Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

Edinam Ukụre Ufọkn̄wed Gilead—Ọyọhọ Otu 138

Edinam Ukụre Ufọkn̄wed Gilead—Ọyọhọ Otu 138

Ke March 14, 2015, ẹma ẹnam usọrọ ukụre n̄wed ẹnọ nditọ ufọkn̄wed Gilead, ọyọhọ otu 138, ke An̄wa Ufọkn̄wed Mme Ntiense Jehovah ke Patterson ke New York. N̄kpọ nte owo 14,000 ẹkedụk edinam emi. Ndusụk mmọ ẹketie ke nsio nsio ebiet ẹse edinam emi ke TV. Ẹkeda mbufa ndinem ikwọ nnyịn inan̄ ẹtọn̄ọ edinam emi. Ekem, kpukpru owo ẹma ẹdiana uyo ẹkwọ mme ikwọ emi ke ini edinam emi. *

Geoffrey Jackson, emi esịnede ke Otu Emi Ẹsede Ẹban̄a Utom Mme Ntiense Jehovah, ekedi etieibuot okpokoro edinam emi. Ke ntọn̄ọ ikọ esie, enye ama ọdọhọ nditọ ufọkn̄wed emi ete mmọ ẹkûdịp se mmọ ẹkpepde ke Ufọkn̄wed Gilead, edi ẹda se mmọ ẹkpepde ẹkpep mbon en̄wen n̄ko.—2 Timothy 2:2.

Brọda Jackson ama eti nditọ ufọkn̄wed emi eti uwụtn̄kpọ emi Moses ekenịmde. Enye ọkọdọhọ ke ama enyene ini emi ofụri idụt Israel ẹkesikade tent Moses ẹketuak ibuot ẹnọ Abasi. Edi ke ẹma ẹkebọp ataya ẹma, owo ikesikaha tent Moses aba ikatuak ibuot inọ Abasi, edi ẹkesituak ke ataya oro. Ndien etie nte owo ikakam iyakke Moses odụk esịt Ata Edisana ke ataya oro, akwa oku kpọt ekesidụk. Edi Moses ikayatke esịt idọhọ m̀mê nso inam ẹbọ imọ ifet emi ẹnọ Aaron. Utu ke oro, enye akakam an̄wan̄wam Aaron ekeme ndinam utom esie nte akwa oku. (Exodus 33:7-11; 40:34, 35) Nso ke oro ekpep nnyịn? Brọda Jackson ọkọdọhọ ete: “Dara utom ekededi emi ẹnọde fi, kûdedịp mmọ.”

“Ndi Uyom Ikọn̄ Emi Enyen̄ede Ayanam FI Ndịk?” Brọda Kenneth Flodin, emi esin̄wamde Kọmiti Unọ Ukpep Otu Emi Ẹsede Ẹban̄a Utom Mme Ntiense Jehovah, eketịn̄ ikọ ke ibuotikọ oro. Enye ọkọdọhọ ke n̄kpọ ekeme nditịbe emi edinamde nditọ ufọkn̄wed oro ndịk, utọ nte ukọbọ, m̀mê utom emi etiede nte okpon akan mmọ. Ke ama okokot Leviticus 26:36, enye ama ọdọhọ nditọ ufọkn̄wed oro ete edieke n̄kpọ etiede nte okpon akan mmọ, yak mmọ ẹkûfehe ndịk, edi ẹda n̄kpọ oro nte nsatikọn̄ emi mîkemeke ndinam owo n̄kpọ ndomokiet. Brọda Flodin ama etịn̄ aban̄a apostle Paul emi Jehovah akan̄wamde ọyọ nsio nsio afanikọn̄ koro enye ama ọbuọt idem ke Jehovah.2 Corinth 1:8, 10.

“Nso ke Mbufo Ẹyom?” Mark Sanderson, emi esịnede ke Otu Emi Ẹsede Ẹban̄a Utom Mme Ntiense Jehovah, eketịn̄ ikọ ke ibuotikọ oro. Enye ama etịn̄ se idude ke Mme N̄ke 13:12, emi ọdọhọde ete: “Idotenyịn emi ebịghide ndidi anam esịt ọdọn̄ọ.” Enye ama ọdọhọ ke esịt esiduọ ata ediwak owo sia mmọ ẹyomde se ubọk mmọ mîsịmke, utọ nte inyene m̀mê uwọrọetop.

