Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

Ẹwụt Mme Owo JW.ORG ke Ebiet Emi Ẹkewụtde N̄wed Ofụri Ererimbot ke Toronto

Ẹwụt Mme Owo JW.ORG ke Ebiet Emi Ẹkewụtde N̄wed Ofụri Ererimbot ke Toronto

Ke November 13 esịm 16, 2014, ẹma ẹnam edinam ke obio Toronto, ke Canada, man ẹwụt mme owo nsio nsio n̄wed oro ẹdude ke ererimbot—mme n̄wed oro ẹmịn̄de-mịn̄ ye mbon oro ẹdude ke Intanet. Mbon oro ẹkedụkde edinam usen inan̄ emi ẹma ẹbe owo 20,000.

Mme Ntiense Jehovah ẹma ẹtiene ẹdụk edinam emi. Mmọ ẹma ẹbon n̄wed mmọ ke ndiye okpokoro ẹnyụn̄ ẹdori n̄kpri komputa ke mme okpokoro emi, man ẹwụt mme owo nte ẹkemede ndidụk ikpehe Intanet nnyịn, jw.org.

Owo kiet ke otu mbon oro ẹketịmde edinam emi ọkọdọhọ ete: “Ikpehe Intanet mbufo eye etieti. Akpana kpukpru mbon oro ẹdade n̄wed mmọ ẹdi ndiwụt mme owo mi ẹkpebe mbufo.” Mbon oro ẹkedide ẹdise mme n̄wed nnyịn ẹma ẹdọhọ ke nte ẹnamde jw.org anam emem utom ndisọp n̄kụt se owo oyomde, ye nte ke ibọrọ mbụme emi afịnade mme owo ọyọyọhọ jw.org. Esịt ama enem mmọ ndikụt nte jw.org an̄wamde owo ọdiọn̄ọ se akpanamde ke ini enye enyenede mfịna.

Mme Ntiense Jehovah emi ẹkenyenede nneme ye mbon oro ẹkedụkde edinam emi ẹma ẹkụt ke ata ediwak mmọ ikokopke-kop n̄kpọ iban̄a jw.org. Ekpere ndidi kpukpru mbon oro ẹkedide itie emi ẹkebonde n̄wed nnyịn ẹma ẹbọ ekpri kad jw.org m̀mê tract emi ekerede, Anie Ekeme Ndibọrọ Mbụme Emi Afịnade Ata Ediwak Owo? Ediwak mmọ ẹma ẹdọhọ ke iyafiak idụk jw.org, ndusụk mmọ ẹma ẹkam ẹdọhọ ke imoyom Mme Ntiense Jehovah ẹdi ufọk mmimọ ẹdikpep mmimọ Bible.

Friday ke ẹkewụt mme n̄wed nditọwọn̄ ke itie edinam oro. Ntre, Mme Ntiense Jehovah ẹma ẹbre cartoon nnyịn ke jw.org. Nditọ ufọkn̄wed emi ẹkesan̄ade ye mme andikpep mmọ ẹdi edinam emi ẹma ẹtuak ẹda ẹse cartoon emi.

Ete kiet emi otode Chicago, onyụn̄ anamde utom ke itie emi ẹsimịn̄de Bible, ama enen̄ede ama nte ẹkemịn̄de Edisana N̄wed Abasi—Edikabade Eke Obufa Ererimbot. Enye ama ọdọhọ ke ikpama ndinyene nneme ye mbon oro ẹkemịn̄de Bible emi, ẹma ẹnyụn̄ ẹnọ enye ekpri kad jw.org.

Imọdọn̄ n̄kpọ ibe usem 700 ke jw.org. Mbon oro ẹkedụkde edinam emi ẹma ẹse mme n̄kpọ emi ke usem 16, oro edi ke usem Amharic, Bengali, Chinese, French, Greek, Gujarati, Hindi, Ikọmbakara, Korean, Portuguese, Spanish, Swedish, Tamil, Tigrinya, Urdu, ye Vietnamese.

Ntiense Jehovah emi akadarade mbon oro ẹkedide ẹdise n̄wed nnyịn ama okụt ke ndiwowụt mme owo nte jw.org etiede ọfọn akan nditetịn̄. Enye ọkọdọhọ ete: “Ama enen̄ede enem nnyịn ndiwụt mme owo ikpehe Intanet nnyịn emi, jw.org.”

Kpep N̄kpọ En̄wen

Nso ke Ẹkeme Ndikụt ke Ikpehe Intanet Nnyịn?

Emekeme ndikot n̄kpọ mban̄a mbon emi nnyịn idide ye se nnyịn inịmde onyụn̄ okụt ibọrọ mbụme aban̄ade Bible emi afo okobụpde.