọtọn̄ọ ndikara ke itie esie. 11  Edikem ke ini enye ọtọn̄ọde ndikara, ke ndondo oro enye osụhọrede etie ke ebekpo, enye owot kpukpru mbonufọk Baasha. Enye ikayakke erenowo+ baba kiet m̀mê mme osio usiene iyịp+ esie m̀mê mme ufan esie ẹsụhọ. 12  Ntem ke Zimri osobo ofụri ufọk Baasha,+ nte ekemde ye se Jehovah+ akadade prọfet Jehu+ etịn̄ aban̄a Baasha, 13  ke ntak kpukpru idiọkn̄kpọ Baasha ye mme idiọkn̄kpọ Elah+ eyen esie, emi mmọ ẹkenamde, emi mmọ ẹkenyụn̄ ẹsịnde Israel ẹnam ke ndida mme ikpîkpu mbiet+ mmọ ndue Jehovah Abasi Israel. 14  Amaedi mme n̄kpọ en̄wen emi ẹban̄ade Elah ye kpukpru se enye akanamde, nte owo iwetke mmọ isịn ke n̄wed+ n̄kpọntịbe eyo ndidem Israel? 15  Ke ọyọhọ isua edịp ye itiaba emi Asa edidem Judah akarade, Zimri akabade edi edidem ke usen itiaba+ ke Tirzah, ke adan̄aemi mbio obio ẹnamde nna ke Gibbethon+ mbon Philistia. 16  Ekem mbon oro ẹnamde nna ẹkop ẹdọhọde ẹte: “Zimri omodụk odu, onyụn̄ owot edidem.” Mmọdo ofụri Israel ẹnam Omri+ etubom udịmekọn̄ akabade edi edidem Israel ke usen oro ke itienna. 17  Ndien Omri ye ofụri Israel emi ẹdude ye enye ẹto ke Gibbethon ẹdọk ẹdikan Tirzah ẹkụk.+ 18  Ndien ke ndondo oro Zimri okụtde ete ke ẹkan obio oro ẹkụk, enye ndien odụk tọwa ufọkidụn̄ edidem ọkọfọp ufọk edidem ke adan̄aemi enye ke idemesie odude ke esịt, ndien enye akpa,+ 19  ke ntak idiọkn̄kpọ emi enye akanamde ke ndinam se idiọkde ke enyịn Jehovah+ ke ndisan̄a ke usụn̄ Jeroboam ye ke idiọkn̄kpọ emi enye akanamde ke ndisịn Israel ẹnam idiọkn̄kpọ.+ 20  Amaedi mme n̄kpọ en̄wen emi ẹban̄ade Zimri ye odu emi enye okodụkde, nte owo iwetke mmọ isịn ke n̄wed+ n̄kpọntịbe eyo ndidem Israel? 21  Adan̄aoro ke nditọ Israel ẹkebahade idemmọ ẹsịn ke otu iba.+ Otu kiet edi mme anditiene Tibni eyen Ginath, man ẹnam enye edidem, ndien otu enye eken edi mme anditiene Omri. 22  Ekem mbon emi ẹtienede Omri ẹkan mbon emi ẹtienede Tibni eyen Ginath; tutu Tibni akpa, ndien Omri ada ubọn̄. 23  Ke ọyọhọ isua edịp ye duopekiet emi Asa edide edidem Judah, Omri akabade edi edidem Israel ke isua duopeba. Ndien enye akara ke Tirzah ke isua itiokiet. 24  Ekem enye aka ọkọbọ Shemer obot Samaria edep ke talent silver iba, ndien ọbọp obio ke obot oro onyụn̄ osio obio oro Samaria,+ kpa enyịn̄ Shermer etubom obot oro. 25  Ndien Omri anam se idiọkde ke enyịn Jehovah onyụn̄ anam ọdiọk akan kpukpru mbon emi ẹkebemde enye iso ẹdu.+ 26  Ndien enye asan̄a ke kpukpru usụn̄ oro Jeroboam eyen Nebat+ akasan̄ade ye idiọkn̄kpọ emi enye ekesịnde Israel ẹnam ke ndida mme ikpîkpu mbiet+ mmọ ndue Jehovah Abasi Israel. 27  Amaedi mme n̄kpọ en̄wen emi ẹban̄ade Omri, se enye akanamde ye odudu emi enye ekenyenede, nte owo iwetke mmọ isịn ke n̄wed+ n̄kpọntịbe eyo ndidem Israel? 28  Ekem Omri osụhọde ana ye mme ete ete esie ẹnyụn̄ ẹbụk enye ke Samaria; ndien Ahab+ eyen esie ọtọn̄ọ ndikara ke itie esie. 29  Ndien Ahab eyen Omri akabade edi edidem Israel ke ọyọhọ isua edịp ye efịteta emi Asa akarade nte edidem Judah; ndien Ahab eyen Omri aka iso akara Israel ke Samaria+ ke isua edịp ye iba. 30  Ndien Ahab eyen Omri anam se idiọkde ke enyịn Jehovah akan kpukpru mbon oro ẹkebemde enye iso ẹdu.+ 31  Ndien ekem, nte n̄kpọ eke ẹdọhọde ke ndisan̄a ke idiọkn̄kpọ Jeroboam+ eyen Nebat ekedi ata ekpri+ n̄kpọ, enye ada Jezebel+ eyen Ethbaal edidem Sidon+ ọdọ+ ndien aka akanam n̄kpọ ọnọ Baal+ onyụn̄ onụhọ ọnọ enye. 32  N̄ko-n̄ko, enye ọbọp itieuwa ọnọ Baal ke ufọk+ Baal emi enye ọkọbọpde ke Samaria. 33  Ndien Ahab anam eto utuakibuot;+ Ahab onyụn̄ ọdọdiọn̄ anam n̄kpọ ndiyat+ Jehovah Abasi Israel esịt akan kpukpru ndidem Israel emi ẹkebemde enye iso ẹdu. 34  Ke eyo esie ke Hiel owo Bethel ọkọbọp Jericho. Enye ataba Abiram akpan esie ke ini enye esịnde itiat idakisọn̄, onyụn̄ ataba Segub ekperedem eyen esie ke ini enye ọdọn̄de mme usụn̄ esie, nte ekemde ye se Jehovah akadade Joshua eyen Nun etịn̄.+

Mme Ikọ Idakisọn̄

“Enye,” oro edi, Nadab eyen Jeroboam. Se 15:25-29.