Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

1 Ndidem 12;1-33

12  Ekem Rehoboam+ aka Shechem, koro edi ke Shechem+ ke ofụri Israel ẹkedi ndinam enye edidem.  Edikem ke ndondo oro Jeroboam+ eyen Nebat okopde n̄kpọ emi, ke adan̄aemi enye osụk odude ke Egypt (koro enye ekefehede ke ntak Edidem Solomon, man okodụn̄ ke Egypt),+  mmọ ẹdọn̄ ẹkekot enye edi. Ekem Jeroboam ye ofụri esop Israel ẹdi ẹdidọhọ Rehoboam ẹte:+  “Ete fo ama anam ọkpọnọ nnyịn odobi, edi afo nam ọkpọsọn̄ utom oro ete fo ọkọnọde nnyịn ye ndodobi ọkpọnọ+ oro enye ọkọkọn̄ọde nnyịn ẹfere,+ ndien nnyịn iyanam n̄kpọ inọ fi.”+  Ntem enye ọdọhọ mmọ ete: “Mbufo ẹnyọn̄ọ, ẹnyụn̄ ẹfiak ẹdi ebịne mi ke ọyọhọ usen ita.”+ Ntre mmọ ẹnyọn̄ọ.  Ndien Edidem Rehoboam oyom item oto mbiowo+ oro ẹkesinọde Solomon ete esie item ke adan̄aemi enye okodude ke uwem, onyụn̄ obụp ete: “Mbufo ẹteme ẹte mbọrọ mbio emi nso?”+  Ndien mmọ ẹbọrọ enye ẹte: “Edieke afo edidide asan̄autom ọnọ mbio emi mfịn emi onyụn̄ anam n̄kpọ ọnọ mmọ,+ afo enyene ndibọrọ nnyụn̄ ndọhọ mmọ nti ikọ;+ ndien mmọ ẹyedi mme asan̄autom fo kpukpru ini.”+  Edi, enye ọkpọn̄ item oro mbiowo ẹkenọde enye, okoyom item oto n̄kparawa oro ẹkekọride ye enye,+ emi ẹkenyụn̄ ẹnamde n̄kpọ ẹnọ enye.+  Ndien enye obụp mmọ ete: “Nso item+ ke mbufo ẹnyene ndinọ man nnyịn ikpada ibọrọ mbio emi ẹdọhọde mi ẹte, ‘Nam ọkpọnọ oro ete fo ọkọkọn̄ọde nnyịn efere’?”+ 10  Ndien n̄kparawa oro ẹkekọride ye enye ẹdọhọ enye ẹte: “Ntem ke afo edidọhọ+ mbio emi ẹkedọhọde fi ẹte, ‘Ete fo ama anam ọkpọnọ nnyịn odobi, edi afo nam enye efere nnyịn ke idem’; dọhọ mmọ ntem ete, ‘Ekpri nnuenubọk mi emi oyodobi akan ifụhi ete mi.+ 11  Ndien ete mi ọkọkọn̄ọ mbufo ndodobi ọkpọnọ; edi ami nyanam ọkpọnọ oro etetịm odobi.+ Ete mi akakama ikpa amia mbufo, edi ami ndikama ikpa n̄kukịm mmia mbufo.’”+ 12  Ndien Jeroboam ye kpukpru owo ẹdi ke ọtọ Rehoboam ke ọyọhọ usen ita, kpa nte edidem ọkọdọhọde ete: “Ẹfiak ẹdi ẹbịne mi ke ọyọhọ usen ita.”+ 13  Ndien edidem ọbọrọ mbon emi ikọ uyat uyat,+ onyụn̄ ọkpọn̄ item emi mbiowo ẹkenọde enye.+ 14  Ndien enye ọbọrọ mmọ nte n̄kparawa ẹketemede enye,+ ete: “Ete mi ama anam ọkpọnọ mbufo odobi, edi ami nyọkọrọ efen ke ọkpọnọ mbufo. Ete mi akakama ikpa amia mbufo, edi ami ndikama ikpa n̄kukịm mmia mbufo.”+ 15  Ndien edidem ikopke uyo mbon emi+ koro Jehovah akanam n̄kpọ emi etịbe,+ man enye akpanam ikọ+ esie oro Jehovah akadade Ahijah+ owo Shiloh etịn̄ ọnọ Jeroboam eyen Nebat osu. 16  Ke ini ofụri Israel ẹkụtde ke edidem ikopke uyo mmimọ, mmọ ẹbọrọ edidem ẹte: “Nso udeme ke nnyịn inyene ke David?+ Nnyịn inyụn̄ inyeneke udeme ndomokiet ke eyen Jesse. O Israel, ẹfiak ẹtiene mme abasi+ mbufo. O David,+ se ban̄a ufọk fo!” Ntem Israel ẹnyọn̄ọ ẹka mme tent mmọ. 17  Ndien Rehoboam aka iso akara nditọ Israel emi ẹdụn̄de ke mme obio Judah.