Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

1 Corinth 9;1-27

9  Nte ami nnyeneke ifụre ndinam se mmade?+ Nte ami ndịghe apostle?+ Nte ami n̄kekwe Jesus Ọbọn̄ nnyịn?+ Nte mbufo idịghe utom mi ke Ọbọn̄?  Edieke ami mmendịghe apostle nnọ mbon en̄wen, ke ata akpanikọ mmedi nnọ mbufo, koro mbufo ẹdi ufịkn̄kpọ ndisọn̄ọ+ itie apostle mi ke Ọbọn̄.  Ikọ unyan̄a idem oro ndade mbọrọ mbon oro ẹdụn̄ọrede mi edi ntem:+  Nnyịn imenyene unen ndidia+ nnyụn̄ n̄n̄wọn̄ n̄kpọ, nte inyeneke?  Nnyịn imenyene unen ndida eyenete an̄wan nte n̄wanndọ,+ kpa nte mme apostle eken ye nditọeka Ọbọn̄+ ye Cephas+ ẹnamde, nte nnyịn inyeneke?  Mîdịghe nte ami ye Barnabas+ ikpọn̄ mînyeneke unen nditre ndinam utom idịbi udia?+  Anie akanam ada okụk esiemmọ anam utom nte owoekọn̄? Anie ọtọ in̄wan̄ vine ndien mîdiaha mfri esie?+ Mîdịghe anie ọbọk erọn̄ ndien mîn̄wọn̄ke ndusụk mmọn̄eba erọn̄ oro?+  Nte ami ntịn̄ mme n̄kpọ emi nte owo?+ Mîdịghe nte Ibet+ n̄ko itịn̄ke mme n̄kpọ emi?  Koro ẹwet ke ibet Moses ẹte: “Kûbọp enan̄ inua ke ini enye edịghide wheat.”+ Ndi enan̄ ke Abasi ekere aban̄a? 10  Mîdịghe ndi enye etịn̄ emi ofụri ofụri ke ntak nnyịn? Ke akpanikọ ẹkewet+ n̄kpọ emi ke ntak nnyịn, koro owo emi ofụn̄de isọn̄ ekpenyene ndifụn̄ ye idotenyịn ndien owo eke edịghide wheat akpanam ntre ye idotenyịn nditiene mbuana.+ 11  Edieke nnyịn ikọtọde mme n̄kpọ eke spirit+ inọ mbufo, nte edi akwa n̄kpọ edieke nnyịn idọkde mme n̄kpọ obụkidem ito mbufo?+ 12  Edieke mbon en̄wen ẹnyenede unen emi ke idem mbufo,+ nte nnyịn inyeneke ikan oro? Edi, nnyịn idaha odudu emi inam n̄kpọ,+ edi iyọyọ kpukpru n̄kpọ mbak nnyịn idinịm n̄kpọ ubiọn̄ọ ndomokiet inọ eti mbụk+ emi aban̄ade Christ. 13  Nte mbufo ifiọkke ite mbon oro ẹnamde edisana utom+ ẹdia n̄kpọ ke temple, ndien mbon oro ẹnamde utom kpukpru ini+ ke itieuwa ẹnyene udeme ẹnọ idemmọ ke itieuwa? 14  Ke usụn̄ emi, n̄ko, Ọbọn̄ ama owụk+ ete mbon oro ẹtan̄ade eti mbụk ẹda se itode eti mbụk ẹdu uwem.+ 15  Edi ami ndaha n̄kpọ emi ndomokiet nnam n̄kpọ.+ Ke akpanikọ, n̄wetke mme n̄kpọ emi man akpakabade edi ntre ye ami, koro ọkpọfọn ye ami ndikpa akan—baba owo kiet idinamke ntak mbụre+ mi ọwọrọ ikpîkpu! 16  Edieke ami ke emi ntan̄ade eti mbụk,+ emi idịghe ntak ndomokiet ami ndibụre mbụre, koro utom oro obiomo mi+ ndinam. Mbọm+ mi edieke mmentan̄ake eti mbụk! 17  Edieke nnamde emi ke edinyịme esịt,+ mmenyene utịp;+ edi edieke mmenamke ke edinyịme esịt, nsụk nnyenyene itie akama-ukpọhọde+ oro ẹyakde ẹsịn mi ke ubọk. 18  Nso, ndien, idi utịp mi? Nte ke adan̄aemi ntan̄ade eti mbụk ami n̄kpọnọ eti mbụk ye unana ekọmurua,+ man n̄kûda odudu oro nnyenede nte ọkwọrọ eti mbụk nnam n̄kpọ ke idiọk usụn̄. 19  Koro, okposụkedi mmendụhe ke idak owo ndomokiet, mmodụk ufụn+ nnọ kpukpru owo, man n̄kpodụri+ ata ediwak owo nda. 20  Ntre mma n̄kabade ntie nte eyen Jew nnọ mme Jew,+ man n̄kpanyan̄a mme Jew; mma n̄kabade ntie nte owo eke odude ke idak ibet nnọ mmọ oro ẹdude ke idak ibet,+ okposụkedi ami ke idemmi mmendụhe ke idak ibet,+ man n̄kpanyan̄a mmọ oro ẹdude ke idak ibet. 21  Mma n̄kabade ntie nte owo eke mînyeneke ibet+ nnọ mmọ oro mînyeneke ibet,+ okposụkedi mmennanake ibet Abasi edi ndude ke idak ibet+ Christ,+ man n̄kpanyan̄a mmọ oro mînyeneke ibet. 22  Mma n̄kabade ndi owo mmemidem nnọ mbon mmemidem,+ man n̄kpanyan̄a mbon mmemidem. Mmakabade ndi kpukpru n̄kpọ nnọ kpukpru orụk owo,+ man ke usụn̄ ekededi n̄kpanyan̄a ndusụk mmọ. 23  Edi nnanam kpukpru n̄kpọ kaban̄a eti mbụk, man n̄kpabuana+ enye ye mbon en̄wen. 24  Nte mbufo ifiọkke ite kpukpru mme efehe itọk+ ke mbuba ẹfefehe, edi owo kiet kpọt ọbọ utịp?+ Ẹfehe+ ke usụn̄ eke mbufo ẹdibọde utịp.+ 25  Akan oro, kpukpru owo eke ẹtienede ẹbuana ke mbuba ẹkama idem ke ufat+ ke kpukpru n̄kpọ. Mmọ ẹnam emi man ẹbọ anyanya+ emi ekemede ndibiara, edi nnyịn idibọ enye oro mîkemeke ndibiara.+ 26  Ntre, nte ami mfehede,+idịghe nte owo emi mînyeneke iwụk ebiet eke efehede aka; nte ami ntopde ita, ntopke nte owo eke ọtọde ofụm;+ 27  edi ntọn̄ọ idem mi ita,+ nnam enye odụk ufụn, man, ke mma n̄kọkwọrọ ikọ nnọ mbon en̄wen, ẹdibiom mi ikpe+ ke usụn̄ ekededi.

Mme Ikọ Idakisọn̄