Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

Se Iketịbede ke Mbono Ofụri Isua

“Udia ke Nnennen Ini”

Se Iketịbede ke Mbono Ofụri Isua

Ata ediwak owo ẹma ẹkop mbụk oro aduaide owo idem ye inem inem usụn̄ oro ẹkenamde Matthew 24:45-47 an̄wan̄a ke mbono ofụri isua Watch Tower Bible and Tract Society of Pennsylvania ọyọhọ 128.

 

Ke October 6, 2012, n̄kpọ nte owo 5,000 ẹkedụk edinam emi ke Itiembono Mme Jehovah ke Jersey City, New Jersey ke U.S.A. Se ibede owo 10,000 ẹketie ke Brooklyn, Patterson, ye Wallkill ke New York ye ke n̄kọk itieutom nnyịn ke Canada, ẹse se ikade iso.

 

Anthony Morris, owo Otu Ukara Mme Ntiense Jehovah emi ekedide etieibuot okpokoro edinam emi, ama etịn̄ se iketịbede ke mme mbono ofụri isua emi ẹkenịmde ke edem, akpan akpan mbon emi ẹkewọrọde etop etieti. Emi ama anam mme andidụk ẹdiọn̄ọ ke eke isua emi eyenem n̄ko. Edi ndi enye emi oyonyụn̄ ọwọrọ etop?

 

Ẹma ẹwụt mme owo vidio iba emi ẹkewụtde se inamde ke ofụri ererimbot.

 

Edibọp Mme Ufọkmbono Obio Ubọn̄:

Vidio emi ẹma ẹwụt ediwak Ufọkmbono Obio Ubọn̄ emi ẹbọpde ke mme idụt emi mînen̄ekede inyene n̄kpọ. Ẹbọp Ufọkmbono Obio Ubọn̄ 25,402 ke isua 13 emi ẹbede, ndien oro etie nte ndibọp se ibede Ufọkmbono Obio Ubon̄ ition kpukpru usen. Mme Ntiense Jehovah ke ofụri ererimbot ẹkenọ okụk emi ẹkedade ẹbọp mme Ufọkmbono Obio Ubọn̄ oro. Ke adianade do, ke ini oto-obot afanikọn̄ etịbede, mme anamutom emi esika ẹkediọn̄ m̀mê ẹbọp mme Ufọkmbono Obio Ubọn̄ m̀mê mme ufọk emi oto-obot afanikọn̄ oro akabiatde.

 

San̄asan̄a Mbono:

Ke 2012, Mme Ntiense Jehovah ẹma ẹnịm ediwak mbono emi mme owo ẹketode nsio nsio itie ke ererimbot ẹkedụk. Nso ikedi ukpụhọde ye mbono ofụri ererimbot oro ẹkenịmde ke edem?

 

Vidio emi ama owụt ke n̄kọk itieutom ke mme obio emi ẹkenịmde mme mbono oro ẹkenam kpukpru ndutịm—ndutịm ufọkidụn̄, udia uwemeyo, ye nte ẹdisan̄ade ikodụk mbono oro kpukpru usen. N̄kpọ nte owo 1,500 ẹkedụk san̄asan̄a mbono emi kiet kiet.

 

San̄asan̄a mbono emi ama anam Mme Ntiense oro ẹtode nsio nsio ebiet ẹmehe ye kiet eken, idịghe ke ini ẹdụkde mbono kpọt, edi n̄ko ke ini ẹsan̄ade ẹse mme ebiet, ke ini udia, ye ke ini ẹkwọrọde ikọ ẹnọ mme owo do. Ẹma ẹtịn̄ ke vidio oro ẹte: “Ẹma ẹnen̄ede ẹkụt nte ima nditọete adiande mme owo ọtọkiet ke kpukpru ebiet oro ẹkenịmde san̄asan̄a mbono oro.”

 

Mme andidụk mbono emi ẹma ẹnen̄ede ẹnem esịt ndikop ke Mme Ntiense Jehovah ẹyesinịm san̄asan̄a mbono ntem kpukpru isua ke nsio nsio itie ke ererimbot.

 

Mme n̄kpọ en̄wen emi ẹkenemede ke mbono ofụri isua oro ekedi:

 

Ndụn̄ọde:

Ẹma ẹnam ndụn̄ọde ye mbon kọmiti n̄kọk itieutom ita ye iban mmọ. Kpukpru mmọ ẹnam utom uyọhọ ini ke isua 342, ndien mmọ ẹma ẹbụk nte Jehovah Abasi ọnọde mmọ ukpep ndinam nsio nsio utom mmọ.