Ke eyo Jesus, ndusụk owo ẹkekere ke John Andinịm Owo Baptism edi emi m̀mê oko. (Luke 7:24-28) Edieke mmọ ẹkekerede ke John edi ataifiọk emi edikpepde mmimọ ikpîkpu ifiọk owo emi ediwak owo ẹmade ndikop, ọwọrọ idotenyịn mmọ ama akpa mfụhọ sia John ikekpepde utọ n̄kpọ oro, edi ekekpep ata etop akpanikọ. Edieke mbon eken ẹkekerede ke John edisịne ọfọn̄ nte eyen-ọbọn̄ isan̄a ikwọrọ ikọ, idotenyịn mmọ ama akpa mfụhọ n̄ko sia John ekesịne ọfọn̄ eyen ubuene. Amaedi mbon emi ẹkeyomde ndikụt prọfet Abasi, idotenyịn mmọ ikakpaha mfụhọ sia John ekedi ata profet Abasi, afiak edi andidiọn̄ usụn̄ nnọ Messiah!—John 1:29.

Nso ke emi ekpep nnyịn? Brọda Sanderson ọkọdọhọ nditọ ufọkn̄wed ẹyom nti n̄kpọ, ẹkûyom se ubọk mmọ mîsịmke. Utu ke nditie n̄kere nte ikpedide emi m̀mê oko ke esop Abasi, m̀mê ndiyom nditọete ẹda mmimọ nte ikpọ owo ke esop, yak mmọ ẹkam ẹkere nte ikpadade se mmimọ ikpepde ke Gilead in̄wam mme owo. Mmọ ẹkeme ndinam mi ke ndikpep mme owo se mmọ ẹkpepde ke Gilead, nda se mmọ ẹkpepde nsọn̄ọ nditọete idem, nnyụn̄ mma mmọ. Brọda Sanderson ekeberi ikọ esie ntem: “Edieke oyomde ndidi eyenete emi osụhọrede idem anam n̄kpọ ọnọ nditọete fo, owo emi esịnde idem anam uduak Jehovah, idotenyịn fo idikpaha mfụhọ tutu amama.”

“Nọ Mbon Emi Biọn̄ Ọdọn̄de Udia.” Brọda James Cauthon, andikpep ke Ufọkn̄wed Giliead eketịn̄ ikọ ke ibuotikọ emi. Brọda Cauthon ọkọdọhọ ke ediwak owo ẹyom ẹma mmimọ, ẹtoro mmimọ, ẹnyụn̄ ẹda mmimọ nte owo. Jesus emi akakam edide Eyen Abasi ama oyom kpukpru emi. Ke ini enye akanade baptism, Jehovah ama anam enye ọdiọn̄ọ ke imama enye, ke imonyụn̄ inyịme se enye anamde.—Matthew 3:16, 17.

Jehovah ọnọ nnyịn inua ye ibifịk ndida ntoro owo nnyụn̄ ntịn̄ ikọ emi ọsọn̄ọde owo idem. Ndien Jehovah oyom nnyịn isinam ntre. (Mme N̄ke 3:27) Brọda Cauthon ọkọdọhọ nditọ ufọkn̄wed ete: “Kpep ndikụt nti n̄kpọ emi mme owo ẹnamde, nyụn̄ sọsọp toro mmọ.” Ama otoro nditọete fo ke ofụri esịt, mmọ ẹyediọn̄ọ ke se mmimọ inamde ọfọn onyụn̄ ọwọrọ usụn̄.

“Kûkpa Mba ke Ndinam Eti N̄kpọ.” Brọda Mark Noumair, andikpep ke Gilead, emi esinyụn̄ an̄wamde Kọmiti Unọ Ukpep, eketịn̄ ikọ ke ibuotikọ oro. Enye akada apostle Paul ọnọ uwụtn̄kpọ. Brọda Noumair ọkọdọhọ nditọ ufọkn̄wed ete ẹkûdi ẹma ẹnanam se ẹdọhọde mmọ ẹnam, mmọ ẹte ke imama uwa. Edi ke se idinọde mmọ inemesịt edi ndinam n̄kan se ẹdọhọde mmọ ẹnam, ndiwa idem ofụri ofụri nnam n̄kpọ nnọ mme owo nte Paul akanamde.—Philippi 2:17, 18.

