Be ka se isịnede

Be ka udiana n̄kpọ

Mme Ntiense Jehovah

Efịk

N̄wed Genesis Odu Idahaemi ke Usem Idiọn̄ọ Mbon America

N̄wed Genesis Odu Idahaemi ke Usem Idiọn̄ọ Mbon America

Mbon emi mîkopke ikọ ẹma ẹnyen̄e ubọk ndiwụt nte esịt enemde mmọ ndikop ntọt emi: “Imenem esịt ndisian mbufo nte ke ẹtọn̄ọ ndisio ndusụk N̄wed Abasi Usem Hebrew [Akani Testament]. Kan̄a ke emi, imokụre ndisio N̄wed Genesis!

Ẹkenọ ntọt emi ke akpatre utịn̄ikọ oro ẹkenọde ke mbono district Mme Ntiense Jehovah oro ẹkenịmde ke Usem Idiọn̄ọ Mbon America ke ndondo emi.

Mme Ntiense Jehovah ẹketọn̄ọ ndikabade Edisana N̄wed Abasi—Edikabade Eke Obufa Ererimbot ke Usem Idiọn̄ọ Mbon America ke 2005, ndien ẹketọn̄ọ ke Matthew. Ẹma ẹsion̄o kpukpru n̄wed 27 oro ẹdude ke Obufa Testament ẹkụre ke Usem Idiọn̄ọ Mbon America ke 2010.

Ke adianade ye Usem Idiọn̄ọ Mbon America, Mme Ntiense Jehovah ẹsion̄o Bible ke usem idiọn̄ọ ition eken.

Ntak ẹnamde kpukpru emi-e? Edi koro Mme Ntiense Jehovah ẹdiọn̄ọ ke ẹda se ẹtịn̄de ke inua ẹkabade se ẹwetde-wet, ndien akananam mme inan ikopke se ẹsitịn̄de. Ndision̄o se idude ke Bible n̄wụt ke usụn̄ oro enende onyụn̄ an̄wan̄ade owo anam ediwak mbon emi mîkopke n̄kpọ ẹdiọn̄ọ se isịnede ke Bible ẹnyụn̄ ẹtetịm ẹsan̄a ẹkpere Abasi. Mme owo ẹkenam n̄kpọ didie ke ini ẹkesiode Bible emi?

Akparawa kiet emi mîkopke ikọ ọkọdọhọ ete: “Ke ini ẹkesiode N̄wed Matthew isua ifan̄ ko, mma nnen̄ede n̄kụt ke Jehovah Abasi owụt nte imọ inen̄erede ima mi, ndien ndikụt nte ẹsiode N̄wed Genesis etetịm ọsọn̄ọ ima oro. Enye oyom mi nnen̄ede mfiọk imọ.

Mma kiet emi mîkopke ikọ eketịn̄ ekikere esie ntem: “Nte ẹsion̄ode n̄wed emi anam Bible etetịm an̄wan̄a mi! Mmenen̄ede mma Ikọ Abasi idahaemi. Mmọfiọk ndien ke Jehovah oyom nnen̄ede ndiọn̄ọ ikọ esie man ntịm ndiọn̄ọ imọ. Nte Bible an̄wan̄ade mi, ntre ke enye otụk mi onyụn̄ an̄wam mi ntịn̄ isọn̄ esịt mi nnọ Abasi ke ini mbọn̄de akam.