Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

1 Ndidem 1;1-53

1  Ekem Edidem David ọsọn̄+ onyụn̄ awak usen; ndien ẹda ọfọn̄ ẹfụk enye, edi enye ikopke ufiop.  Ntre mme asan̄autom esie ẹdọhọ enye ẹte: “Yak ẹyom eyenan̄wan eke mîfiọkke erenowo,+ ẹnọ ọbọn̄ mi edidem, ndien enye ayanam+ n̄kpọ ọnọ edidem, onyụn̄ ese+ enye enyịn; ndien enye ayana ke ikpanesịt+ fo, ndien ọbọn̄ mi edidem oyokop ufiop.”+  Mmọ ẹsan̄a ẹyom ediye eyenan̄wan ke ofụri obio Israel, ndien ẹkụt Abishag+ eyenan̄wan Shunem+ ẹnyụn̄ ẹda enye ẹsọk edidem.  Eyenan̄wan emi ama eye ata etieti;+ ndien enye ese edidem enyịn onyụn̄ anam n̄kpọ ọnọ enye, edi edidem inyeneke ebuana idan̄ ye enye.  Ke ofụri ini emi, Adonijah+ eyen Haggith+ ke emenede idem ke enyọn̄,+ onyụn̄ ọdọhọ ete: “Ami mmọn̄ n̄kara nte edidem!”+ Ndien enye etịm chariot ọnọ idemesie, onyụn̄ etịm mme awat enan̄-mbakara, owo aba ye duop ẹnyụn̄ ẹfehe ebe iso ẹnọ enye.+  Ndien ete esie itịn̄ke n̄kpọ ini ekededi ndiyat enye esịt, idọhọ ite: “Ntak anamde n̄kpọ ntem?”+ Enye ekedi ata ediye owo,+ eka esie okonyụn̄ aman enye adian Absalom.  Ndien enye aka akadian idem ye Joab eyen Zeruiah ye Abiathar+ oku, ndien mmọ ẹn̄wam enye ẹnyụn̄ ẹkabade ẹdi mme anditiene Adonijah.+  Edi Zadok+ oku ye Benaiah+ eyen Jehoiada ye prọfet Nathan+ ye Shimei+ ye Rei ye n̄kpọsọn̄ owo+ David ikadianke+ idem ye Adonijah.  Ekem Adonijah awa+ erọn̄ ye enan̄ ye mme unam emi ẹnyenede isek ekpere itiat Zoheleth, emi odude ekpere En-rogel,+ onyụn̄ okot kpukpru nditọete esie kpa nditọ edidem+ ye kpukpru mbon Judah emi ẹdide mme asan̄autom edidem; 10  edi enye ikotke prọfet Nathan ye Benaiah ye n̄kpọsọn̄ owo David ye Solomon eyenete esie. 11  Ekem Nathan+ ọdọhọ Bath-sheba,+ eka Solomon+ ete: “Nte afo ukopke ke Adonijah eyen Haggith+ amakabade edi edidem, ndien David ọbọn̄ nnyịn ifiọkke emi ndomo esisịt? 12  Ndien, ke emi, mbọk di man nteme+ fi se edinamde. Afo nyụn̄ nyan̄a ukpọn̄ fo ye ukpọn̄ Solomon+ eyen fo. 13  Ka ke ọtọ Edidem David, kọdọhọ enye ete, ‘Ọbọn̄ mi edidem, nte idịghe afo ọkọn̄wọn̄ọ ọnọ ofụn an̄wan fo ete: “Solomon eyen fo edida itie mi nte edidem, ye nte ke enye editie ke ebekpo mi”?+ Ndien nso inam Adonijah akabarede edi edidem?’ 14  Sese! Ke ini edisụk etịn̄de ikọ emi ye edidem, ami nyodụk ntiene fi, man ndisọn̄ọ ikọ fo.”+ 15  Ntem Bath-sheba odụk etiene edidem ke esịt+ ubet, edidem ama onyụn̄ ọsọn̄ etieti,+ ndien Abishag+ eyenan̄wan Shunem ke akanam n̄kpọ ọnọ edidem. 16  Ndien Bath-sheba onụhọ onyụn̄ ọduọ ke isọn̄+ ke iso edidem, ndien edidem obụp enye ete: “Nso idi eben̄e fo?”+ 17  Ntem enye ọdọhọ edidem ete: “Ọbọn̄ mi,+ edi afo akada enyịn̄ Jehovah Abasi ọn̄wọn̄ọ ọnọ ofụn an̄wan fo ete, ‘Solomon eyen fo edida itie mi nte edidem, edi enye edinyụn̄ etie ke ebekpo mi.’