+ 18  Ekem Edidem Rehoboam osio Adoram,+ emi esede aban̄a mbon oro ẹnyịkde ẹnam ọkpọsọn̄ utom+ ọdọn̄, edi ofụri Israel ẹtọn̄ọ enye ke itiat+ ẹwot. Ndien Edidem Rehoboam an̄wana adaha ọdọk chariot esie efehe ọnyọn̄ Jerusalem. 19  Ndien nditọ Israel ẹka iso ẹsọn̄ ibuot+ ye ufọk David tutu esịm mfịn emi.+ 20  Ndien ke ndondo oro ofụri Israel ẹkopde ke Jeroboam ọnyọn̄ edi, mmọ ẹsọsọp ẹdọn̄ ẹkekot enye edi iso esop ẹnyụn̄ ẹnam enye edidem ofụri Israel.+ Baba owo mmọ kiet itieneke ufọk David ke mîbọhọke esien Judah kpọt.+ 21  Ke ini Rehoboam esịmde Jerusalem,+ enye ọsọsọp anam ofụri ufọk Judah ye esien Benjamin+ ẹsop idem ọtọkiet, ata nti irenowo emi ẹkopde idem ndika ekọn̄, owo tọsịn ikie ye anan̄, man ẹken̄wana ye ufọk Israel ẹnyụn̄ ẹda itie edidem ẹfiak ẹsọk Rehoboam eyen Solomon. 22  Ekem uyo ata Abasi esịm Shemaiah+ owo ata Abasi,+ ete: 23  “Dọhọ Rehoboam eyen Solomon edidem Judah ye ofụri ufọk Judah ye Benjamin ye mbio eken, ete, 24  ‘Ntem ke Jehovah ọdọhọ ete: “Mbufo ẹkûdọk ẹken̄wana ye nditọete mbufo kpa nditọ Israel.+ Mbufo ẹfiak ẹnyọn̄ọ ufọk mbufo, koro edi ami nnam n̄kpọ emi etịbe.”’”+ Ntre mmọ ẹkop uyo Jehovah,+ ẹnyụn̄ ẹfiak ẹnyọn̄ọ ufọk mmọ ke uyo Jehovah.+ 25  Ndien Jeroboam aka ọkọbọp Shechem+ ke obot obot ikpehe Ephraim onyụn̄ odụn̄ do. Ekem enye oto do ọkọbọp Penuel.+ 26  Ndien Jeroboam ekere ke esịt esie ete:+ “Ke emi, ubọn̄ ọmọn̄ afiak ọnyọn̄ ufọk David.+ 27  Edieke mbio emi ẹkade iso ndidọk n̄kawa uwa ke ufọk Jehovah ke Jerusalem,+ esịt mmọ ayafiak etiene ọbọn̄ mmọ, Rehoboam edidem Judah; ndien mmọ ẹyewot mi+ ẹnyụn̄ ẹfiak ẹtiene Rehoboam edidem Judah.” 28  Ndien edidem ọbọ item+ onyụn̄ ada gold anam nditọ enan̄+ iba onyụn̄ ọdọhọ mbio emi ete: “Ọsọn̄ akaha mbufo ndidọk n̄ka Jerusalem. O Israel, sese Abasi+ mbufo mi, emi akadade mbufo ọwọrọ ke isọn̄ Egypt.”+ 29  Ndien enye enịm kiet ke Bethel,+ onyụn̄ enịm enye eken ke Dan.+ 30  Ndien n̄kpọ emi akabade edi ntak idiọkn̄kpọ,+ mme owo ẹnyụn̄ ẹka Dan ẹketuak ibuot ẹnọ eyen enan̄. 31  Ndien enye ọbọp ufọk edikon̄ ebiet+ onyụn̄ osion̄o mme owo ke otu mbio obio, emi mîdịghe nditọ Levi enịm ke mme oku.+ 32  Ndien Jeroboam anam usọrọ ke ọyọhọ ọfiọn̄ itiaita, ke ọyọhọ usen efịt ke ọfiọn̄ oro, kpa nte usọrọ emi ẹsinịmde ke Judah,+ man enye awa uwa ke itieuwa oro enye akanamde ke Bethel,+ onyụn̄ awa uwa ọnọ nditọ enan̄ oro enye akanamde; ndien enye enịm mme oku ke Bethel ke mme edikon̄ ebiet emi enye akanamde. 33  Enye onyụn̄ awa uwa ke itieuwa oro enye akanamde ke Bethel ke ọyọhọ usen efịt, ke ọyọhọ ọfiọn̄ itiaita, ke ọfiọn̄ emi enye ọkọtọn̄ọde ke idemesie;+ ndien enye anam usọrọ ọnọ nditọ Israel, ọfọp uwa ke itieuwa oro onyụn̄ anam nsụn̄ikan̄ uwa ọwọrọ ọdọk.+

Mme Ikọ Idakisọn̄