Be ka se isịnede

Be ka udiana n̄kpọ

Mme Ntiense Jehovah

Efịk

Mbono “Ẹsan̄a ke Ofụri Ererimbot” Emi Ẹkenịmde

Mbono “Ẹsan̄a ke Ofụri Ererimbot” Emi Ẹkenịmde

Ke isua 50 emi ẹkebede, Mme Ntiense Jehovah 583 ẹma ẹtọn̄ọ isan̄ emi akadade mmọ urua duop. Mmọ ẹkeyom ndika nsio nsio itie ke ererimbot. Idịghe nte ke mmọ ẹkeka ndise ndiye obio. Mmọ ẹkeyom ndikenịm mbono “Nsinsi Eti Mbụk” eke 1963 ye nditọete mmọ. Enyịn̄ efen emi ẹkenọde mbono emi ẹkedi “Ẹsan̄a ke Ofụri Ererimbot” koro Mme Ntiense 583 emi ẹkeka se ibede idụt 20 man ẹkenịm mbono emi ye nditọete mmọ.

Akpan n̄kpọ ke mbono emi ekedi utịn̄ikọ emi ibuotikọ ekedide “Ini Emi Abasi Edikarade Ofụri Ererimbot.” Nathan Knorr emi okotode ibuot itieutom Mme Ntiense Jehovah ọkọnọ utịn̄ikọ emi ke ediwak itie emi ẹkenịmde mbono oro. Enye ama etịn̄ aban̄a nte n̄kpọ ọdiọkde ke ererimbot onyụn̄ etịn̄ ke Bible ọn̄wọn̄ọ ke isọn̄ ayafiak edi Paradise. Ibat mbon emi ẹkekopde utịn̄ikọ emi ke kpukpru ebiet emi ẹkenịmde mbono oro ekedi 580,509.

“Ẹsan̄a ke Ofụri Ererimbot” ke Urua Duop

Ẹketọn̄ọ mbono emi ke Milwaukee, Wisconsin, U.S.A. Ekem, ẹnịm ke New York, England, Sweden, Germany, ye Italy. Ẹma ẹsikwọrọ ikọ n̄ko ẹnọ mme owo ke ebiet ekededi emi ẹkade ndinịm mbono emi.

Mbon emi ẹkekwọrọde ikọ ẹnọ ẹma ẹkop inemesịt. N̄kaiferi kiet ke Stockholm, Sweden, ọkọdọhọ ete: “Tutu amama ndifreke ke mbufo ẹma ẹdi mi. . . . Ndi ukụre se ikadade mbufo idi mi edi nditịn̄ n̄kpọ mban̄a Abasi? Edi se ẹkponode mbufo.”

Mbon Athens ke Greece ikadarake mbon emi ẹkedide ndinịm mbono emi. Mme etubom ufọkabasi do ẹma ẹnyịk ukara ẹte ẹkûnyịme ẹnịm mbono ke An̄wambre Panathinaikos. Ukara ẹma ẹnyụn̄ ẹnam ntre. Edi Mme Ntiense emi ikayakke oro afịna mmọ. Etisịm utịt ọfiọn̄ August, n̄kpọ nte owo 100,000 ẹma ẹdụk mbono oro ẹkenịmde ke ufọk mme owo ye ke mme Ufọkmbono Obio Ubọn̄.

Ẹma ẹkpọn̄ Athens ẹka Lebanon, Jordan, Israel, ye Cyprus. Mme Ntiense ke mme idụt oro ẹma ẹtịm ẹkama mme enịm mbono oro. Ndusụk n̄kpọ emi mmọ ẹkenamde ama enem owo imam etieti. Ke uwụtn̄kpọ, kiet ke otu mme enịm mbono oro etịn̄ se iketịbede ke Nicosia, Cyprus ete: ‘Mma nnyọn̄ ndi, nyosion̄o ikpaukot mi mbon. Ikpaukot ọmọn̄ osop, ekem ko mfiak n̄kụt. Ẹma ẹsikwọhọde ikpaukot mi ẹnyụn̄ ẹtụk enye esem!’

