Be ka se isịnede

Be ka udiana n̄kpọ

Mme Ntiense Jehovah

Efịk

Bible Emi Ọniọn̄de Ikpat Itiokiet

Bible Emi Ọniọn̄de Ikpat Itiokiet

Mbemiso ọdọhọde Mme Ntiense Jehovah ẹnọ fi Bible ke Braille, nyene ebiet emi edinịmde. Ofụri New World Translation—ke Braille Ikọmbakara, Spanish, ye Italian—odu ke eboho 20 esịm 28 onyụn̄ oyom enyene n̄kpọ nte ufan̄ emi edide mita iba (6 ft 5) man ẹnịm enye!

Isidịghe ntre ye Bible emi owo mîmịn̄ke ke babru. Mme nnan ẹkeme ndikama ekpri masịn emi ẹsiwetde mme abisi Braille n̄wet n̄kpọ nnyụn̄ nyom n̄kpọ ke kọmputa. Kọmputa oro ẹsikotde ikọ emi ẹwetde-wet ekeme ndin̄wam mme nnan ẹkụt ẹnyụn̄ ẹkot mme n̄wed.

Ke adianade do, Mme Ntiense ẹnam ndutịm kọmputa emi ekemede ndision̄o ikọ nda n̄wed ke Braille ke ediwak usem. Ẹma ẹnam se ẹyomde ndikabade ye mme abisi ẹdọn̄ ke kọmputa, ndutịm kọmputa oro oyosion̄o enye ewet ke Braille. Enye oyobon mme ikọ ke usụn̄ emi mme nnan ẹdikemede ndikot. Ndutịm emi ayanam ẹkeme ndisio mme n̄wed ke Braille, esịnede Bible, ke usem ekededi oro enyenede mme abisi ke Braille, idem ye mme usem oro mme abisi mmọ ẹdide ata isio.

Ke se ibede isua 100, Mme Ntiense ẹmesion̄o mme n̄wed Bible ẹnọ mme nnan, mme n̄wed emi ẹdu idahaemi ke usem 19. Okposụkedi emi mme nnan oro ẹnyenede udọn̄ ẹsibọde n̄wed emi ye unana ekọmurua, ediwak mmọ ẹsitịp n̄kpọ ke imaesịt.

Ke ini edem, ẹma ẹsio n̄wed ke mbono district Mme Ntiense Jehovah, ẹkesidọhọ otuowo ke mmọ ẹditobo ke Braille nte ini akade. Isua oko, n̄kọk itieutom United States ẹma ẹnam ndụn̄ọde ke mme esop man ẹfiọk mbono district emi mme nnan ẹyomde ndidụk ye nte mmọ ẹyomde n̄wed mmọ ẹtie (ke nsemnsem babru, n̄kpọ umụmikọ, m̀mê ke kọmputa oro ẹsikotde ikọ).

Ẹma ẹnọ eke nsemnsem babru ẹka mme mbono oro mme nnan ẹdụkde, man mmọ ẹkeme ndibọ mme n̄wed oro ẹsiode ke ini emi kpukpru owo ẹbọde. Ẹkenọ eke kọmputa oro ẹsikotde ikọ ẹsọk mbon emi ẹyomde urua kiet ke ẹma ẹkekụre mbono mmọ.

Ntiense kiet emi edide nnan ọkọdọhọ ete: “Ama enem mi nditiene mbọ n̄wed ke ini mbon en̄wen ẹbọde. Psalm 37:4 ọdọhọ ke Jehovah ọyọnọ nnyịn se esịt nnyịn oyomde. Enye ama ọnọ mi ke utịturua!” Nnan efen ama ọtọn̄ọ nditua onyụn̄ ọdọhọ ete: “Ke ẹkesụk ẹkere ẹban̄a mi. Mmọkọm Jehovah nte enye etịmde ese aban̄a nnyịn.