Be ka se isịnede

Nte Ẹkenamde N̄kpọ ye Mme Oku Emi Ẹyatde Esịt

Nte Ẹkenamde N̄kpọ ye Mme Oku Emi Ẹyatde Esịt

Artur, esenyịn circuit ke Armenia, ama aka ekese esop Mme Ntiense Jehovah kiet. Enye ama okụt ke mmọ isimenke ukpatn̄kpọ emi ẹsidọn̄de n̄wed ika ikada ke ebiet emi mme owo ẹwakde ikwọrọ ikọ. Artur ye Anna an̄wan esie, ye Jirayr, ẹma ẹmen ukpatn̄kpọ oro ẹkeda ke ekpri obio kiet ẹkwọrọ ikọ. Mmọ ẹkeda ke ebiet emi ata ediwak owo ẹsisan̄ade ẹbe.

Ibịghike mme owo ẹma ẹtọn̄ọ ẹwaha ẹdi ẹdikop ukwọrọikọ ẹnyụn̄ ẹbọ mme n̄wed ikọ Abasi. Edi ẹtise, mbon emi mîmaha ukwọrọikọ oro ẹma ẹtọn̄ọ ẹdiọk esịt ke ntak obufa usụn̄ ukwọrọikọ emi. Oku iba ẹma ẹsan̄a ẹdi itie ẹkenịmde ukpatn̄kpọ oro, ndien kiet ama atịgha ukpatn̄kpọ oro asuan, ibụpke-bụp mbụme. Ekem enye asiak Artur ufia ke iso, akrasi enyịn ọwọrọ ọduọ. Artur, Anna, ye Jirayr ẹma ẹdomo ndinam mme oku oro ẹsụhọde esịt edi mmọ ikamaha ndisụhọde esịt. Oku iba oro ẹma ẹnuak ukpatn̄kpọ oro ke ikpat ẹnyụn̄ ẹsuan mme n̄wed ikọ Abasi. Mmọ ẹma ẹsụn̄i Mme Ntiense Jehovah oro ẹnyụn̄ ẹdọhọ ke iyanam mmọ n̄kpọ, ekem ẹn̄yọn̄ọ.

Artur ye n̄wan esie ye Jirayr ẹma ẹka ọfis mme bodisi ke obio oro ẹketịn̄ se iketịbede. Mmọ ẹma ẹnyụn̄ ẹneme n̄kpọ ifan̄ ke Bible ye ndusụk mme bodisi ye mbon eken oro ẹkenamde utom do. Ẹma ẹmen Ntiense Jehovah mbita oro ẹka ọfis akamba owo bodisi. Enye okoyom ndikop se iketịbede kpọt. Edi ke ini enye okopde ke Artur, emi okponde etak afara, ikan̄wanake ye mmọ ini ẹkesiakde enye ufia, akamba owo bodisi oro ama etre ndibụp se iketịbede, onyụn̄ ọtọn̄ọ ndibụp mban̄a se Mme Ntiense Jehovah ẹsikpepde. Nneme oro ama ada hour inan̄! Akwa owo bodisi oro ama ama se enye okokopde tutu enye ọdọhọ ete: “Ata eti ufọkabasi edi emi! Ọdọn̄ mi nditie nte mbufo!”

Artur ye Anna

Edem usen, Artur ama afiak aka ukwọrọikọ oro ke ebiet oro, ndien ete kiet emi okokụtde se iketịbede oro ama asan̄a edi. Ete oro ama ọkọm Artur ke nte enye akanamde n̄kpọ mîkonyụn̄ in̄wanake ye mme oku oro. Ekem ọdọhọ ke se oku iba oro ẹkenamde oro anam imọ ikponoke mmọ aba.

Mbubreyo oro, akwa owo bodisi ama afiak okot Artur ete edi ọfis mme bodisi. Edi utu ke ndineme mban̄a se iketịbede oro, enye ama obụp mmọ nsio nso n̄kpọ en̄wen ke Bible. Bodisi iba en̄wen ẹma ẹtiene ẹdisịn uyo ke nneme oro.

Edem usen, Artur ama afiak aka ebịne akamba owo bodisi oro okowụt enye mme vidio ikọ Abasi. Akamba owo bodisi oro ama okot mme bodisi eken ẹditiene ẹse.

Ntịme oro oku iba oro ẹkesịnde do ama anam ediwak bodisi ẹkop ikọ Abasi; akpa mmọ ẹkekopde ikọ Abasi ekedi oro. Emi ama anam mmọ ẹma Mme Ntiense Jehovah.