Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

1 Ndidem 15;1-34

15  Ndien ke ọyọhọ isua efịteta emi Edidem Jeroboam,+ kpa eyen Nebat+ akarade, Abijam akabade edi edidem ke Judah.+  Enye akakara ke Jerusalem isua ita; ndien eka esie ekekere Maacah,+ eyeyen Abishalom.+  Enye onyụn̄ anam kpukpru idiọkn̄kpọ emi ete esie ekebemde iso anam; enye inyụn̄ isan̄ake ke ofụri esịt+ ye Jehovah Abasi esie nte David ete ete esie akasan̄ade.+  Koro ke ntak David+ ke Jehovah Abasi esie ọkọnọ enye utuenikan̄+ ke Jerusalem, ke ndinam eyen esie etiene enye edem adaha ada onyụn̄ anam Jerusalem aka iso odu,+  koro David ama anam se inende ke enyịn Jehovah, ikonyụn̄ iwọn̄ọkede ikpọn̄ ndinam se ededi oro Enye okowụkde enye ete anam ke ofụri eyouwem esie,+ ibọhọke ke n̄kpọ aban̄ade Uriah owo Hittite.+  Ndien ekọn̄ odu ke ufọt Rehoboam ye Jeroboam ke ofụri eyouwem mmọ.+  Amaedi mme n̄kpọ en̄wen emi ẹban̄ade Abijam ye kpukpru se enye akanamde, nte owo iwetke mmọ isịn ke n̄wed+ n̄kpọntịbe eyo ndidem Judah? Ekọn̄ ama odu n̄ko ke ufọt Abijam ye Jeroboam.+  Ke akpatre Abijam osụhọde ana ye mme ete ete esie, mmọ ẹnyụn̄ ẹbụk enye ke Obio David;+ ndien Asa+ eyen esie akara ke itie esie.  Ke ọyọhọ isua edịp emi Jeroboam edidem Israel akarade, Asa akabade edi edidem Judah. 10  Ndien enye akara ke Jerusalem ke isua aba ye kiet; ekaeka esie ekekere Maacah,+ eyeyen Abishalom.+ 11  Ndien Asa anam se inende ke enyịn Jehovah, kpa nte David ete ete esie akanamde.+ 12  Ndien enye osobo iren akpara temple efep ke isọn̄+ onyụn̄ osion̄o kpukpru mbubiam mbiet+ n̄kpọ* oro mme ete ete esie ẹkenamde+ efep. 13  Ndien enye odorode Maacah,+ eka ete esie, efep ke itie ọbọn̄ an̄wan,+ koro enye akanamde oburobụt mbiet ọnọ eto utuakibuot; ndien ekem Asa esịbe oburobụt mbiet+ oro ọduọk onyụn̄ ọfọp enye+ ke itịghede mmọn̄ Kidron.+ 14  Edi enye ikosion̄oke+ mme edikon̄ ebiet+ ifep. Edi, Asa anam n̄kpọ Jehovah ke ofụri esịt ke ofụri eyouwem esie.+ 15  Ndien enye atan̄ mme n̄kpọ emi ete esie akanamde ẹsana ye mme n̄kpọ emi enye ke idemesie akanamde ẹsana edidọn̄ ke ufọk Jehovah, oro edi, silver ye gold ye n̄kpoduoho.+ 16  Ndien ekọn̄ odu ke ufọt Asa ye Baasha+ kpa edidem Israel ke ofụri eyouwem mmọ. 17  Ntre Baasha edidem Israel ọdọk edi ekọn̄ ye Judah onyụn̄ ọtọn̄ọ ndibọp Ramah+ man okûyak owo ndomokiet ọwọrọ m̀mê odụk etiene Asa edidem Judah.+ 18  Ntem Asa atan̄ kpukpru silver ye gold emi ẹsụhọde ke itie ubon n̄kpọuto ufọk Jehovah ye mme itie ubon n̄kpọuto ufọk edidem ọdọn̄ mme asan̄autom esie ke ubọk; ndien Edidem Asa ọnọ mmọ ẹsọk Ben-hadad+ eyen Tabrimmon, eyen Hezion, kpa edidem Syria,+ emi odụn̄de ke Damascus,+ onyụn̄ ọdọhọ ete: 19  “Ediomi odu ke ufọt mi ye afo, ye ke ufọt ete mi ye ete fo. Sese, mmọnọ silver ye gold ke enọ+ ẹsọk fi. Dibiat ediomi fo ye Baasha edidem Israel, man enye afiak edem ọkpọn̄ mi.”