Idem ke ini n̄kpọ mîkọfọnke ye Paul, enye ikakpaha mba. Edi enye ama aka iso awa idem anam utom Abasi, anam n̄kpọ ọnọ mme owo tutu esịm usen n̄kpa esie. Ntak edi oro enye enye ọkọdọhọde ete: “Mmefehe mbuba nsịm utịt.” (2 Timothy 4:6, 7) Brọda Noumair ama ọdọhọ nditọ ufọkn̄wed oro ete ẹsịn idem ofụri ofụri ẹnam n̄kpọ Obio Ubọn̄ Abasi kpa nte Paul akanamde.

Nditọ Ufọkn̄wed Ẹtịn̄ Se Iketịbede. Brọda Michael Burnett, emi edide andikpep ke Gilead, ama ọdọhọ ndusụk nditọ ufọkn̄wed ẹtịn̄ ẹnyụn̄ ẹnanam ẹwụt se iketịbede ke ini mmọ ẹkekade ukwọrọikọ.

Se mmọ ẹketịn̄de ama owụt se ikan̄wamde mmọ ẹkeme ndikwọrọ ikọ nnọ mme owo. N̄kpọ kiet emi akan̄wamde mmọ ekedi ndinen̄ede ntịn̄ enyịn nse nte mme owo ẹnamde n̄kpọ nnyụn̄ ndomo ndinyene nneme ye owo ekededi oro mmọ ẹkụtde. N̄kpọ en̄wen ekedi ndikpep ndikwọrọ ikọ ke usem emana owo oro, “usem emi odụkde owo esịt.” Ke uwụtn̄kpọ, ẹkedọhọ eyen ufọkn̄wed kiet ke nditọ Spain ẹyọhọ ebiet oro ẹdọhọde enye aka ukwọrọikọ. Ntre, mbemiso enye adahade ukwọrọikọ, enye ama ada JW Language app ekpep ikọ ifan̄ ke usem Spanish. Kpa usen oro, enye ama okụt ete kiet emi ẹsisịmde Spanish ke efak. Eyen ufọkn̄wed emi ama ada ekpri Spanish emi enye ekekpepde ọtọn̄ọ nneme ye enye. Nneme emi ama okosụn̄o ke ukpepn̄kpọ Bible, ndien owo inan̄ ke ufọk ete oro ẹma ẹtiene ẹkpep Bible.

Ẹbụp Nditọ Ufọkn̄wed Inan̄ Mbụme. Ekem, Brọda William Turner, Jr., emi esin̄wamde Kọmiti Utom, ama obụp nditọ ufọkn̄wed inan̄ n̄kpọ aban̄a nte ufọk eketiede mbemiso mmọ ẹdide Gilead ye nte Ufọkn̄wed Gilead etiede.

Nditọ ufọkn̄wed emi ẹma ẹtịn̄ ndusụk se ẹkekpepde mmọ ye se mmọ ẹkenen̄erede ẹma ke ufọkn̄wed oro. Ke uwụtn̄kpọ, eyen ufọkn̄wed kiet ama etịn̄ se enye ekekpepde oto se idude ke Luke ibuot 10. Itie oro ọdọhọ ke mbet 70 emi Jesus ọkọdọn̄de ukwọrọikọ ẹma ẹkop idatesịt etieti ke ini mme demon ẹkesụkde ibuot ẹnọ mmọ. Kpa ye oro Jesus eketienede mmọ adat esịt, enye ama anam mmọ ẹfiọk ke idịghe se itịbede ke ini mmọ ẹkwọrọde ikọ akpanam esịt adat mmọ, edi ke se ikpakam idatde mmọ esịt edi ndifiọk ke Jehovah ama se mmọ ẹnamde. Oro ọwọrọ ke idịghe se inamde edinam ikop ata inemesịt, edi se idinọde nnyịn ata inemesịt edi ndifiọk ke Jehovah ama se inamde.

Brọda Turner ama ọdọhọ nditọ ufọkn̄wed oro ke mmọ ẹnam se idude ke Philippi 1:6, onyụn̄ ọdọhọ mmọ ke Jehovah “emi ọkọtọn̄ọde eti utom” ke idem mmọ idikpọn̄ke mmọ.

“Wụk Enyịn Se Jehovah.” Brọda Samuel Herd, emi esịnede ke Otu Emi Ẹsede Ẹban̄a Utom Mme Ntiense Jehovah, eketịn̄ ikọ ke ibuotikọ oro. Utịn̄ikọ esie ekedi akpan utịn̄ikọ ke edinam oro. Enye ama ọdọhọ ete, ‘Sia mîdụhe eke ekemede ndikụt Abasi, didie ndien ke ikeme ndiwụk enyịn nse Jehovah?’

