Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Bible ke Intanet

EDISANA N̄WED ABASI-EDIKABADE EKE OBUFA ERERIMBOT

1 Corinth 7;1-40

7  Ndien kaban̄a mme n̄kpọ oro mbufo ẹkewetde ẹbụp, ọfọn owo nditetre nditụk+ n̄wan;  edi, ke ntak emi use+ atarade asuana, yak owo kiet kiet enyene n̄wanndọ esie,+ n̄wan kiet kiet onyụn̄ enyene ebe esiemmọ.  Yak ebe ọnọ n̄wanndọ esie se idide udeme* n̄wanndọ;+ yak n̄wanndọ onyụn̄ anam kpasụk ntre ye ebe esie.+  N̄wanndọ inyeneke odudu ke idem esie, edi ebe esie enyene;+ kpasụk ntre, n̄ko, ebe inyeneke odudu ke idem esie, edi n̄wanndọ esie enyene.+  Ẹkûsịn ndinọ kiet eken n̄kpọ emi,+ ibọhọke oto ke unyịme edem mbiba ke ini oro ẹnịmde,+ man mbufo ẹkpesịn idem ke akam, ẹkpenyụn̄ ẹfiak ẹdiana kiet, mbak Satan edika iso odomo+ mbufo ke ntak unana mfara ke idem mbufo.+  Nte ededi, ntịn̄ emi nte n̄kpọ eke ẹnyịmede mbufo ẹnam,+ idịghe nte ewụhọ.+  Edi n̄kpama kpukpru owo ẹtie nte ami.+ Edi owo kiet kiet enyene enọ+ emi Abasi ọnọde enye, owo kiet ke usụn̄ emi, owo efen ke usụn̄ oko.  Edi ndọhọ mmọ eke mîdọhọ ndọ+ ye mme ebeakpa nte, ọfọn mmọ ndika iso ntie nte ami.+  Edi edieke mmọ mînyeneke mfara ke idem,+ yak mmọ ẹdọ ndọ, koro ọfọn ndidọ ndọ+ akan ndikpa udọn̄.+ 10  Nnọ mme ọdọ ndọ item emi, inyụn̄ idịghe ami nnọ edi Ọbọn̄+ ọnọ, nte n̄wanndọ okûkpọn̄ ebe esie;+ 11  edi edieke enye ọkpọn̄de, yak enye okûdọ ndọ mîdịghe ntre yak enye anam emem ye ebe esie; ebe okûnyụn̄ adian̄ade ọkpọn̄ n̄wan esie. 12  Edi ndọhọ mmọ eken, ih, ami ndọhọ, idịghe Ọbọn̄,+ nte: Edieke eyenete ekededi enyenede n̄wanndọ eke mînịmke ke akpanikọ, ndien n̄wan emi enyịme ndidụn̄ ye enye, yak enye okûdian̄ade ọkpọn̄ n̄wan oro; 13  ndien n̄wan emi enyenede ebe eke mînịmke ke akpanikọ, edi ebe oro enyịme ndidụn̄ ye enye, yak enye okûdian̄ade ọkpọn̄ ebe esie. 14  Koro ẹnam ebe eke mînịmke ke akpanikọ asana oto ke n̄wan esie, ẹnyụn̄ ẹnam n̄wan eke mînịmke ke akpanikọ asana oto ke eyenete oro; mîdịghe ntre, nditọ mbufo ikpasanake,+ edi ke emi mmọ ẹsana.+ 15  Edi edieke owo oro mînịmke ke akpanikọ oyomde ndidian̄ade,+ yak enye adian̄ade; owo isịnke eyenete eren m̀mê eyenete an̄wan ke ufụn ke utọ mme idaha ntre, edi Abasi okot mbufo ete ẹditie ke emem.+ 16  Koro, afo n̄wanndọ, asan̄a didie ọfiọk m̀mê afo edinyan̄a uberi?+ Mîdịghe, afo ebe, asan̄a didie ọfiọk m̀mê afo edinyan̄a n̄wanndọ fo?+ 17  Edi, kpa nte Jehovah ọnọde owo kiet kiet udeme,+ yak owo kiet kiet asan̄a kpa nte Abasi okokotde enye.+ Ntem ke n̄wụk+ nte ẹnam ke kpukpru mme esop. 18  Nte ẹkekot owo ke enye ama akana mbobi?+ Yak enye okûkabade edi owo eke mînaha mbobi. Nte ẹkekot owo ke ini enye mînaha mbobi?+ Yak enye okûna mbobi.+ 19  Edina mbobi+ idịghe n̄kpọ ndomokiet, editre ndina mbobi+ inyụn̄ idịghe n̄kpọ, edi edinịm mme ewụhọ Abasi edi n̄kpọ.+ 20  Ke idaha ekededi oro ẹkekotde+ owo kiet kiet, yak enye aka iso odu do.+ 21  Nte ẹkekot fi ke ini edide ofụn? Kûyak oro afịna fi;+ edi edieke ekemede ndiwọrọ ufụn, da ifet oro nyan̄a idem. 22  Koro owo ekededi eke odude ke Ọbọn̄ emi ẹkekotde ke ini enye edide ofụn edi amanaisọn̄+ ọnọ Ọbọn̄; kpasụk ntre owo emi ẹkekotde ke ini enye edide amanaisọn̄+ edi ofụn+ Christ. 