 

Richard Kelsey, emi edide owo kọmiti n̄kọk itieutom ke Germany ọkọdọhọ ke Ufọkn̄wed Mbon Kọmiti N̄kọk Itieutom ye Iban Mmọ ama ekpep mmimọ “nditiene ndausụn̄ Jehovah kpukpru ini.” Jehovah edi edima Ete emi oyomde n̄kpọ ọfọn ye nnyịn. Brọda Kelsey ama adian do ete: “Jehovah oyom nnyịn idu uwem ke nsinsi, ndien enye ese aban̄a nnyịn ke kpukpru usụn̄.” Ufọkn̄wed emi ama ekpep mbon Kọmiti N̄kọk Itieutom ndikpebe Jehovah.

 

Linda Johansson akana baptism ke 1956, ọdọ ebe ke 1957, ẹkot enye ye ebe esie ẹdidụk Ufọkn̄wed Gilead ke 1958. Enye ọdọhọ ete: ‘N̄kaka n̄wed ye mbon oro ẹma ẹkebịghi ke esop Abasi ẹnyụn̄ ẹnen̄ede ẹnyene ifiọk. Eketie nte ndotke nditiene n̄ka ufọkn̄wed emi.’

 

Edi enye ama osụk aka iso ekpep n̄kpọ, ekem ke enye ama okokụre ukpep ke ufọkn̄wed emi, ẹma ẹnọ enye ye ebe esie ẹkenam utom Abasi ke Malawi. Ẹma ẹnen̄ede ẹkọbọ Mme Ntiense Jehovah ke Malawi, edi ke oro ebede, Sista Johansson ama ekpep Bible ye akwaowo ukara emi ọkọkọbọde Mme Ntiense Jehovah. Mfịn, ete oro ye n̄wan esie, ye nditọ iba ẹdi Mme Ntiense Jehovah oro ẹma ẹkena baptism.

 

Ukwọrọikọ ke Manhattan:

Owo inan̄ emi ẹma ẹkekụre ukpep ke Ufọkn̄wed Ukpep Bible Eke Mme Christian Oro Ẹdọde Ndọ ye esenyịn oro esisan̄ade ese esop Mme Ntiense Jehovah ke New York City ẹma ẹtịn̄ nte ikọkwọrọde ikọ inọ mme owo ke efak emi mme owo ẹsiwakde etieti ke Manhattan.

 

Mme Ntiense Jehovah ẹma ẹnịm okpokoro ẹnyụn̄ ẹbon mme n̄wed Ikọ Abasi ke mme ebiet emi ata ediwak owo ẹsisan̄ade ẹbe. Ediwak owo ẹma ẹbọ n̄wed, ẹbụp mme mbụme Bible ẹnyụn̄ ẹdọhọ ẹdikpep mmimọ Bible.

 

Mme Ntiense ke mme ebiet en̄wen ke New York City, Chicago ye Los Angeles ke ẹnam ukem n̄kpọ emi. Ke isua kiet kpọt, n̄kpọ nte owo 2,700 emi ẹkekade itie ubon n̄wed emi ẹma ẹdọhọ ẹdikpep mmimọ Bible.

 

Ikwọ Nditọwọn̄:

Iwakke owo emi mmọn̄eyet mîkasiahake ke ini nditọwọn̄ 17 ẹkekwọde ọyọhọ Ikwọ 120 ke n̄wedikwọ nnyịn, Kwọ Ikwọ Nọ Jehovah, oro edi, “Kop Nyụn̄ Nam, man Ẹdiọn̄ Fi.”

 

Ekem, Brọda Jackson, Lösch, Pierce, Herd, Lett, ye Splane, emi ẹdide mbon Otu Ukara ẹma ẹnọ utịn̄ikọ emi anamde se Jesus eketịn̄de ke Matthew 24:45-47 an̄wan̄a. Jesus ọkọdọhọ ete:

 

“Anie ndien edi ofụn emi anamde akpanikọ onyụn̄ enyenede ọniọn̄ emi eteufọk esie ekemekde ete ese aban̄a mbonufọk imọ, onyụn̄ ọnọ mmọ udia ke nnennen ini? Ofụn oro oyokop inemesịt edieke eteufọk esie ke edide edisịm okụt enye anamde ntre! Ke akpanikọ ke ndọhọ mbufo nte, Enye eyemek enye ete ese aban̄a kpukpru inyene esie.”

