Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

Ẹnam Mme Owo Ẹnyene Bible ke Usem Emana Mmọ

Ẹnam Mme Owo Ẹnyene Bible ke Usem Emana Mmọ

Mme Ntiense Jehovah ẹsinọ mme owo Edisana N̄wed Abasi—Edikabade Eke Obufa Ererimbot edieke mmọ ẹyomde ndikot.

Okposụkedi emi nsio nsio n̄ka ẹsiode nsio nsio Bible ke nsio nsio usem, ubuene ye idiọkesịt mbon ufọkabasi iyakke ediwak owo ẹnyene Bible ke usem mmọ. Ke ntak emi Mme Ntiense Jehovah ẹsinọ mme owo Edikabade Eke Obufa Ererimbot ke se ibede usem 115.

Yak inọ ndusụk uwụtn̄kpọ:

  • Rwanda: Silvestre ye Venantie emi ẹnyenede nditọ inan̄ ẹdọhọ ntem: “N̄kpọ ọsọn̄ ye nnyịn etieti, enye esịn nnyịn mîkekemeke ndidep Bible nnọ kpukpru nditọ nnyịn. Idahaemi kpukpru nnyịn imenyene Edikabade Eke Obufa Ererimbot ke usem Kinyarwanda imesinyụn̄ ikot enye kpukpru usen.”

    Pastọ ufọkabasi Anglican ke Rwanda ọdọhọ ete: “Bible emi an̄wan̄a mi. An̄wan̄a mi akan mme Bible eken emi akanam n̄kotde. Mme Ntiense Jehovah ẹnen̄ede ẹyom Bible an̄wan̄a mme owo!”

  • Democratic Republic of the Congo: Ata ediwak owo ke idụt emi ẹsem Lingala edi ndusụk ufọkabasi imaha ndinyam Bible usem Lingala nnọ Mme Ntiense Jehovah.

    Enye esịn tọn̄ọ ẹkesio Edikabade Eke Obufa Ererimbot ke usem Lingala, Mme Ntiense Jehovah ke idụt oro ẹkama Bible emi ẹnyụn̄ ẹsinọ mbon en̄wen. Inemesịt ikedịghe ekpri ini ẹkesiode Bible emi tutu idem mme bodisi emi ẹkedude ke an̄wambre emi ẹkenịmde mbono oro ẹtiene ẹda ke udịm man ẹbọ Bible.

  • Fiji: Bible usem Fiji idịghe ọkọ eyen ubuene. Ediwak Mme Ntiense do ẹkesikama Edikabade Eke Obufa Ererimbot ke Ikọmbakara. Ke 2009, ẹma ẹsio N̄wed Abasi Christian Usem Greek—Edikabade eke Obufa Ererimbot (Obufa Testament) ke usem Fiji.

    Ete kiet emi okokotde Bible emi ama okụt ke Bible oro an̄wan̄a owo etieti onyụn̄ ọdọhọ Mme Ntiense ẹnọ imọ kiet. Edi ẹma ẹdọhọ ke enye eyebet ke n̄kpọ nte ọfiọn̄ kiet sia se ẹketobode ikedisịmke kan̄a. Ete emi ikenyịmeke ndibet, edi aka obio en̄wen emi oyomde usụn̄ ọkpọn̄ obio mmọ ke kilomita 35 man ọkọbọ Ntiense en̄wen Bible oro. Ete oro ọkọdọhọ ete: “Bible mbufo ọfọn akan eke nnyịn. Eke mbufo an̄wan̄a owo akan enye emi isikotde.”

  • Malawi: Ke ini Davide ọkọtọn̄ọde ndikpep Bible ye Mme Ntiense Jehovah, mbon ufọkabasi Baptist ẹma ẹka ufọk esie ẹkebọ enye Bible oro mmọ ẹkenọde enye. Ke ini ẹkesiode Edikabade Eke Obufa Ererimbot ke usem Chichewa, Davide akada ke Abasi ọbọrọ akam imọ.

    Davide ke okosụk ekere nte idisan̄ade idep Bible koro Bible ke Malawi ikedịghe n̄kpọ eyen ubuene. Ke ini ẹkenọde enye Edikabade Eke Obufa Ererimbot, enye ama ọdọhọ ete: “Bible emi ọfọn akan eke akpa!”

Ke ini ẹkesiode Edikabade Eke Obufa Ererimbot ke Ikọmbakara ke n̄kpọ nte isua 60 emi ẹkebede, ẹkedọhọ mbon emi ẹkedụkde mbono oro ete: ‘Ẹkot Bible ẹma. Ẹda ini ẹtịm ẹkot enye. Ẹnọ mbon en̄wen Bible emi.’ Mme Ntiense Jehovah ẹmemịn̄ Edikabade Eke Obufa Ererimbot emi awakde ẹbe idem miliọn 175 man ekem mme owo ubọk. Emekeme ndikot Bible ke Intanet ke n̄kpọ nte usem 50.

 

Kpep N̄kpọ En̄wen

Didie ke Ẹsiwet Ẹnyụn̄ Ẹkabade Mme N̄wed Nnyịn?

Imosio n̄wed ke se iwakde ibe usem 600. Ntak inamde kpukpru emi-e?