Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

Ẹnyan̄a Mbon Oro Ẹkeyomde Ndiwot Idem

Ẹnyan̄a Mbon Oro Ẹkeyomde Ndiwot Idem

NTIENSE JEHOVAH iba ẹma ẹkekọn̄ usụn̄ ufọk kiet ke ini mmọ ẹkesụk ẹkwọrọde ikọ ke ufọk ke ufọk. Ete kiet ama eberede usụn̄. Uwem ama odorode ete emi, anam enye etebe urụk ke enyọn̄ ufọk esie oyom ndiyịri idem n̄wot.

Ke ini enye ọkọdọhọde Mme Ntiense emi ẹdụk ẹdi, mmọ ẹma ẹkụt urụk oro ẹnyụn̄ ẹbụp enye se urụk oro eyịrede do anam. Enye ama ọdọhọ ke ikoyom ndiyịri idem n̄wot, edi ke ini mmọ ẹkekọn̄de usụn̄, imọ inyụn̄ idọhọ iyak mmọ ẹdụk ẹdi kan̄a. Mme Ntiense oro ẹma ẹtie ye enye ẹneme nneme ekem ẹsan̄a ye enye ẹka ufọkibọk.

Ẹkewet mbụk ete emi ke n̄wedmbụk n̄kpọntịbe Belgium. Edi idịghe n̄kukụre ini emi Mme Ntiense Jehovah ẹn̄wamde owo emi oyomde ndiwot idem edi emi. Kot se mmọ ẹnamde ke mme itie en̄wen ke ererimbot.

Mma kiet ke Greece ekewet ete: “Owo emi n̄koyomde ndidọ ama enen̄ede ofiomo mi tutu uwem odorode mi. N̄kpọ emi ama abiak mi tutu nyom ndiwot idem man mfre uwa nnyụn̄ mbọhọ kpukpru afanikọn̄ emi.

Mma emi ama aka ufọkibọk. Ibịghike-bịghi enye ama osobo ye Mme Ntiense Jehovah, ọtọn̄ọ ndikpep Bible onyụn̄ odụk mboho Ikọ Abasi mmọ. Enye ewet ete: “Akananam owo imaha mi nte Mme Ntiense Jehovah ẹmade. Mmenyene ata nti ufan emi n̄kemede ndiberi edem. Esịt ana mi sụn̄, idem onyụn̄ enem mi sia mmentịmekede esịt aba mban̄a se n̄kpọn̄ edimande.

Ntiense en̄wen ke England ewet ete: “Ufan mi kiet ama okot mi ke ata idiọk ini ete ke imọn̄ iwot idem okoneyo oro. Mma nda se ẹkewetde ke Ẹdemede! Ikọmbakara eke May 2008 ye N̄wed Abasi nnyene nneme ye enye. Enye iyomke aba ndiwot idem kpa ye oro enye osụk enyenede mme mfịna emi enye ekenyenede.

Michael emi edide Ntiense Jehovah ke Ghana ama enyene nneme ye n̄kaiferi emi esinyamde n̄kpọ ke itieutom mmọ. Usen kiet, Michael ama okụt ke esịt inemke enye, onyụn̄ obụp enye se itịbede.

Enye ama ọdọhọ ke iyom ndiwot idem sia ebe ọkpọn̄de imọ ekemen n̄wan en̄wen. Michael ama ọdọn̄ enye esịt onyụn̄ ọnọ enye n̄wed iba emi ẹdin̄wamde enye ọdiọn̄ọ Bible. Se enye ekekpepde ikayakke enye owot idem aba. Mma emi ama aka iso ekpep Bible, enye onyụn̄ edi Ntiense Jehovah idahaemi.

N̄wedmbụk n̄kpọntịbe kiet ke America ọdọhọ ke Ntiense kiet emi akasan̄ade ọkwọrọ ikọ ama okụt moto kiet nte anade ke atuak.

Ntiense emi ọdọhọ ete: “N̄kokụt nte moto anade ke atuak. Anyan ọkpọ afaha ke n̄kpọ usion̄o nsụn̄ikan̄, ebe odụk window, ẹnyụn̄ ẹda n̄kpọ ẹsịri kpukpru itie ke moto oro.

“Mma nsọsọp nsan̄a n̄kpere moto mi n̄kokụt mma kiet esịnede ke esịt atua eyet, ndien nsụn̄ikan̄ ọkọyọyọhọ esịt moto oro. Mma mbụp enye se itịbede.

“Ke mma n̄komụm usụn̄ mberede, mma n̄kụt n̄kpri nditọ ita ẹdọn̄ọde ke edem moto oro. Ke mma n̄keberede edem moto oro, enye ama ọdọhọ nyak imọ inyọn̄ ibịne Abasi. Enye okoyom ndiwot idem nnyụn̄ n̄wot nditọ esie n̄ko.

“Mma n̄kpe enye ubọk nte okûnam utọ n̄kpọ oro, ke ndiwot idem ikọkke mfịna ndomokiet!

“Enye ama ọdọhọ ete: ‘Kpọn̄ mi, nyom ndisan̄a ye nditọ mi nnyọn̄ mbịne Abasi ke heaven.’

“Sia enye okosụk atuade, mma ntọn̄ọ edọn̄ ntiene enye ntua. Mma mfiak n̄kpe enye ubọk nte okûwot idem. Mma mfat enye n̄kama nnyụn̄ ndụri enye sụn̄sụn̄ nsio ke moto oro.

“Enye ama ọdọhọ nsion̄o nditọ imọ n̄ko!

“Mma mmụm mmọ nsion̄o ke edem moto, n̄kpri nditọ iban iba, kiet edi isua inan̄ enye eken isua ition, ye eyen erenowo isua iba. Mmọ ẹkenyụn̄ ẹdop uyo ẹdọn̄ọ ntre ke edem moto idiọn̄ọke ke imọn̄ ikpan̄a.

“Ke mmọ mbinan̄ ẹma ẹkewọn̄ọ ke moto, mma nsịn ubọk nnịme moto oro. Nnyịn mbition ima isụhọde itetie ineme nneme.”

Mme Ntiense Jehovah ẹda uwem nte ata enọ Abasi. Mmọ ẹsidọn̄ mbon oro owo mmọ okowotde idem esịt, ke ẹnyụn̄ ẹn̄wam mbon oro ẹyomde ndiwot idem, ke ofụri ererimbot.

 

 

 

 

Kpep N̄kpọ En̄wen

Ufọn Uwem Emi-e?

Nso ikpanam n̄kpa ọdọn̄ owo?