+ 18  Ndien, ke emi, sese! Adonijah+ amakabade edi edidem, edi ọbọn̄ mi edidem ifiọkke emi ndomo esisịt.+ 19  Ntem enye awa ediwak enan̄ ye mme unam emi ẹnyenede isek ye erọn̄, onyụn̄ okot kpukpru nditọ edidem+ ye Abiathar+ oku ye Joab+ etubom udịmekọn̄; edi ikotke Solomon asan̄autom fo.+ 20  Ndien ọbọn̄ mi edidem—enyịn+ ofụri Israel ẹse fi, man afo asian mmọ enye emi editiede ke ebekpo ọbọn̄ mi edidem, ke itie fo.+ 21  Ndien ama ekem ke ndondo oro ọbọn̄ mi osụhọrede ana ye mme ete ete+ esie, ami ye Solomon eyen mi iyakabade idi mme andidue.” 22  Ndien, sese! ke adan̄aemi enye osụk etịn̄de ikọ emi ye edidem, prọfet Nathan odụk edi.+ 23  Ndien ke ndondo oro ẹsian edidem ẹte: “Sese prọfet Nathan mi!” Ekem enye odụk ediduọ ke iso edidem ekịbi iso ke isọn̄.+ 24  Ndien Nathan ọdọhọ ete: “Ọbọn̄ mi edidem, ndi afo ọkọdọhọ ete, ‘Adonijah edida itie mi nte edidem, edi enye edinyụn̄ etie ke ebekpo mi’?+ 25  Koro enye omosụhọde aka ndiwa+ ediwak enan̄ ye mme unam emi ẹnyenede isek ye erọn̄, omonyụn̄ okot kpukpru nditọ edidem ye mme etubom udịmekọn̄ ye Abiathar oku;+ ndien mmọ ko ke ẹdia, ke ẹn̄wọn̄ ke iso esie, ke ẹnyụn̄ ẹdọhọ ẹte, ‘Yak itọn̄ uwem ọsọn̄ Edidem Adonijah!’+ 26  Edi enye ikotke+ mi asan̄autom fo, ye Zadok+ oku ye Benaiah+ eyen Jehoiada ye Solomon asan̄autom fo. 27  Edieke n̄kpọ emi otode ọbọn̄ mi edidem, do afo unamke asan̄autom fo ọfiọk+ enye emi ekpetiede ke ebekpo ọbọn̄ mi ke itie esie.” 28  Ndien Edidem David ọbọrọ ete: “Mbufo ẹkot Bath-sheba+ ẹnọ mi.” Ntre enye odụk edida ke iso edidem. 29  Ndien edidem ọn̄wọn̄ọ+ ete: “Ma uwem Jehovah+ emi akafakde+ ukpọn̄+ mi osio ke kpukpru nnanenyịn,+ 30  kpa nte n̄kadade enyịn̄ Jehovah Abasi Israel n̄n̄wọn̄ọ nnọ fi nte, ‘Solomon eyen fo edida itie mi nte edidem, enye edinyụn̄ etie ke ebekpo mi ke itie mi!’ ntem ke ndinam mfịn emi.”+ 31  Ndien Bath-sheba onụhọ onyụn̄ ọduọ ke isọn̄+ ke iso edidem, ọdọhọ ete: “Yak itọn̄ uwem ọsọn̄ ọbọn̄ mi Edidem David ke nsinsi!”+ 32  Inikiet inikiet, Edidem David ọdọhọ ete: “Mbufo ẹkot Zadok+ oku ye prọfet Nathan ye Benaiah+ eyen Jehoiada ẹnọ mi.” Ntre mmọ ẹdụk ẹdi iso edidem. 33  Ndien edidem ọdọhọ mmọ ete: “Ẹda mme asan̄autom+ ọbọn̄ mbufo, ẹnyụn̄ ẹnam Solomon eyen mi awat ke uman mule mi,+ ẹnyụn̄ ẹda enye ẹsụhọde ẹka Gihon.+ 34  Ndien yak Zadok ye prọfet Nathan ẹyet enye aran+ do nte edidem Israel; ndien mbufo ẹfri nnụk+ ẹnyụn̄ ẹdọhọ ẹte, ‘Yak itọn̄ uwem ọsọn̄ Edidem Solomon!’+ 35  Ndien mbufo ẹtiene enye ẹdi, yak enye onyụn̄ odụk editie ke ebekpo mi; ndien enye eyedi edidem ke itie mi, ami nyonyụn̄ nnam enye edi adausụn̄ ọnọ Israel ye Judah.” 36  Ndien Benaiah eyen Jehoiada ọbọrọ onyụn̄ ọdọhọ edidem ete: “Amen!+ Jehovah Abasi ọbọn̄ mi edidem akpakam ọdọhọ kpasụk ntre.