Be ka se isịnede

Be ka udiana n̄kpọ

Mme Ntiense Jehovah

Efịk

Ntak Emi Mbufo Mîsidiaha Christmas?

Ntak Emi Mbufo Mîsidiaha Christmas?

Ukwan̄ ekikere

Nsu: Mme Ntiense Jehovah isidiaha Christmas sia mmọ inịmke Jesus ke akpanikọ.

Akpanikọ: Nnyịn idi mme Christian. Nnyịn inịm ke Jesus Christ kpọt edinam owo enyene edinyan̄a.—Utom 4:12.

Nsu: Mbufo ẹmebahade mme ubon ke ndikpep mme owo ẹte ẹkûdia Christmas.

Akpanikọ: Nnyịn imenen̄ede ima mme ubon, imesinyụn̄ ida Bible in̄wam mmọ ẹdiana kiet.

Nsu: Mbufo isitieneke itat ubọk inọ mme owo n̄kpọ, inyụn̄ inam emem odu ke isọn̄ ye ke otu mme owo ke ini Christmas.

Akpanikọ: Nnyịn imesisịn ukeme ndinọ mme owo n̄kpọ inyụn̄ inam emem kpukpru usen. (Mme N̄ke 11:25; Rome 12:18) Ke uwụtn̄kpọ, nnyịn isibọhọ okụk ke ini owo edide mme mbono esop nnyịn ye ke ini ikwọrọde ikọ inọ mme owo nte Jesus ọkọdọhọde ete: “Mbufo ẹkebọ ke mfọn, ẹnọ ke mfọn.” (Matthew 10:8) Ke adianade do, nnyịn imesinam mme owo ẹfiọk ke Obio Ubọn̄ Abasi kpọt edinam ata emem odu ke isọn̄.—Matthew 10:7.

Ntak emi Mme Ntiense Jehovah mîsidiaha Christmas?

  • Jesus ọkọdọhọ iti n̄kpa imọ, idịghe usen emana imọ.—Luke 22:19, 20.

  • Mme apostle Jesus ye mme Christian eyo mme apostle ikesidiaha Christmas. New Catholic Encyclopedia ọdọhọ ke “ẹketọn̄ọ ndisidia usọrọ emana Jesus ke isua 243 [E.N.],” ke se ikande isua 100 ẹma ẹkebe tọn̄ọ nte akpatre ke otu mme apostle Jesus akakpa.

  • N̄kpọ ndomokiet idụhe ndiwụt ke Jesus akamana ke December 25; Bible isiakke usenọfiọn̄ emi enye akamanade.

  • Nnyịn inịm ke Abasi imaha usọrọ Christmas sia enye ọkọtọn̄ọ oto usọrọ mme okpono ndem.—2 Corinth 6:17.

Ntak emi mbufo mîdiaha Christmas man ẹbọhọ ikọ?

Ediwak owo ẹsidia Christmas kpa ye oro ẹfiọkde ke enye ọkọtọn̄ọ oto usọrọ mme okpono ndem, ke Bible inyụn̄ idọhoke ẹdia. Utọ mbon oro ẹkeme ndibụp ẹte: Ntak emi mme Christian mîtieneke idia Christmas man ẹbọhọ ikọ?

Bible esịn udọn̄ ọnọ nnyịn ete ikûyak mme owo ẹbiere n̄kpọ ẹnọ nnyịn, onyụn̄ ọdọhọ ida “ukeme ukere n̄kpọ” oro Abasi ọnọde nnyịn inam n̄kpọ. (Rome 12:1, 2) Enye ekpep nnyịn ete ima se idide akpanikọ. (John 4:23, 24) Ntre, kpa ye oro ikerede nte mme owo ẹdade nnyịn, nnyịn isọn̄ọ inam se Bible ọdọhọde idem ọkpọkọm oro anam mme owo ẹkûma nnyịn.

Kpa ye oro nnyịn mîsidiaha Christmas, nnyịn imokpono se owo kiet kiet ebierede ọnọ idemesie aban̄a n̄kpọ emi. Nnyịn ikpanke mbon efen ndidia Christmas.

 

 

 

Kpep N̄kpọ En̄wen

MME MBỤME BIBLE ORO ẸBỌRỌDE

Nso ke Bible Etịn̄ Aban̄a Christmas?

N̄kpọ 5 emi ẹsinamde ke ini Christmas ẹkeme ndikpa fi idem.