 

Ẹma ẹbọrọ mme mbụme emi ke utịn̄ikọ oro:

 

Ini Ewe ke Jesus Ekemek “Ofụn Emi Anamde Akpanikọ Onyụn̄ Enyenede Ọniọn̄” Ete Ese Aban̄a Mbonufọk Imọ?

Kere ban̄a se Jesus ekenemede ke Matthew ibuot 24. Kpukpru se Jesus eketịn̄de ke Matthew 24 ẹdisu ke “akpatre ini editịm n̄kpọ emi.”—Ufan̄ikọ 3.

 

  • “Ukụt mme usen oro.”—Ufan̄ikọ 29.

  • “Emana emi.”—Ufan̄ikọ 34.

  • “Usen ye hour oro.”—Ufan̄ikọ 36.

  • “Usen eke Ọbọn̄ mbufo ẹdidide.”—Ufan̄ikọ 42.

  • “Ke hour emi mbufo mîkereke, Eyen owo eyedi.”—Ufan̄ikọ 44.

 

Kpukpru emi ẹwụt ke Jesus ekemek “ofụn emi anamde akpanikọ onyụn̄ enyenede ọniọn̄” ke enye ama ọkọbọ ubọn̄ ke 1914.

 

Ke adianade do, ikọ Jesus okowụt ke “ofụn” emi edidu ke ini emi mme owo ẹdibụpde m̀mê “anie ndien edi ofụn emi anamde akpanikọ onyụn̄ enyenede ọniọn̄?” Sia edide edisana spirit ama ọnọ mme apostle odudu ndinam mme utịben̄kpọ, ufọn ikodụhe ndibụp m̀mê anie edi ofụn emi. (1 Corinth 14:12, 24, 25) Kpa ye oro ẹkeyetde mme apostle emi ye mme Christian eken ke eyo oro aran ke edisana spirit, mmọ ikedịghe “ofụn emi anamde akpanikọ onyụn̄ enyenede ọniọn̄” emi Jesus eketịn̄de aban̄a.

 

Kpukpru se inemede emi anam ikụt ke Jesus ekemek “ofun emi anamde akpanikọ onyụn̄ enyenede ọniọn̄” ete ese aban̄a “mbonufọk imọ” ke ini emi enye edidade ubọn̄ ke “akpatre ini editịm n̄kpọ emi.”

 

“Anie Ndien Edi Ofụn Emi Anamde Akpanikọ Onyụn̄ Enyenede Ọniọn̄?”

Jesus iketịn̄ke iban̄a owo kiet, edi eketịn̄ aban̄a mme owo emi ẹdidianade kiet inam utom nte otu. Jesus ọkọdọhọ ke idimek ofụn oro ite “ese aban̄a mbonufọk imọ,” onyụn̄ ọnọ mmọ “udia [eke spirit] ke nnennen ini.”

 

Ọtọn̄ọde ke 1919, ekpri otu mme Christian oro ẹyetde aran ke edisana spirit ẹdu ke ibuot itieutom Mme Ntiense Jehovah. Mmọ ẹse ẹban̄a utom ukwọrọikọ ke ofụri ererimbot, ẹnyụn̄ ẹnọ ikọt Abasi udia eke spirit. Ke isua ndondo emi, Otu Ukara Mme Ntiense Jehovah ẹnam kpukpru emi.

 

Kpukpru emi ẹwụt ke Jesus ekemek “ofụn emi anamde akpanikọ onyụn̄ enyenede ọniọn̄” ete ese aban̄a mbonufọk imọ ke 1919. Ofụn emi edi ekpri ibat nditọete irenowo emi ẹyetde aran, emi ẹdude ke ibuot itieutom Mme Ntiense Jehovah ke ini edidu Christ ẹnọ udia eke spirit ke nnennen ini. Ini mmọ ẹnamde utom ọtọkiet nte Otu Ukara ke mmọ ẹdi “ofụn emi anamde akpanikọ onyụn̄ enyenede ọniọn̄.”

 

Mmanie Ẹdi “Mbonufọk”?