+ 20  Ntem Ben-hadad okop uyo Edidem Asa onyụn̄ ọdọn̄ mme etubom udịmekọn̄ esie ete ẹken̄wana ye mme obio Israel ndien mmọ ẹka ẹkesobo Ijon+ ye Dan+ ye Abel-beth-maacah+ ye ofụri Chinnereth, tutu esịm ofụri isọn̄ Naphtali.+ 21  Edikem ke ndondo oro Baasha okopde n̄kpọ emi, enye ọsọsọp etre ndibọp Ramah+ onyụn̄ aka iso odụn̄ ke Tirzah.+ 22  Ndien Edidem Asa okot ofụri Judah+—isioho owo eto—ndien mmọ ẹketan̄ mme itiat oro ke Ramah ye mme eto oro Baasha akadade ọbọp n̄kpọ; ndien Edidem Asa ada mmọ ọbọp Geba+ ke Benjamin, ye Mizpah.+ 23  Amaedi kpukpru n̄kpọ en̄wen emi ẹban̄ade Asa ye kpukpru odudu esie ye kpukpru se enye akanamde ye kpukpru obio emi enye ọkọbọpde, nte owo iwetke mmọ isịn ke n̄wed+ n̄kpọntịbe eyo ndidem Judah? N̄kukụre edi nte ke enye ama ọkọsọn̄,+ udọn̄ọ ama omụm enye ikpat.+ 24  Ekem Asa osụhọde ana ye mme ete ete+ esie ẹnyụn̄ ẹbụk enye ye mme ete ete esie ke Obio David ete ete esie;+ ndien Jehoshaphat+ eyen esie akara ke itie esie. 25  Ndien Nadab+ eyen Jeroboam akabade edi edidem Israel ke ọyọhọ isua iba emi Asa edidem Judah akarade; ndien enye aka iso akara Israel ke isua iba. 26  Ndien enye anam se idiọkde+ ke enyịn Jehovah onyụn̄ asan̄a ke usụn̄ ete+ esie ye ke idiọkn̄kpọ emi enye ekesịnde Israel ẹnam.+ 27  Ndien Baasha+ eyen Ahijah ke ufọk Issachar odụk odu aban̄a enye; ndien Baasha owot enye ke Gibbethon,+ kpa obio mbon Philistia, ke adan̄aemi Nadab ye ofụri Israel ẹkande Gibbethon ẹkụk. 28  Ntre Baasha owot enye ke ọyọhọ isua ita emi Asa edidem Judah akarade onyụn̄ akara ke itie esie.+ 29  Edikem ke ndondo oro enye akabarede edi edidem, enye osobo kpukpru ufọk Jeroboam. Enye ikayakke owo ndomokiet emi en̄wekde ibifịk osụhọ ke ufọk Jeroboam tutu enye osobo mmọ ama, nte Jehovah ọkọdọhọde ebe ke Ahijah asan̄autom esie kpa owo Shiloh,+ 30  ke ntak idiọkn̄kpọ emi Jeroboam akanamde+ ye ke ndisịn Israel ẹnam idiọkn̄kpọ ye ke enye ndikanam esịt ayat Jehovah Abasi Israel.+ 31  Amaedi mme n̄kpọ en̄wen emi ẹban̄ade Nadab ye kpukpru se enye akanamde, nte owo iwetke mmọ isịn ke n̄wed+ n̄kpọntịbe eyo ndidem Israel? 32  Ndien ekọn̄ odu ke ufọt Asa ye Baasha edidem Israel ke ofụri eyouwem mmọ.+ 33  Ndien ke ọyọhọ isua ita emi Asa edidem Judah akarade, Baasha eyen Ahijah akabade edi edidem ke ofụri Israel ke Tirzah ke isua edịp ye inan̄.+ 34  Ndien enye anam se idiọkde ke enyịn Jehovah+ onyụn̄ asan̄a ke usụn̄ Jeroboam+ ye ke idiọkn̄kpọ emi enye ekesịnde Israel ẹnam.+

Mme Ikọ Idakisọn̄

Ikọ emi enyene ebuana ye ifuọ enan̄.