Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

Ikwọ Ediwak Usem

Ikwọ Ediwak Usem

Isimemke utom ndikabade ikwọ ke usem kiet nsịn ke usem en̄wen. Idahaemi kere ndien nte ekpetiede ndikabade ofụri n̄wedikwọ emi esịnede ikwọ 135.

Mme Ntiense Jehovah ẹnam emi, ndien ke ufan̄ isua ita mmọ ẹkabade ofụri obufa n̄wedikwọ mmọ, Kwọ Ikwọ Nọ Jehovah, ke usem 116. Usem 55 en̄wen ẹnyene n̄wedikwọ emi esịnede ikwọ 55. Ediwak usem en̄wen ke ẹdi ke usụn̄.

Ndiwet Nnyụn̄ N̄kabade Ikwọ

Mme Ntiense Jehovah ẹkabade n̄wed Ikọ Abasi ke n̄kpọ nte usem 600, ndien n̄kpọ nte 400 ke otu oro ẹdu ke Intanet. Edi ndikabade n̄wedikwọ nnyịn ikememke. Ntak-a? Koro ẹkwọ ikwọ emi odude ke Kwọ Ikwọ Nọ Jehovah usụn̄ kiet okposụkedi ẹkabarede enye ke ediwak usem.

Ndikabade ikwọ itiehe nte ndikabade magazine. Ke uwụtn̄kpọ, ke ini ẹkabarede Enyọn̄-Ukpeme ke usem kiet ẹsịn ke usem en̄wen, mme andikabade ẹsidomo ukeme ndiwet kpukpru se ẹtịn̄de ke usem oro ẹdade ẹkabade nnennen nnennen. Edi owo isinamke ntem ke ini ẹkabarede ikwọ.

Nte Ẹsikabarede Ikwọ

Mme andikabade ikwọ isikabakede ikwọ nte ẹkabarede mme n̄wed eken sia ana se mmọ ẹkabarede ọwọrọ n̄kpọ, enem, ẹnyụn̄ ẹkeme nditi.

Ana mme ikọ oro ẹdade ẹkabade ikwọ emem ekem man andikwọ ekeme ndisọp ndiọn̄ọ se ikọ ikwọ kiet kiet ọwọrọde. Sia ẹsikwọde ikwọ nnyịn usụn̄ kiet, ana se ẹkabarede ke usem ekededi ekem ye nte ẹsikwọde ikwọ oro onyụn̄ enem andikwọ nte n̄kpọ emi edide enye ekewet se enye ọkwọde.

Mme akabade n̄wed ẹsinam didie ẹkeme ndinam emi? Utu ke ndikabade n̄wedikwọ nnyịn ntre ke Ikọmbakara nsịn ke Ikọ Efịk, ẹkedọhọ mmọ ẹwet mbufa ikọ ikwọ emi ẹditiede nte se idude ke n̄wedikwọ Ikọmbakara. Mmọ ẹma ẹsio ikọ N̄wed Abasi emi ekemde ye se idude ke n̄wedikwọ Ikọmbakara ẹwet ikwọ emi ke usụn̄ emi ẹkemede ndisọp n̄n̄wan̄a owo, emi ẹnyụn̄ ẹkemede ndisọp nti.

Akpa n̄kpọ emi ẹkenamde ekedi ndikabade ikwọ Ikọmbakara oro. Ekem Ntiense emi ọdiọn̄ọde ndiwet ikwọ atan̄ se ẹkekabarede oro obon ke usụn̄ emi edinemde owo edinyụn̄ inyenede se ọwọrọde ke Ikọ Efịk. Mme akabade n̄wed nnyịn ndien ẹma ẹfiak ẹse se eyenete oro ọdiọn̄ọde ndiwet ikwọ akanamde m̀mê ekem ye se N̄wed Abasi ekpepde.

Esịt ama enem Mme Ntiense Jehovah ke ofụri ererimbot ndibọ obufa n̄wedikwọ oro, ndien ke ẹsụk ẹyeyom enye ke ediwak usem en̄wen.

 

Kpep N̄kpọ En̄wen

Didie ke Ẹsiwet Ẹnyụn̄ Ẹkabade Mme N̄wed Nnyịn?

Imosio n̄wed ke se iwakde ibe usem 600. Ntak inamde kpukpru emi-e?