Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

Signboard Watchtower Ebịghi ke Brooklyn

Signboard Watchtower Ebịghi ke Brooklyn

Ebe isua 40 ẹkenam ndatndat signboard Watchtower emi ẹdian ke enyọn̄ ibuot itieutom ofụri ererimbot Mme Ntiense Jehovah ke Brooklyn, ke New York. Iwakke owo ke York City emi mîdiọn̄ọke akaka signboard emi. Ediwak mbon New York City ẹsida enye ẹdiọn̄ọ ini ye nte eyo editiede.

Eboni esitie ke ufọk esie okụt signboard emi. Enye ọkọdọhọ ete: “Esinem mi ndida ke window mfiọk ini n̄kanika ye nte eyo editiede mbemiso ndahade utom. Emi esinam n̄ka utom ke ini, onyụn̄ anam ndiọn̄ọ se n̄kpesịnede man tuep m̀mê ufiop ediwot mi.

Ndi n̄kpọ emi ayaka iso odu mi ke isua 40 en̄wen? Nnyịn ikereke ntre sia imọn̄ isio ibuot itieutom ofụri ererimbot nnyịn ika ebiet en̄wen ke New York. Ntre, mbon oro ẹdidepde ufọk emi ẹdibiere m̀mê iyayak n̄kpọ emi aka iso odu m̀mê idiyakke.

Odu signboard emi akpa mme andinyene ufọk emi ẹkediande ke n̄kpọ nte isua 70 emi ẹkebede. Mme Ntiense Jehovah ẹkedian̄ade signboard oro ẹdian enye emi ke mmọ ẹma ẹkedep ufọk emi ke 1969.

Esinam utom ke signboard emi kpukpru ini. Ata ediwak n̄kparawa ye n̄kaiferi ẹsidiọn̄ signboard emi ke ubọk ke ubọk, okoneyo ye uwemeyo.

Owo kiet ọdọhọ ete: “Ete kiet emi anamde utom ke ufọktuom TV ama okot nnyịn okoneyo kiet ete ke n̄kanika signboard emi ọsọp ke sekọn 15. Enye okoyom nnyịn inam enye asan̄a ọfọn man ikpetịn̄ ikọ iban̄a n̄kanika emi ke TV okoneyo oro. Owo emi esidiọn̄de n̄kanika oro ama ọsọsọp adaha ada ye enyịn idap akanam enye asan̄a ọfọn okoneyo oro.

Imanam utom ke n̄kanika emi ediwak ini man enye asan̄a ọfọn onyụn̄ anam owo ọfiọk nte eyo editiede nnennen nnennen. Ke ufọt ufọt iduọk isua 1980, ima idian n̄kpọ en̄wen emi osụk anamde owo ọfiọk nte eyo editiede (ke Celsius ye Fahrenheit).

Ke 2009, ima ision̄o kpukpru n̄kani ikan̄ oro ikọdọn̄de ke signboard emi idọn̄ mbufa. Mbufa emi ẹnen̄ede ẹfọn ẹkan akpa ẹnyụn̄ ẹbịghi uwem. Enye etie awawa awawa ye ndatndat ndatndat, inyụn̄ idiaha okụk nte akani oro ikosion̄ode ifep.