23  Ẹkedep mbufo ke ekọmurua;+ ẹtre ndidụk ufụn+ nnọ mme owo. 24  Ke idaha+ ekededi oro ẹkekotde owo kiet kiet, nditọete, yak enye aka iso odu do onyụn̄ omụm itie ebuana esie ye Abasi akama. 25  Edi amaedi mmọ emi akanam mîdọhọ ndọ,* nnyeneke ewụhọ ndomokiet eke otode Ọbọn̄, edi ekikere mi+ ke nnọ nte owo emi Ọbọn̄ akatuade mbọm+ ete edi anam-akpanikọ.+ 26  Ntre ke ntak nsọn̄ọn̄kpọ eke odude ke emi, n̄kere ke ọfọn owo nditie nte enye etiede.+ 27  Nte ọmọbọbọ ke ndọ ye n̄wan?+ Kûyom nditara.+ Nte amatara ọkpọn̄ n̄wanndọ? Kûyom n̄wanndọ aba. 28  Edi idem edieke afo ọdọde ndọ, unamke idiọkn̄kpọ.+ Ndien edieke owo emi akanam mîdọhọ ndọ* ọdọde, utọ owo oro inamke idiọkn̄kpọ. Nte ededi, mmọ emi ẹnamde ntre ẹyekụt ukụt ke obụkidem.+ Edi mmoyom mbufo ẹbọhọ oro. 29  Mmọdo, nditọete, ndọhọ nte ke ini emi osụhọde iniọn̄ke aba.+ Mmọdo yak mmọ eke ẹnyenede n̄wan ẹdu uwem nte n̄kpọ eke mmọ mînyeneke,+ 30  n̄ko mmọ eke ẹtuan̄ade ẹdu uwem nte mmọ eke mîtuaha, mmọ eke ẹdarade ẹdu uwem nte mmọ eke mîdarake, mmọ eke ẹdepde n̄kpọ ẹdu uwem nte mmọ eke mînyeneke, 31  ndien mmọ eke ẹdade ererimbot ẹnam n̄kpọ+ ẹdu uwem nte mmọ eke mîdaha enye inam n̄kpọ ọyọhọ ọyọhọ; koro idaha ererimbot emi ke okpụhọde.+ 32  Ke akpanikọ, nyomke mbufo ẹkop editịmede esịt.+ Erenowo emi mîdọhọ ndọ ekere aban̄a mme n̄kpọ Ọbọn̄, nte enye edisan̄ade enem Ọbọn̄ esịt. 33  Edi erenowo emi ọdọde ndọ ekere+ n̄kpọ ererimbot, nte enye edisan̄ade enem n̄wan esie esịt,+ 34  ndien ekikere asiaha enye iba. N̄ko-n̄ko, n̄wan emi mîdọhọ ndọ, ye eyenan̄wan emi mîfiọkke erenowo, ekere mme n̄kpọ Ọbọn̄,+ nte enye akpasanade ke ikpọkidem ye ke spirit. Nte ededi, n̄wan emi ọdọde ndọ ekere mme n̄kpọ ererimbot, nte edisan̄ade enem ebe esie esịt.+ 35  Edi ntịn̄ emi ke ufọn mbufo, idịghe man n̄kpọfọri mbufo ekpọ, edi man nnụk mbufo ẹnam se idotde+ ẹnyụn̄ ẹnam n̄kpọ kpukpru ini ẹnọ Ọbọn̄ ẹkûnyụn̄ ẹyak n̄kpọ ọwọn̄ọde ntịn̄enyịn mbufo.+ 36  Edi edieke owo ekededi ekerede ke imọ inamke n̄kpọ nte odotde ye itie unana ndọ imọ,+ edieke enye ebede ini nsehe uyen, ndien edieke ọdọn̄de enye ndidọ ndọ, yak enye anam se enye oyomde; enye inamke idiọkn̄kpọ. Yak mmọ ẹdọ ndọ.+ 37  Edi edieke owo ekededi ebierede ke esịt esie, mînyụn̄ inyeneke mfịghe, edi enyene odudu ndinam se enye aduakde onyụn̄ enyene iwụk ke ubiere esịt esie ndisọn̄ọ mmụm itie unana ndọ esie n̄kama, enye ayanam ọfọn.+ 38  N̄ko-n̄ko owo eke ọdọde ndọ anam ọfọn,+ edi owo eke mîdọhọ ndọ anam ọfọn akan.+ 39  N̄wan ọbọbọ ke ndọ ke adan̄a ini nte ebe esie odude ke uwem.+ Edi edieke ebe esie edede ke n̄kpa, enye enyene ifụre ndidọ owo eke enye oyomde, edi yak ọdọ ke Ọbọn̄ ikpọn̄-ikpọn̄.+ 40  Edi ami n̄kere ke enye oyokop inemesịt akan edieke enye mîfiakke idọ ndọ.+ N̄kere ke ami n̄ko mmenyene spirit Abasi.+

Mme Ikọ Idakisọn̄

Oro edi, ndiyụhọ udọn̄ idan̄ esie.
At. Ed., “owo emi akanam mînyeneke ebuana idan̄.”
Se ik. id. 1Co 7:25.