Be ka se isịnede

Be ka udiana n̄kpọ

Mme Ntiense Jehovah

Efịk

Obufa N̄kpọ ke Manhattan

Obufa N̄kpọ ke Manhattan

Ke November 2011, Mme Ntiense Jehovah ẹma ẹdomo obufa n̄kpọ ẹse ke Manhattan, ẹbon n̄wed ke okpokoro m̀mê ke ukpatn̄kpọ man ẹn̄wam mme owo ẹkop etop Bible. Ẹkenam emi ke usụk usụk Manhattan, kpa mbịghi-n̄kan obio emi ediwak owo ẹdude ke New York.

Ẹbahade obio emi ke ikpehe inan̄. Ke ikpehe kiet kiet, ẹnyene nsio nsio itie emi Mme Ntiense ẹbonde mme n̄wed Bible ke okpokoro m̀mê ke ukpatn̄kpọ man mbon emi ẹsan̄ade ẹbe ẹkeme ndida mbọ. Ediwak itie ubonn̄wed emi ẹdu ke itie udụk n̄kpọisan̄, emi ediwak tọsịn owo ẹsikade kpukpru usen, mîdịghe ẹdu ẹkpere do.

Ẹsibọrọ ediwak mbụme Bible ke mme itie emi. Mbon emi mîyomke ndibiat ini ẹkeme ndimen n̄wed ndien ama ekem mmọ ẹkot.

N̄wed ẹdu do ke nsio nsio usem. Edieke n̄wed mîdụhe ke usem oro owo oyomde, enye ekeme ndidọhọ ẹda ẹdi onyụn̄ edibọ ke usen ifan̄ ẹbede.

Mme owo ye ukara ẹma obufa ndutịm oro idomode ise mi. Bodisi kiet ọkọdọhọ ete: “Nso inam mbufo mîkabakke itọn̄ọ n̄kpọ emi? Mbufo ẹmenyene se mme owo ẹyomde.

Ete kiet ama atuak ada ndondo oro enye okụtde n̄wed Nso ke Bible Enen̄ede Ekpep? Enye ọkọdọhọ ke imọ ikokụt mme owo ke usụn̄ idakisọn̄ nte ẹkotde n̄wed oro inyụn̄ ikere m̀mê mmọ ẹkeda ke m̀mọ̀n̄. Enye edikụt ndien idahaemi.

Akparawa kiet esisan̄a ebe okpokoro n̄wed kiet aka utom kpukpru usen ke ọfiọn̄ kiet ye urua iba. Ke akpatre, enye ama atuak ada onyụn̄ ọdọhọ ete, “Ẹn̄wam mi.” Mbon emi ẹkenịmde okpokoro oro ẹma ẹnyịme ndin̄wam enye. Mmọ ẹma ẹnọ enye Bible ẹnyụn̄ ẹwụt enye nte akpadade anam n̄kpọ.

Ndusụk mbon oro ẹsan̄ade ẹbe ẹsituak ẹda ẹneme Ikọ Abasi, ndien owo 875 ẹkedọhọ ke imoyom ẹkpep mmimọ Bible. Kan̄a ke emi, obufa ndutịm emi ke Manhattan anam mme owo ẹbọ magazine 12,927 ye n̄wed 31,183.