Be ka se isịnede

Owo Kiet Anam Ediwak Owo Ẹkpep Bible

Owo Kiet Anam Ediwak Owo Ẹkpep Bible

 Marta edi Ntiense Jehovah ke Guatemala. Enye ke ekpep usem Kekchi man ada ọkwọrọ ikọ ọnọ mme owo. Ediye usen kiet, enye ama okụt ete kiet ọwọrọde ke ufọkibọk. Ọfọn̄ ete oro ekesịnede ama anam Marta ekere ke ana edi ete oro edi owo Kekchi. Obio Kekchi odu ke obot, ndien Mme Ntiense Jehovah ẹsika do ẹkekwọrọ ikọ ndusụk ini. Marta ama asan̄a ebịne enye ekesem ekpri Kekchi ifan̄ ye enye.

 Marta ama obụp enye m̀mê enye akpama ndikpep Bible. Enye ama enyịme, edi ọdọhọ ke imọ inyeneke okụk. Marta ama anam enye ọdiọn̄ọ ke Mme Ntiense Jehovah ẹsikpep mme owo Ikọ Abasi ke mfọn. Onyụn̄ ọdọhọ enye ke iyesida fon ineme Ikọ Abasi ye enye, ke n̄wan ye nditọ esie ẹkeme nditiene ntie. Ete oro ama enyịme. Marta ama ọnọ enye Edisana N̄wed Abasi—Edikabade Eke Obufa Ererimbot ke usem Spanish. Enye ama onyụn̄ ọnọ ete oro n̄wed Ikọ Abasi emi ẹkotde Nso ke Bible Enen̄ede Ekpep? Urua iso oro, Marta ama ọtọn̄ọ ndida fon n̄kpep ete oro ye n̄wan esie ye nditọ esie iba Bible. Mmọ ẹkesikpep Bible ikaba ke urua. Marta ọdọhọ ete: “N̄kesida usem Spanish n̄kpep mmọ Bible sia usem Kekchi ikenen̄ekede in̄wan̄a mi. Ete oro ama esikabade se inemede ọnọ n̄wan esie sia n̄wan esie ikokopke Spanish, edi nditọ esie ẹma ẹkop Spanish.”

 Ete oro ekedi pastor. Enye ama ọtọn̄ọ ekpep mbon ufọkabasi esie se Mme Ntiense Jehovah ẹkesikpepde enye ke Bible. Mbon ufọkabasi esie ẹma ẹma se enye ekekpepde mmọ oro, ẹnyụn̄ ẹbụp enye m̀mê enye esida utọ edinem Ikọ Abasi oro ke m̀mọ̀n̄. Enye ama ọdọhọ ke enyene owo esikpepde imọ Bible, ndusụk mmọ ẹma ẹtọn̄ọ ndisitiene nditie n̄kpep. Ẹtise, owo 15 ke otu mmọ ẹma ẹsitiene ẹdikpep kpukpru urua. Marta ekesida fon ekpep mmọ Bible. Ekem mmọ ẹma ẹsimen microphone ẹnịm ẹkpere fon man anam kpukpru owo ẹnen̄ede ẹkop se Marta etịn̄de.

 Marta ama ọdọhọ mbiowo esop mmọ ke ima itọn̄ọ ndisida fon n̄kpep pastor kiet Bible, ndien ke idahaemi ke n̄kpọ nte owo 15 ẹsitiene ẹditie ẹkpep. Owo kiet ke otu mbiowo mmọ ama aka obio oro ekese mbon Marta esikpepde n̄kpọ do. Enye ama okot mmọ ẹtiene ẹdikop ikọ Abasi emi esenyịn circuit a edikwọrọde ke obio kiet emi ekperede obio mmọ. Ẹsiwat n̄kpọ nte hour kiet ẹto obio mmọ ẹka obio oro, mîdịghe ẹsan̄a hour iba ke ukot. Mmọ ẹma ẹdọhọ ke iyedi, owo 17 ke otu mmọ ẹkeka.

 Ke urua ifan̄ ama ekebe, esenyịn circuit oro ama asan̄a ye Mme Ntiense Jehovah ifan̄ ẹka obio oro, ẹkedu ye mbon Marta esikpepde Ikọ Abasi do usen inan̄. Kpukpru usenubọk, mmọ ẹma ẹsise mme vidio ikọ Abasi usem Kekchi ke jw.org, mmọ ẹma ẹsinyụn̄ ẹkpep ekpri n̄wed oro Mmanie Ẹnam Uduak Jehovah Mfịn? Ndien uwemeyo, mmọ ẹma ẹsise nsio nsio n̄kpọ ke Edinam TV Mme Ntiense Jehovah. Esenyịn circuit oro ama anam ndutịm man mmọ owo kiet kiet ẹnyene owo emi edisikpepde mmọ Bible.

 Mme Ntiense Jehovah oro ẹma ẹda usen inan̄ oro n̄ko ẹkwọrọ ikọ ke mme obio eken oro ẹsisemde Kekchi, ẹnyụn̄ ẹkot mmọ ẹdidụk san̄asan̄a ikọ Abasi kiet. Ẹma ẹdọhọ owo 47 oro ẹkedide ikọ Abasi oro m̀mê mmọ ẹkpema ndikpep Bible. Ubon duopekiet ke otu mmọ ẹma ẹdọhọ ke imama.

 Ke ọfiọn̄ ifan̄ ama ekebe, mbiowo oro ẹma ẹnam yak ẹsinịm mbonoesop ke usem obio oro kpukpru urua. Idahaemi n̄kpọ nte owo 40 ẹsidụk mbono esop do kpukpru urua. Owo 91 ẹkedụk editi n̄kpa Christ emi ẹkenịmde do; esịt ama enem Mme Ntiense Jehovah oro etieti.

 Ofụri se iketịbede emi tọn̄ọ ke ntọn̄ọ tutu esịm emi, anam Marta ọdọhọ ete: “Jehovah anam tutu. Ndusụk ini mmesikere ke inyeneke se n̄kemede ndinam. Edi Jehovah ekeme ndida owo nnyịn ekededi nnam uduak esie. Enye ama okụt esịt mbio obio oro onyụn̄ ada ikọt esie an̄wam mmọ. Jehovah ama mmọ etieti.”

a Esenyịn circuit edi Ntiense Jehovah emi esisan̄ade ọsọn̄ọ mme esop idem ke circuit—n̄kpọ nte esop 20 ẹsidu ke circuit kiet.