Jesus ọkọdọhọ ke ẹyenọ “mbonufọk imọ udia ke nnennen ini.” “Ofụn emi anamde akpanikọ onyụn̄ enyenede ọniọn̄” ọnọ kpukpru ata mme anditiene Jesus udia eke spirit. Mmọdo, kpukpru mbet Christ—mbon oro ẹyetde aran ye “mme erọn̄ en̄wen—ẹdi ‘mbonufọk esie.’John 10:16.

 

Ke etịn̄ikọ ama akanam ntịn̄nnịm ikọ Jesus emi an̄wan̄a, otuowo ẹma ẹkwak ubọk ẹbịghi ke ntak idatesịt. Ediwak owo ẹma ẹtịn̄ nte esịt adatde mmimọ ndifiọk ke Jesus ada mmimọ nte ‘mbonufọk esie.’

 

Ini Ewe ke Jesus Emek Ofụn Emi Ete “Ese Aban̄a Kpukpru Inyene Esie”?

Jesus ọkọdọhọ ‘ke ini eteufọk esie edide edisịm’ ke enye edimek ofụn oro ete “ese aban̄a kpukpru inyene esie.” Ini ewe ke Jesus emi edide Eteufọk ofụn oro ekedi edisịm?

 

Ikọ Greek oro ẹkabarede ke Matthew ibuot 24 ufan̄ikọ 46 nte “edide edisịm” ke ẹnyụn̄ ẹkabade ke ufan̄ikọ 42 nte “edidide” ye ke ufan̄ikọ 44 nte “eyedi.” Ke mme ufan̄ikọ emi, Jesus owụt nte imọ ididide idibiere ikpe inọ ererimbot ke ini akwa ukụt.Matthew 24:30; 25:31, 32.

 

Ntre Jesus imekke kan̄a “ofụn” emi ite ese aban̄a “inyene” esie. Enye edinam emi ke ini akwa ukụt.

 

Nso Idi “Inyene” Jesus?

Jesus ọkọdọhọ ete: “Ẹnọ mi ofụri odudu ke heaven ye ke isọn̄.” (Matthew 28:18) Ntem, inyene Jesus odu ke enyọn̄ ye isọn̄. Emi esịne Obio Ubọn̄ Messiah.—Philippi 2:9-11.

 

Mmọdo, Jesus ayanam mme Christian oro ẹdide “ofun emi anamde akpanikọ onyụn̄ enyenede ọniọn̄” ẹset ẹka heaven onyụn̄ ọnọ mmọ odudu ndikara kpukpru inyene esie ke enyọn̄ ye ke isọn̄. Ukem utịp emi ke Jesus edinọ kpukpru mme Christian oro ẹyetde aran, emi ẹnamde akpanikọ.Luke 22:28-30; Ediyarade 20:6.

 

Brọda Splane ama ọnọ akpan ntọt ke ini enye ọkọnọde akpatre utịn̄ikọ. Ke enye ama okokot ikọ nsịnudọn̄ Jesus emi odude ke Matthew 28:20, enye ama ọdọhọ ete: “Enyene n̄kpọ en̄wen emi enemde nnyịn esịt. Nso idi oro? Edi ibuotikọ isua 2013, emi ẹdade ẹto Joshua 1:9. Itie Bible ọdọhọ ete: ‘Nyene uko nyụn̄ kop odudu . . . koro Jehovah Abasi fo odude ye afo.’”

 

“Nso iditịbe isua en̄wen?” Brọda Morris okobụp mbụme emi ke akpatre ikọ esie. Enye ọkọdọhọ ete: “Isua en̄wen, mbono ofụri isua emi edidi ke October 5, 2013. Ndien ẹyenam mme owo ẹtie ke nsio nsio Ufọk Mbono nnyịn ke United States ye ke mme idụt en̄wen emi ẹsisemde Ikọmbakara ẹkop edinam emi.”

Owo idikabakede isịn ke mme usem en̄wen, edi edinam ke Ikọmbakara kpọt.

 

Kpukpru owo ẹma ẹdian uyo ọtọkiet ndien ẹkwọ ọyọhọ Ikwọ 116, “Un̄wana Etetịm Ayama” ke n̄wedikwọ nnyịn, Kwọ Ikwọ Nọ Jehovah. Ikwọ oro ọdọn̄ọ ndinem ikọ nte:

 

“Ọbọn̄ nnyịn emek ofụn akpanikọ,

Ndinọ udia k’edikem ini.

Un̄wana ’kpanikọ etịm ayama,

Otụk ekikere y’esịt nnyịn.”