Be ka se isịnede

Be ka udiana n̄kpọ

Mme Ntiense Jehovah

Efịk

Ediwak Owo Ẹkekot Enye Ẹdọn̄ ke Intanet ye CD

Ediwak Owo Ẹkekot Enye Ẹdọn̄ ke Intanet ye CD

“Enem tutu, ikakke owo, onyụn̄ anam owo ekere n̄kpọ.”

“Ke ini n̄kokopde nte ẹkotde Bible emi, eketie mi nte ke ndu ke itie emi n̄kpọ oro etịbede.”

“Enem-o! Enye anam mme itie Bible emi nsikotde ofụri ini etetịm enyene inem.”

Se mbon emi ẹkekopde n̄wed Matthew oro ẹkotde ẹdọn̄ ke Intanet ẹketịn̄de edi emi. Enye odu ke jw.org ke Ikọmbakara.

Mme Ntiense Jehovah ẹketọn̄ọ ndikot Bible ndọn̄ ke n̄kpọ umụmikọ ke isua 1978. Edi nte ini akakade, ẹma ẹkot ofụri Bible m̀mê ubak Bible ẹdọn̄ ke n̄kpọ umụmikọ ke usem 20.

Ke ẹma ẹkesio Edikabade Eke Obufa Ererimbot eke Ikọmbakara ke 2013, ama oyom ẹkot Bible emi ẹdọn̄ ke ikpehe Intanet nnyịn. Enye itiehe nte akani Bible emi owo ita kpọt ẹkekotde, edi nsio nsio owo ẹdikot se mbon Bible emi ẹwakde ẹbe 1,000 ẹketịn̄de.

Nsio nsio owo ndikot ayanam etie mbon oro ẹkpan̄de utọn̄ ẹkop nte ke mmimọ idu ke itie oro mbụk Bible emi etịbede. Kpa ye oro owo mînamke enye etie nte drama uyo uyo oro isikopde, emi ẹsitan̄de n̄kpri n̄kpọ ye ikwọ ẹdọn̄ man enem, enye emi eyenem etieti, edinyụn̄ etie nte se iketịbede.

Sia n̄kpọ emi oyomde ata ediwak mme andikot, oyoyom ẹnam eti ndutịm. Akpa kan̄a, oyom ẹdiọn̄ọ owo emi etịn̄de ikọ ke itie N̄wed Abasi kiet kiet, se itien̄wed oro ọwọrọde, ye nte owo oro etịn̄de ikọ. Ke uwụtn̄kpọ, edieke apostle Jesus kiet etịn̄de ikọ ndien owo inen̄ekede ifiọk m̀mê ewe apostle itịn̄ ikọ oro, uyo anie ke ẹkpeda? Ẹkeme ndidọhọ Thomas okot ikọ owo oro mîmaha ndisọp nnịm se ẹtịn̄de, ke ini Peter okotde ebiet emi owo etịn̄de ikọ ibụmede ibụmede.

Ẹsikere n̄ko ẹban̄a isua emana owo emi etịn̄de ikọ ke itien̄wed kiet kiet. Edieke edide ikọ apostle John ini enye ekedide akparawa, akparawa edikot enye oro; edi edieke edide ikọ esie ke ini enye okokponde owo, akamba owo edikot enye oro.

N̄ko ẹyom mbon oro ẹdiọn̄ọde ndikot n̄wed ọfọn. Ẹda ediwak mmọ ẹto ọfis Mme Ntiense Jehovah ke United States. Man ẹdiọn̄ọ mbon oro ẹdikotde n̄kpọ oro ọfọn, ẹsibakbak ẹnọ mbon oro ẹmekde nsio nsio ikpehe ke Ẹdemede! Ikọmbakara ẹte ẹkot. Ẹsidọhọ mmọ n̄ko ẹkot mme itie Bible oro owo akayatde esịt, ofụhọde, adarade, m̀mê enye emi idem ememde owo. N̄kpọ emi ayanam ẹdiọn̄ọ se owo kiet kiet edikemede ndikot ye utọ itie Bible emi ẹkpenọde owo oro.

Ke ẹma ẹkedeme mme itie Bible oro owo kiet kiet edikotde, kpukpru mmọ ẹyedi Brooklyn m̀mê Patterson man ẹrekọd se mmọ edikotde. Ana adausụn̄ okụt ke owo kiet kiet okot ikọ oro ke nnennen uyo oro ẹyomde. Adausụn̄ ye owo emi okotde ẹyekama ekpri n̄wed oro owụtde ebiet emi ẹkpesụhọrede m̀mê ẹmenerede uyo. Adausụn̄ eyese n̄ko nte ẹkerekọdde Edikabade Eke Obufa Ererimbot Ikọmbakara eke 1984 sia emi ayan̄wam enye ọfiọk se akpanamde.

Ke itie oro ẹsirekọdde n̄kpọ, ẹsifiak ẹdiọn̄ ndusụk ikọ oro owo okokotde. Ndusụk ini, mbon oro ẹsinamde emi ẹsidọhọ owo afiak okot ufan̄ikọ Bible kiet ediwak ini man ẹnyene nnennen se ẹyomde.

Owo idiọn̄ọke ini emi edikụrede ndirekọd ofụri Edikabade Eke Obufa Ererimbot Ikọmbakara eke 2013. Edi ini ekededi oro ẹkụrede n̄wed Bible kiet, ẹyesịn enye ke jw.org, ẹnyụn̄ ẹsịn idiọn̄ọ oro owutde ke ẹkụre N̄wed Bible oro. N̄kpọ emi edidu ke itie emi ẹkotde “Books of the Bible.”

Kpep N̄kpọ En̄wen

MMANIE ẸNAM UDUAK JEHOVAH MFỊN?

Ntak Emi Nnyịn Isiode Edikabade Eke Obufa Ererimbot?

Didie ke Bible emi okpụhọde ye mme Bible eken?

N̄kpama Ẹdikpep Mi Bible ke Mfọn

Ntak Emi Ekpekpepde Bible?

Bible anam ediwak miliọn owo ke ofụri ererimbot ẹfiọk ibọrọ mbụme emi afịnade ata ediwak owo. Ndi akpama nditiene mfiọk?