Be ka se isịnede

Be ka udiana n̄kpọ

Mme Ntiense Jehovah

Efịk

Ẹtọ Ndusụk N̄kọk Itieutom Mme Ntiense Jehovah Ẹdọn̄ Kiet

Ẹtọ Ndusụk N̄kọk Itieutom Mme Ntiense Jehovah Ẹdọn̄ Kiet

Ke September 2012, ẹma ẹdọhọ ikpọ n̄kọk itieutom ẹse ẹban̄a se ẹnamde ke se ibede n̄kọk itieutom Mme Ntiense Jehovah 20.

Ke adianade do, ẹma ẹsiak mbufa n̄kọk itieutom ke Serbia ye Macedonia. Odu akpan ntak iba oro anamde ẹnam emi.

1. Mbufa n̄kpọ oro ẹsion̄ode ẹdi ẹnam utom emem.

Ke mme isua ndondo emi, mbufa usụn̄ oro ẹdade ẹneme nneme ye mbufa ukwak umịn̄n̄wed ẹnam utom emem ke ikpọ n̄kọk itieutom ndien emi anam ẹsụhọde ibat mbon oro ẹkesinamde utom emi. Sia owo mîwakke aba ke ikpọ n̄kọk itieutom, ẹnyene ndien ufan̄ ẹnọ mbon oro ẹkesinamde utom ke n̄kpri n̄kọk itieutom ke mme idụt efen.

Idahaemi, Mme Ntiense oro ẹnyenede mbufiọk ẹdise ẹban̄a utom unọ ukpep Bible ke ikpọ n̄kọk itieutom. Ke uwụtn̄kpọ, n̄kọk itieutom Mexico edise aban̄a utom ukwọrọikọ ke Costa Rica, El Salvador, Guatemala, Honduras, Nicaragua, ye Panama. Ke ntem, ẹma ẹberi n̄kọk itieutom ke idụt itiokiet emi.

Ẹma ẹnọ Ntiense 40 emi ẹkenamde utom ke n̄kọk itieutom itiokiet emi ẹkenam utom ke Mexico. N̄kpọ nte owo 95 eken ẹma ẹka iso ẹdu ke idụt mmọ ẹkwọrọ ikọ ofụri ini.

Mbon eken ke mme idụt Central America eken ẹma ẹtọn̄ọ ndinam utom ke mme itie ukabade n̄wed emi n̄kọk itieutom Mexico esede aban̄a. Ke uwụtn̄kpọ, n̄kpọ nte mme akabade n̄wed 20 ke Panama ẹkabade mme n̄wed ye mme n̄kpọ Ikọ Abasi en̄wen ẹsịn ke nsio nsio usem emi ẹsemde ke idụt emi. Ke akani n̄kọk itieutom emi okodude ke Guatemala, Mme Ntiense 16 en̄wen ke ẹkabade mme n̄wed ye mme n̄kpọ en̄wen ẹsịn ke usem inan̄. Ke Central America, idịghe aba owo 300 ẹnam utom ke n̄kọk itieutom, edi n̄kpọ nte owo 75 ẹdinam.

2. Mme anamutom Bethel ẹdibiat ini idahaemi ẹkwọrọ ikọ. Ke ntak emi ẹtọde ndusụk n̄kọk itieutom ẹdọn̄ kiet, mbon emi ẹkenamde utom ke n̄kpri n̄kọk itieutom emi ẹdida ini mmọ ẹkwọrọ ikọ.

Ete kiet ke Africa emi ẹkenọde ọkọkwọrọ ikọ ekewet ete: “Nsonso oro, ikememke ndinam ukpụhọde ke nte n̄kodude uwem man n̄keme ndinam utom emi. Edi ndika iso n̄kwọrọ ikọ kpukpru usen anam n̄kop inemesịt nnyụn̄ mbọ akpakịp edidiọn̄. Idahaemi n̄kpep Bible ye owo 20, ndien ndusụk mmọ ẹsitiene ẹdụk mbono esop.