Be ka se isịnede

Be ka udiana n̄kpọ

Mme Ntiense Jehovah

Efịk

Ẹkwọrọ Ikọ ke Esịt Esịt Edere Europe ye North America

Ẹkwọrọ Ikọ ke Esịt Esịt Edere Europe ye North America

Ke 2014, Otu Emi Ẹsede Ẹban̄a Utom Mme Ntiense Jehovah ẹma ẹnam obufa ndutịm man ẹkekwọrọ ikọ ke esịt esịt edere Europe ye North America. (Utom 1:8) Ẹketọn̄ọ ukwọrọikọ emi ke ndusụk obio ke Alaska (ke United States), Lapland (ke Finland), Nunavut ye edere edere n̄kan̄ usoputịn Canada.

Ke ata ediwak isua, Mme Ntiense Jehovah ẹma ẹsika mme obio emi ẹkekwọrọ ikọ. Edi mmọ ikesibiatke ini do. Ediwak ini, se mmọ ẹkesinamde do ekedi ndinọ mme owo n̄wed Ikọ Abasi nnyịn.

Ke obufa ndụtịm emi, mme ọfis emi ẹsede ẹban̄a utom Mme Ntiense Jehovah ke mme obio emi, ẹma ẹnọ mme ọkwọrọikọ ofụri ini (mme asiakusụn̄) ẹka ẹkedu ke mme itie emi ẹkwọrọ ikọ ke nsụhọde n̄kaha ọfiọn̄ ita. Edieke mme owo do ẹmade ndikpep Bible, mme ọkwọrọikọ emi ẹkeme ndidu do mbe ọfiọn̄ ita ẹnyụn̄ ẹnịm Ikọ Abasi nnyịn.

Edi enyene ndusụk n̄kpọ emi ẹsinamde ọsọn̄ ndikwọrọ ikọ ke mme itie emi. Ke uwụtn̄kpọ, kiet ke otu mme ọkwọrọikọ ofụri ini oro ẹkedọhọde aka Barrow ke Alaska ọkọkwọrọ ikọ okoto usụk usụk California aka, enye eken oto Georgia ke United States. Ini mmọ ẹsịmde Barrow, tuep ama odu etieti; obio oro ama ebịt utịm ikaba akan ekebe ntụhube. Kpa ye oro, ọfiọn̄ ifan̄ ke mmọ ẹma ẹkesịm do, mmọ ẹma ẹkpere ndikwọrọ ikọ ke kpukpru ufọk ke obio oro, ẹnyụn̄ ẹtọn̄ọ ndikpep owo inan̄ Bible. Owo kiet ke otu mbon emi mmọ ẹkekpepde Bible ekere John. Akparawa emi ye n̄kaiferi emi edide ufan esie ke ẹkpep n̄wed Nso ke Bible Enen̄ede Ekpep? John esitịn̄ se enye ekpepde ke Bible ọnọ mme ufan esie ye mbon itieutom esie. Enye esida fon esie okot itie N̄wed Abasi eke usen ke usen ke JW Library.

Usụn̄ idụhe ndiwat ndụk obio Rankin Inlet ke Nunavut, ke Canada. Ntre, mme ọkwọrọikọ ofụri ini iba ẹma ẹsan̄a ke ubomofụm ẹdụk obio oro ẹkekwọrọ ikọ ẹnyụn̄ ẹkpep owo ifan̄ Bible. Ke ete kiet ama ekese vidio Nso ke Ẹsinam ke Ufọkmbono Obio Ubọn̄?, enye ama obụp m̀mê ini ewe ke ẹdibọp Ufọkmbono Obio Ubọn̄ ke obio mmimọ. Ekem ọdọhọ ke edieke idude uwem isịm ini emi ẹdibọpde Ufọkmbono oro, ke iyetiene idụk Ikọ Abasi nnyịn.

Mme ọkwọrọikọ ofụri ini emi ẹkenọde ẹka Savukoski ke Finland ẹkedọhọ ke “obio oro ebịt akan n̄kpọ en̄wen ye nte ke snow ọyọyọhọ kpukpru ebiet.” Edop awak utịm ikoduop akan mme owo ke obio emi. Mmọ ẹdọhọ n̄ko ke mmimọ ikaka obio oro ke ata nnennen nnennen ini. Ntak-a? Mmọ ẹte ke “ima ikwọrọ ikọ ke kpukpru ebiet emi akpanade ikwọrọ sia ẹma ẹkwat snow ẹsion̄o ẹnyụn̄ ẹdiọn̄ usụn̄. N̄ko, tuep ama anam ediwak owo ẹdu ke ufọk.”

Nnyịn ndisịn ukeme n̄kwọrọ ikọ ke mme obio emi anam mbon en̄wen ẹkop ẹnyụn̄ ẹdiọn̄ọ n̄kpọ ẹban̄a nnyịn. Ke uwụtn̄kpọ, ke mme ọkwọrọikọ ofụri ini iba ẹma ẹkeka ẹkekwọrọ ikọ ẹnọ mma kiet, emi edide akwa owo ukara ke obio kiet ke Alaska, mma emi ama aka Intanet ekewet nti n̄kpọ aban̄a se ẹkekwọrọde ẹnọ enye, onyụn̄ esịn ndise tract emi, Nso idi Obio Ubọn̄ Abasi?

Ke Haines ke Alaska, mme ọkwọrọikọ ofụri ini iba ẹma ẹnịm Ikọ Abasi nnyịn ke itie ubonn̄wed obio oro, ndien owo itiaita ẹma ẹdụk Ikọ Abasi oro. Ke oro ebede, n̄wedmbụk n̄kpọntịbe ama etịn̄ ke irenowo iba ẹto Texas ye North Carolina ẹdi ndisan̄a ke ufọk ke ufọk n̄kpep owo Bible. N̄wedmbụk n̄kpọntịbe oro ekeberi ikọ esie ntem: “Edieke oyomde ndifiọk n̄kpọ en̄wen mban̄a emi, ka jw.org.”

Kpep N̄kpọ En̄wen

MMANIE ẸNAM UDUAK JEHOVAH MFỊN?

Didie ke Ẹtịm Utom Ukwọrọikọ Mme Ntiense Jehovah?

Nnyịn inyụn̄ inam se Jesus akanamde ke ini enye okodude ke isọn̄. Isikwọrọ ikọ didie?

N̄kpama Ẹdikpep Mi Bible ke Mfọn

Ntak Emi Ekpekpepde Bible?

Bible anam ediwak miliọn owo ke ofụri ererimbot ẹfiọk ibọrọ mbụme emi afịnade ata ediwak owo. Ndi akpama nditiene mfiọk?