Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

Mme Ntiense ẹmọn̄ ẹkpụhọde ibuot itieutom ofụri ererimbot

Mme Ntiense ẹmọn̄ ẹkpụhọde ibuot itieutom ofụri ererimbot

Ke July 2009, Mme Ntiense Jehovah ẹma ẹdep isọn̄ ke edere edere New York man ẹsio ibuot itieutom ofụri ererimbot mmọ ẹka do. Isọn̄ oro edi hectare 102 (253 a.) onyụn̄ odu n̄kpọ nte kilomita 80 ke edere n̄kan̄ usoputịn ufọkutom n̄kọk itieutom emi odude ke Brooklyn, New York, toto ke 1909.

N̄kpọ nte Mme Ntiense 800 ẹdidụn̄ ẹnyụn̄ ẹnam utom ke obufa ufọkutom oro, emi edinyenede ufọkutom, ufọk utịmutom, ufọkidụn̄ inan̄. Ẹkere n̄ko ndinam ekpri itie ubon n̄kpọeset emi ẹdibonde mbụk Mme Ntiense Jehovah eyomfịn.

Se ẹdibọpde ayada hectare 18 (45 a.) owo idinyụn̄ itụkke ikọt ye edep oro ẹdude ke n̄kann̄kụk isọn̄ oro. Owo iditọhọ mbiet enen̄ede awak do. Utu ke oro, ẹdidiọn̄ enye etiene nte n̄kann̄kụk oro etiede.

Mbon emi ẹwetde mbuwed ufọk oro ẹnam enye ke usụn̄ oro mîdiyomke odudu ikan̄ ilektrik akwa akaha, owo idibiatke ofụm, idinyụn̄ ibiatke ekese okụk ise iban̄a enye. Ke uwụtn̄kpọ, ẹdida mme eto emi emi ẹsọn̄de idem ẹfụk ọkọm ufọk ke ntak edịm, mbak esịtufọk edifiop akaha m̀mê edibịt akaha. Ẹnam mme ọfis man un̄wana oro otode an̄wa akpayama odụk esịt n̄ko. Owo idinyụn̄ ibiatke mmọn̄ ke obufa itieutom emi n̄ko.

Nso ikanam ẹduak ndika obufa itie? Ẹkesimịn̄ Bible ye mme n̄wed Bible ke Brooklyn kpọt, edi idahaemi mme n̄kọk itieutom Mme Ntiense Jehovah ke ikpehe efen ke ererimbot ẹtiene ẹmịn̄. Ke 2004, ẹma ẹtọn̄ọ ndimịn̄ nnyụn̄ nnọ n̄wed ẹwọrọ ke Wallkill, New York ke United States, emi edide n̄kpọ nte kilomita 145 ke edere n̄kan̄ usoputịn Brooklyn.

Ẹma ẹkere ẹban̄a ubiatokụk n̄ko. Okụk oro ẹdade ẹse ẹban̄a mme ufọk ke Brooklyn awak etieti. Edieke Mme Ntiense ẹwọrọde ẹka ekpri itie, mmọ ẹyetịm ẹda okụk mmọ ẹnam utom ukpep Bible.

Ana ukara ese n̄kann̄kụk oro kan̄a mbemiso ẹnọde unyịme. Edieke n̄kpọ asan̄ade ọfọn, ẹyetọn̄ọ ndibọp n̄kpọ ke 2013, ẹyenyụn̄ ẹkụre enye ke isua inan̄.

Mme Ntiense Jehovah ẹnyene itie umịn̄n̄wed ke Wallkill, New York, ẹnyụn̄ ẹnyene itie unọ ukpep ke Patterson, New York. Esop Abasi enyene mme n̄kọk itieutom ke ediwak idụt. Mme Ntiense ke ofụri ererimbot ẹbe miliọn itiaba ye ubak.