Usụn̄ kiet emi ikemede ndiwụk enyịn nse Jehovah edi ndise se enye obotde. Mme n̄kpọ emi enye obotde ekpep nnyịn ediwak n̄kpọ ẹban̄a enye. Akan oro, Jehovah ‘anam enyịn esịt nnyịn an̄wan̄a’ man ikeme ndidiọn̄ọ enye. (Ephesus 1:18) Ntre, adan̄a nte ikotde Bible, ntre ke iditịm idiọn̄ọ Jehovah. Ndien nte itịmde idiọn̄ọ Jehovah, ntre ke iditịm ikpere enye.

Edieke itịn̄de enyịn ikpep mme Gospel, nnyịn iyokụt nte Jehovah etiede sia mme n̄wed Bible emi ẹtịn̄ nte Jesus emi edide mbiet Abasi akanamde n̄kpọ ye nte enye eketịn̄de ikọ. Jesus ekenen̄ede anam n̄kpọ nte Ete esie. Ntak edi oro enye ọkọdọhọde ete: “Owo eke okụtde mi okụt Ete n̄ko.”—John 14:9.

Brọda Herd ọkọdọhọ kpukpru owo ete ẹda se mmọ ẹkpepde ẹban̄a Jesus ẹfiọk nte Jehovah etiede, ẹnyụn̄ ẹdomo ndikpebe Jesus. Ke uwụtn̄kpọ, kpa nte Jesus akadade se enye enyenyene ọbọk mme owo, akpana nnyịn n̄ko ida se ikpepde ke Bible ibọk mme owo n̄ko.

Nso iditịbe edieke ikade iso ise Jehovah? Nnyịn iyekeme nditịn̄ se andiwet psalm eketịn̄de ete: “Mmenịm Jehovah ke iso mi kpukpru ini. Koro enye odude mi ke ubọk nnasia, ami ndisehekede.”—Psalm 16:8.

Akpatre N̄kpọ. Ke nditọ ufọkn̄wed emi ẹma ẹkebọ n̄weditoro mmọ, owo mmọ kiet ama okot leta ekọm emi mmọ ẹkewetde. Ekem Brọda Jackson ama ada edinam emi ekeberi ke ndidọhọ nditọ ufọkn̄wed ke inaha mmọ ẹkere ke emi ima ikọnyọn̄ Gilead mi, ke akpana kpukpru se mmimọ ikpepde idahaemi etie ata obufa obufa nte owo emi akakade Gilead. Enye ọkọdọhọ ke ediwak se mmọ ẹdikpepde nditọete mmọ ẹdide se nditọete emi ẹma ẹkefọfiọk. Brọda Jackson ama ọdọhọ mmọ ẹnen̄ede ẹsụhọde idem. Utu ke ndidi ẹte itịn̄ ekpri ikọ, mmọ ẹdọhọ, ‘ẹkekpep nnyịn ke Gilead ete,’ yak mmọ ẹkam ẹdọhọ ntem: ‘N̄wed Abasi m̀mê n̄wed esop Abasi ọdọhọ ete.’ Ntre, oro idifịnake nditọete emi edide tutu amama mmọ idikemeke ndika Ufọkn̄wed Giliead, edi mmọ ẹyen̄wam nditọete mmọ ẹtiene ẹbọ ufọn Ufọkn̄wed Gilead emi mmọ ẹkụrede mi. Kpukpru owo emi ẹkedụkde edinam emi ẹma ẹnen̄ede ẹkop inemesịt ẹnyụn̄ ẹbiere ndinyọn̄ n̄kada se ikopde nsọn̄ọ nditọete mmọ idem.

^ ikp. 2 Ẹma ẹnọnọ mbon oro ẹdidụkde edinam emi mbufa ikwọ emi mbemiso usen edinam emi.

^ ikp. 32 Idịghe kpukpru idụt ke edikụt ke map emi.

^ ikp. 34 Idịghe enyịn̄ kpukpru mmọ odu mi.

Kpep N̄kpọ En̄wen

Nso Idi Utom Isụn̄utom?

Nso ke owo akpanam edieke enye oyomde ndidi isụn̄utom? Ewe ufọkn̄wed ke enye edika?