+ 37  Yak Jehovah odu ye Solomon+ kpa nte enye okodude ye ọbọn̄ mi edidem,+ enye akpakam anam ebekpo esie okpon akan+ eke Edidem David ọbọn̄ mi.” 38  Ndien Zadok+ oku ye prọfet Nathan+ ye Benaiah+ eyen Jehoiada ye mme Cherethite+ ye mme Pelethite+ ẹsụhọde ẹkenam Solomon awat ke uman mule Edidem David,+ ndien ekem ẹda enye ẹsụhọde ẹka Gihon.+ 39  Ekem Zadok oku emen nnụk aran+ ke tent+ eyet Solomon aran;+ ndien mmọ ẹfri nnụk, kpukpru owo ẹnyụn̄ ẹfiori ẹte: “Yak itọn̄ uwem ọsọn̄ Edidem Solomon!”+ 40  Ekem kpukpru owo ẹtiene enye, mmọ ẹnyụn̄ ẹfri ifiom+ ẹnyụn̄ ẹnam akwa idara+ tutu uyom mmọ asiak isọn̄.+ 41  Ndien Adonijah ye kpukpru mbon emi enye okokotde, emi ẹdude ye enye ẹkop uyom emi, ke mmọ ẹma ẹkedia udia ẹma.+ Ke ini Joab okopde uyom nnụk emi, enye obụp inikiet inikiet, ete: “Uyom emi ofụtde+ ko ke obio edi eke nso?” 42  Ke adan̄aemi enye osụk etịn̄de ikọ emi, sese, Jonathan+ eyen Abiathar oku odụk edi. Ndien Adonijah ọdọhọ ete: “Dụk di koro afo edide owo uko, onyụn̄ adade eti mbụk edi.”+ 43  Edi Jonathan ọbọrọ Adonijah ete: “Baba-o! Ọbọn̄ nnyịn Edidem David amanam Solomon edi edidem.+ 44  Ndien edidem ama ọdọn̄ Zadok oku ye prọfet Nathan ye Benaiah eyen Jehoiada ye mme Cherethite ye mme Pelethite ẹsan̄a ye enye, mmọ ẹma ẹnyụn̄ ẹnam enye awat ke uman mule edidem.+ 45  Ndien Zadok oku ye prọfet Nathan ẹma ẹyet enye aran nte edidem+ ke Gihon; ekem mmọ ẹto do ẹdọk ẹdi ye idara, ndien obio ke ofụt. Uyom oro ke mbufo ẹkop oro.+ 46  Ndien n̄ko, Solomon omosụhọde etie ke ebekpo edidem.+ 47  Akan oro, mme asan̄autom edidem ẹma ẹka ẹkekọm ọbọn̄ nnyịn Edidem David ẹnyụn̄ ẹdọhọ ẹte, ‘Abasi fo akpakam ofori enyịn̄ Solomon akan okwo, enye akpakam anam ebekpo esie okpon akan ebekpo fo!’+ Ndien edidem etie ke bed+ onụk ibuot. 48  Edidem onyụn̄ ọdọhọ n̄ko ete, ‘Itoro+ enyene Jehovah Abasi Israel, emi anamde owo odu mfịn emi nditie ke ebekpo mi, onyụn̄ anamde nda enyịn mi n̄kụt emi!’”+ 49  Ndien idem ẹnyek kpukpru mbon oro ẹkekotde, oro ẹdude ye Adonijah, mmọ ẹnyụn̄ ẹdaha kiet kiet ẹnyọn̄ọ.+ 50  Ndien ndịk Solomon anam Adonijah. Ntre enye adaha aka okomụm nnụk itieuwa.+ 51  Ekem ẹtịn̄ ẹnọ Solomon ẹte: “Sese, ndịk Edidem Solomon amanam Adonijah; ndien enye amaka okomụm nnụk itieuwa akama, onyụn̄ ọdọhọ ete, ‘Yak Edidem Solomon ebem iso ọn̄wọn̄ọ ọnọ mi ete ke imọ idiwotke asan̄autom esie ke akan̄kan̄.’” 52  Ntem Solomon ọdọhọ ete: “Edieke enye edidide owo uko, baba idet esie kiet ididuọhọ ke isọn̄;+ edi edieke ẹkụtde se idiọkde ke idemesie,+ enye iditreke ndikpa.”+ 53  Ntre Edidem Solomon ọdọn̄ ẹkeda enye ke itieuwa ẹsụhọde ẹdi. Ndien enye odụk edinụhọ ọnọ Edidem Solomon; ndien Solomon ọdọhọ enye ete: “Nyọn̄ ufọk fo.”+

Mme Ikọ Idakisọn̄