Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Bible ke Intanet | EDISANA N̄WED ABASI-EDIKABADE EKE OBUFA ERERIMBOT

1 John 2;1-29

2  N̄kpri nditọ mi, n̄wet mme n̄kpọ emi nnọ mbufo man mbufo ẹkûnam idiọkn̄kpọ.+ Edi edieke owo ekededi anamde idiọkn̄kpọ, nnyịn imenyene andin̄wam+ emi odude ye Ete, kpa Jesus Christ, edinen owo.+  Enye onyụn̄ edi uwa+ usio-isop+ mme idiọkn̄kpọ nnyịn,+ idịghe eke nnyịn+ ikpọn̄, edi, edi eke ofụri ererimbot n̄ko.+  Nnyịn inyụn̄ ida emi ifiọk ite ke imọfiọk enye, oro edi, edieke nnyịn ikade iso inịm mme ewụhọ esie.+  Owo emi ọdọhọde ete: “Mmọfiọk enye,”+ ndien mînịmke mme ewụhọ esie,+ edi osu nsu, akpanikọ inyụn̄ idụhe owo emi ke esịt.+  Edi owo ekededi eke anamde ikọ esie,+ ke akpanikọ ẹnam ima Abasi ọfọn ama ke esịt owo emi.+ Nnyịn ida emi ifiọk ite imabuana n̄kpọ ye enye.+  Owo emi ọdọhọde ete ke imabuana n̄kpọ+ ye enye enyene mbiomo n̄ko ndika iso nsan̄a nte enye akasan̄ade.+  Ndima, n̄wetke obufa ewụhọ nnọ mbufo, edi n̄wet akani ewụhọ+ emi mbufo ẹma ẹkenyenyene toto ke editọn̄ọ.+ Akani ewụhọ emi edi ikọ eke mbufo ẹkekopde.  N̄ko, ami n̄wet obufa ewụhọ nnọ mbufo, emi edide akpanikọ aban̄a enye ye mbufo, koro ekịm+ ke ebebe efep ndien ata un̄wana+ ke ayayama.  Owo eke ọdọhọde ete imọ idu ke un̄wana edi enye asua+ eyenete esie odu ke ekịm tutu esịm emi.+ 10  Owo eke amade eyenete esie odu ke un̄wana,+ n̄kpọ iduọ inyụn̄ idụhe enye ke idem.+ 11  Edi owo eke asuade eyenete esie odu ke ekịm onyụn̄ asan̄a ke ekịm,+ inyụn̄ ifiọkke ebiet eke enye akade,+ koro ekịm ofụkde enye enyịn. 12  N̄wet mbufo, n̄kpri nditọ, koro ẹfen mme idiọkn̄kpọ mbufo ke ntak enyịn̄ esie.+ 13  N̄wet mbufo, mme ete, koro mbufo ẹmedi ẹdifiọk enye emi okodude toto ke editọn̄ọ.+ N̄wet mbufo, n̄kparawa owo,+ koro mbufo ẹmekan andidiọk.+ N̄wet mbufo, n̄kpri nditọ,+ koro mbufo ẹmedi ẹdifiọk Ete.+ 14  N̄wet mbufo, mme ete,+ koro mbufo ẹmedi ẹdifiọk enye emi okodude toto ke editọn̄ọ.+ N̄wet mbufo, n̄kparawa owo, koro mbufo ẹmekop idem,+ ikọ Abasi onyụn̄ odu mbufo+ ke esịt ndien mbufo ẹmekan andidiọk.+ 15  Ẹkûma ererimbot m̀mê se idude ke ererimbot.+ Edieke owo ekededi amade ererimbot, enye imaha Ete;+ 16  koro kpukpru se idude ke ererimbot+—se idọn̄de obụkidem+ ye se idọn̄de enyịn+ ye edida se owo enyenede n̄wụt idem+—itoho Ete, edi oto ererimbot.+ 17  N̄ko-n̄ko, ererimbot ke ebebe efep ye mme udọn̄ esie,+ edi owo eke anamde uduak+ Abasi ododu ke nsinsi.+ 18  N̄kpri nditọ, akpatre ini edi emi,+ ndien kpa nte mbufo ẹkekopde ẹte andibiọn̄ọ Christ ke edi,+ ediwak mme andibiọn̄ọ Christ ẹkam ẹdodu ke emi;+ emi ke nnyịn ida ifiọk ite akpatre ini edi emi. 19  Mmọ ẹketo ke otu nnyịn ẹwọn̄ọ, edi mmọ ikedịghe eke nnyịn;+ koro edieke mmọ ẹkpekedide eke nnyịn, mmọ ẹkpekedu ye nnyịn.+ Edi mmọ ẹkewọn̄ọ man akpana in̄wan̄-in̄wan̄ nte ke idịghe kpukpru mmọ ẹdi eke nnyịn.+ 20  Enye emi edide edisana emeyet mbufo aran;+ kpukpru mbufo ẹmenyụn̄ ẹnyene ifiọk.+ 21  Idịghe koro mbufo mîfiọkke akpanikọ+ anam n̄wet n̄wed emi nnọ mbufo, edi koro mbufo ẹfiọkde akpanikọ,+ n̄ko koro nsu baba kiet mîtoho akpanikọ.+ 22  Anie edi osu nsu ke mîdịghe owo emi ọdọhọde ete ke Jesus idịghe Christ?+ Owo emi edi andibiọn̄ọ Christ,+ kpa owo emi akan̄de Ete ye Eyen.+ 23  Owo ekededi emi akan̄de Eyen inyeneke unyịme Ete.+ Enye emi enyịmede+ Eyen enyene unyịme Ete.+ 24  Amaedi mbufo, ẹyak se mbufo ẹkekopde toto ke editọn̄ọ odu mbufo ke esịt.+ Edieke se mbufo ẹkekopde toto ke editọn̄ọ odude mbufo ke esịt, mbufo n̄ko ẹyebuana n̄kpọ+ ye Eyen ẹnyụn̄ ẹbuana n̄kpọ ye Ete.+ 25  N̄ko-n̄ko, emi edi n̄kpọ oro enye ọkọn̄wọn̄ọde ndinọ nnyịn, kpa uwem nsinsi.+ 26  N̄wet mme n̄kpọ emi nnọ mbufo mban̄a mbon oro ẹyomde ndida mbufo ntụn usụn̄.+ 27  Amaedi mbufo, aran oro enye eyetde+ mbufo osụk odu ye mbufo, mbufo inyụn̄ iyomke owo ndomokiet ekpep mbufo.+ Edi, aran oro enye eyetde mbufo ekpep mbufo kpukpru n̄kpọ+ onyụn̄ edi akpanikọ+ idịghe nsu. Ndien kpa nte enye ekekpepde mbufo, ẹka iso ẹbuana n̄kpọ+ ye enye. 28  Mmọdo ndien, n̄kpri nditọ,+ ẹka iso ẹbuana n̄kpọ+ ye enye, man ke ini ẹdiyararede+ enye nnyịn ikpenyene ifụre nditịn̄ ikọ+ ikûnyụn̄ ikop bụt idian̄ade ikpọn̄ enye ke ini edidu+ esie. 29  Edieke mbufo ẹfiọkde ẹte enye edi edinen,+ mbufo ẹmefiọk ẹte ke enye okobon owo ekededi emi anamde edinen ido.+

Mme Ikọ Idakisọn̄