Be ka se isịnede

Be ka udiana n̄kpọ

Mme Ntiense Jehovah

Efịk

Ẹmịn̄ Bible ke Japan

Ẹmịn̄ Bible ke Japan

Mme Ntiense Jehovah ẹnyene obufa ukwakutom umịn̄n̄wed ke ọfis mmọ ke Ebina, ke Japan, ndien ẹyeda emi ẹmịn̄ ediwak ndiye Bible.

Ediwak owo ikekereke ke ẹyekeme ndinam emi sia unyekisọn̄ ye akwa mbufịt inyan̄ibom oro ẹketịbede ke Japan ke March 11, 2011, ikayakke esinọ ikan̄ ediwak ini ke Japan.

Edi ẹma ẹsụk ẹtọn̄ọ utom emi ke September 2011. Etisịm December 2011, ẹma ẹda ukwakutom oro ẹmịn̄ Bible (Edikabade Eke Obufa Ererimbot) ke usem Chinese.

Itie umịn̄n̄wed emi okpon esịm mita 400. N̄wed emi ẹsimịn̄de esisan̄a ke udịm. Ukwak umịn̄n̄wed emi esidian n̄wed emi ẹmịn̄de, esịn edem, ekem emịn̄ edem emi adian, atan̄ ọkọk, ọdọn̄ ke katon man ẹkpetan̄ ẹsọk mme owo.

Ufọn Ẹdidiana Kiet

Eti ndutịm emi ẹkenamde, kpukpru mbonutom oro ndinyụn̄ ndiana kiet akanam ẹkụre enye ke ini. Ke uwụtn̄kpọ, ẹkenyene nditịm nsio nsio ikpehe masịn emi ke Europe, ntan̄ mmọ ndọn̄ ke ikpọ n̄kpọ udọn̄n̄kpọ 34 nnọ aka Japan.

Owo duop ẹma ẹto ibuot itieutom Mme Ntiense Jehovah ke United States ẹka Japan man ẹken̄wam ke utom emi. Ndusụk mmọ ẹma ẹdu ke Japan ẹyọhọ ọfiọn̄ itiokiet man ẹkpep mbon Japan nte ẹkpemịn̄de n̄wed ke ukwakutom emi ẹnyụn̄ ẹdiọn̄ enye edieke n̄kpọ abiarade.

Mbon eken oro ẹsinyụn̄ ẹmịn̄de n̄wed ke Japan ẹma ẹdi ẹdise itie umịn̄n̄wed nnyịn emi. Mbon emi ẹkedide ke March 19, 2012 ẹma ẹbe owo ikie. Mmọ ẹma ẹsan̄a ẹse mme itieutom en̄wen ke ọfis Mme Ntiense Jehovah emi ke Japan. Se mmọ ẹkekụtde ama akpa mmọ idem etieti.

Ẹma ẹnọ kpukpru mmọ Bible Edikabade Eke Obufa Ererimbot emi ẹkemịn̄de ke obufa ukwakutom oro.

Itieutom nnyịn ke Japan etiene itieutom nnyịn ke United States ye Brazil anam mme Bible emi ẹsọn̄de ikpaedem ẹnọ Mme Ntiense Jehovah ke ofụri ererimbot.

‘Utom En̄wen Emi Ndikade Iditiehe Ntem’

Mme Ntiense ye mbon eken emi ẹkekade ẹken̄wam ke utom oro ẹma ẹkop inemesịt. Ete kiet emi eketienede akanam utom do ọkọdọhọ Mme Ntiense oro ete: “Editie nte kpukpru nnyin ito ufọk kiet.

Ke akpatre usen emi mmọ ẹkekụrede utom oro, owo efen emi mîdịghe Ntiense ọkọdọhọ ete: “Utom en̄wen emi ndikade idifereke sia enye iditiehe nte enye emi isụk ikụrede ke Watchtower mi!