Ẹma ẹkpat isan̄ ekesịm India, Burma (idahaemi Myanmar), Thailand, Hong Kong, Singapore, Philippines, Indonesia, Australia, Taiwan, Japan, New Zealand, Fiji, ye Korea. Ediwak tọsịn nditọete ke mme idụt oro ẹma ẹtiene ẹdụk mbono oro. Ndusụk owo ẹma ẹdomo ukeme etieti ndidụk mbono emi. Owo iba ke Yokosuka, Japan emi ẹkeyomde ndinam ndọ ẹkenam ẹkan. Erenowo ama ọdọhọ eteutom esie ete ọnọ imọ ini idụk mbono oro ẹkenịmde ke Kyoto, edi eteutom esie ọdọhọ enye ke imọ isinọ owo ini edieke enye oyomde ndinam ndọ mîdịghe oyom ndibụk owo esie. Sia akparawa emi ye n̄kaiferi emi ẹma ẹkedaduak ndinam ndọ mmọ, mmọ ẹma ẹbiere ndisio usen ndọ mmọ ndi edem edem. Mmọ ẹma ẹda ini oro ẹkenọde mmọ ke itieutom ẹdụk mbono oro!

Isan̄ mbono emi ama esịm utịt ndien ke ntọn̄ọ ntọn̄ọ September. Ẹma ẹnịm mbono ke Hawaii ẹnyụn̄ ẹnịm akpatre ke California, U.S.A. Ke Pasadena, California, ibatowo ama awak akan se ẹkekerede. Mbono ama asuana, udịm moto ye mme owo ikedịghe ekpri. Okposụkedi emi ẹkewakde ntem, n̄wed mbụk n̄kpọntịbe California ọdọhọ ke akwa owo bodisi do ọkọdọhọ ke ‘akanam imọ ikwe mbono emi ẹwakde ntem edi ẹsụk ẹnam n̄kpọ ke nde ke nde.’

Mme Ufọn Ẹdiade Ẹto Mbono Oro

Ke isụk idadia ufọn mbono oro tutu emi. Ẹkesio “All Scripture Is Inspired of God and Beneficial” ke mbono emi. N̄wed emi etịn̄ n̄kpọ aban̄a Bible; Mme Ntiense Jehovah ke ẹsuk ẹkakama n̄wed emi tutu emi.

Harold King ke ini ẹkesiode enye ke ufọk-n̄kpọkọbi ke China

Ẹma ẹsio obufa ikwọ ke mbono eke New York. Ntiense kiet emi ekerede Harold King, emi ekesiode ke ufọk-n̄kpọkọbi ke China ke 1963, ekewet ikwọ emi. Ibuotikọ ikwọ emi ekedi “To ke Enyịnusụn̄ Sịm Enyịnusụn̄.” Harold King ekewet ikwọ emi ke ini enye okodude ikpọn̄ ke ufọk-n̄kpọkọbi. Mme Ntiense Jehovah ke ẹkwọkwọ ikwọ emi, edi idahaemi ibuotikọ edidi “Ke Ufọk ke Ufọk.”

Mme Ntiense Jehovah inịmke mbono ntre aba. Ẹdinịm ke n̄kpri n̄kpri itie man mme owo ẹkûwawak. Ẹnịm ke ediwak itie n̄ko man mme owo ẹdika ebiet emi oyomde usụn̄ akaha. Emi anam mme owo ẹkeme nditịm n̄kpan̄ utọn̄. Kpukpru isua, Mme Ntiense Jehovah emi ẹwakde ẹbe miliọn itiaba ye isenowo mmọ ẹsidụk mbono nnyịn. Ndi akpama nditiene ndụk isua emi? Mbọk yom ebiet emi ekperede fi dụk.

 

 

Kpep N̄kpọ En̄wen

MMANIE ẸNAM UDUAK JEHOVAH MFỊN?

Ntak Emi Mme Ntiense Jehovah Ẹsidụkde Ikpọ Mbono?

Nnyịn imesidụk akpan mbono ita kpukpru isua. Nso ke akpanam man etiene ọbọ ufọn mbono emi?